അടുത്ത വർഷം വരെ ഈ രാജ്യത്തേക്ക്​ വിദേശ സഞ്ചാരികൾക്ക്​ പ്രവേശനമില്ല

കോവിഡിനെ തുടർന്ന്​ അടച്ചിട്ട പല രാജ്യങ്ങളും ​ഇപ്പോൾ സഞ്ചാരികൾക്ക്​ മുന്നിൽ വാതിൽ തുറന്നിരിക്കുകയാണ്​. വാക്​സിൻ എടുത്തവരെ ഇരുകൈയും നീട്ടി സ്വീകരിക്കുകയാണ്​ ഈ രാജ്യങ്ങൾ.

എന്നാൽ, ഈ വർഷം കഴിയും വരെ രാജ്യത്തേക്ക്​ ടൂറിസ്റ്റുകളെ പ്രവേശിപ്പിക്കേണ്ടെന്ന തീരുമാനത്തിലാണ്​ ന്യൂസിലാൻഡ്​. 2021 അവസാനം വരെ അതിർത്തികൾ അടച്ചിടുമെന്ന് ന്യൂസിലാൻഡ് സർക്കാർ വ്യാഴാഴ്ച പ്രഖ്യാപിച്ചു.

രാജ്യ​ത്ത്​ കോവിഡിനെതിരായ വാക്​സിനേഷൻ തുടരുകയാണ്​​. ഈ വർഷം അവസാനത്തോടെ മാത്രമേ ഇത്​ പൂർത്തിയാകൂ. ഇതിന്​ ശേഷം മാത്രമാകും വിദേശ ടൂറിസ്റ്റുകളെ രാജ്യത്തേക്ക്​ പ്രവേശിപ്പിക്കുകയെന്ന്​ പ്രധാനമന്ത്രി ജസീന്ത ആൻഡേഴ്​സൻ വ്യക്​തമാക്കി.

മറ്റ് വികസിത രാജ്യങ്ങളെ അപേക്ഷിച്ച് ന്യൂസിലാൻഡിലെ വാക്സിനേഷൻ പ്രക്രിയ മന്ദഗതിയിലാണ്. രാജ്യത്തെ ജനസംഖ്യയുടെ 29 ശതമാനം പേർക്ക് മാത്രമേ ഒരു ഡോസ് ലഭിച്ചിട്ടുള്ളൂ. 17 ശതമാനം പേർക്ക് രണ്ട്​ ഡോസ്​ ലഭിച്ചു. അതേസമയം, വ്യാഴാഴ്ച വരെ ഇവിടെ പുതിയ കേസുകളൊന്നും റിപ്പോർട്ട് ചെയ്തിട്ടില്ല.

'രാജ്യം ശ്രദ്ധയോടെയും ആത്മവിശ്വാസത്തോടെയും മുന്നോട്ട് പോകാൻ ആഗ്രഹിക്കുന്നു. വാക്​സിനേഷൻ നടപടി പൂർത്തിയായതിനാൽ മറ്റു രാജ്യങ്ങൾ നിയന്ത്രണങ്ങൾ നീക്കിയിട്ടുണ്ട്​. എന്നാൽ, അവിടങ്ങളിൽ ഇപ്പോൾ കോവിഡ്​ കേസുകൾ വർധിക്കുകയാണ്​. ഈ സാഹചര്യം സൃഷ്​ടിക്കാൻ ന്യൂസിലാൻഡ്​ ആഗ്രഹിക്കുന്നില്ല' -ജസിന്ത ആൻഡേഴ്​സൻ പറഞ്ഞു.

4.9 ദശലക്ഷം ജനസംഖ്യയുള്ള രാജ്യത്ത്​ ഇതുവരെ 2557 കോവിഡ്​ കേസുകൾ മാത്രമാണ്​ റിപ്പോർട്ട്​ ചെയ്​തത്​. 26 മരണങ്ങളും സംഭവിച്ചു. അന്താരാഷ്​ട്ര അതിർത്തി അടക്കൽ പോലുള്ള കർശന നിയന്ത്രണങ്ങളിലൂടെയാണ്​ ന്യൂസിലാൻഡ്​ കോവിഡിനെ അതിജീവിക്കുന്നത്​.