ബഹാമാസിലെ ഏറ്റവും വലിയ സ്വകാര്യ ദ്വീപ് സ്വന്തമാക്കാൻ ഇതാ അവസരം

മനോഹരമായ ഒരു ദ്വീപിൽ വീടോ സ്​ഥലമോ സ്വന്തമാക്കുക എന്നത് ഏവരുടെയും സ്വപ്​നമാണ്​. എന്നാൽ, ഒരു ദ്വീപ്​ തന്നെ സ്വന്തമാക്കാൻ കഴിഞ്ഞാൽ അതിലേറെ വലിയ സന്തോഷമെന്തുണ്ട്​. അതും ലോകത്തിലെ ഏറ്റവും മനോഹരമായ ടൂറിസ്റ്റ്​ ഡെസ്റ്റിനേഷനിൽ. ഇത്തരമൊരു സ്വപ്​നം കണ്ടുനടക്കുന്നവർക്കിതാ ഒരു സന്തോഷ വാർത്ത. അറ്റ്​ലാന്‍റിക്​ സമുദ്രത്തിലെ ​അതിമനോഹര രാജ്യമായ ബഹാമാസിലെ ഏറ്റവും വലിയ സ്വകാര്യ ദ്വീപ് വിൽപ്പനക്ക് വെച്ചിരിക്കുന്നു​.

730 ഏക്കർ വരുന്ന ലിറ്റിൽ റാഗഡ് എന്നറിയപ്പെടുന്ന സെന്‍റ്​ ആൻഡ്രൂസ് ദ്വീപാണ്​ വാങ്ങാൻ കഴിയുക. 19.5 ദശലക്ഷം ഡോളറാണ്​ അടിസ്​ഥാന വില നിശ്ചയിച്ചിരിക്കുന്നത്​. മാർച്ച്​ 26ന്​ ലേലം നടക്കും. ലേലത്തിൽ പ​ങ്കെടുക്കാൻ ഒരു ​ലക്ഷം ഡോളർ കെട്ടിവെക്കണം​. ബഹാമാസിലെ പല ദ്വീപുകളും ഇത്തരത്തിൽ സ്വകാര്യ വ്യക്​തികൾ സ്വന്തമാക്കിയിട്ടുണ്ട്​.

അടുത്തുള്ള ജനവാസ മേഖലയായ ഡങ്കൻസ്​ ടൗണിൽനിന്ന്​ 10 മിനിറ്റ്​ ബോട്ട്​ യാത്രയേ സെന്‍റ്​ ആൻഡ്രൂസ്​ ദ്വീപിലേക്കുള്ളൂ. കൂടാതെ ചെറുവിമാനങ്ങൾക്ക് വന്നിറങ്ങാൻ കഴിയുന്ന എയർസ്ട്രിപ്പും ഇവിടെയുണ്ട്​. അമേരിക്കയിലെ മിയാമിയിൽനിന്ന്​ 372 മൈലും ബഹമാസിലെ തലസ്ഥാനമായ നസ്സാവിൽനിന്ന് 223 മൈലും ദൂരവുമുണ്ട്​​ ഇവിടേക്ക്​​.

വലിയ കപ്പലുകൾക്ക് വരെ ഈ ദ്വീപിലേക്ക്​ എത്താനാകും. മത്സ്യബന്ധനം, സ്നോർക്കെലിങ്​ തുടങ്ങി സാഹസിക വിനോദങ്ങൾക്കും ഇവിടെ അവസരമുണ്ട്​. സമുദ്രനിരപ്പിൽനിന്ന് 40 അടി ഉയരത്തിൽ സ്​ഥിതി ചെയ്യുന്ന കുന്നാണ്​ മറ്റൊരു പ്രത്യേകത. ഇവിടെ നിന്നാൽ ദ്വീപിന്‍റെയും കടലിന്‍റെയുമെല്ലാം മനോഹാരിത ആസ്വദിക്കാനാകും. 700ലധികം ദ്വീപുകളാണ്​ ബഹാമാസിലുള്ളത്​. യു.എസ്​, ക്യൂബ, ഹിസ്പാനിയോള, കരീബിയൻ കടൽ തുടങ്ങിയവായണ്​ രാജ്യത്തിന്‍റെ അതിർത്തി.