ഇക്കാര്യങ്ങൾ ഉറപ്പുവരുത്തിയാൽ നിങ്ങൾക്കും​ തായ്​ലൻഡിലേക്ക്​ യാത്ര പോകാം

ഇന്ത്യയുൾപ്പെടെ 63 രാജ്യങ്ങളിൽനിന്നുള്ള വിദേശ യാത്രക്കാർക്കായി തായ്‌ലൻഡ് വീണ്ടും വാതിൽ തുറന്നിരിക്കുകയാണ്​. തായ്‌ലൻഡിന്‍റെ മിക്ക ഭാഗങ്ങളിലും യാത്രാ നിയന്ത്രണങ്ങളും കോവിഡുമായി ബന്ധപ്പെട്ട മാനദണ്ഡങ്ങളും ഭരണകൂടം ലഘൂകരിച്ചിട്ടുണ്ട്.

പൂർണമായും വാക്​സിൻ എടുത്തവർക്കാണ്​ രാജ്യത്തേക്ക് വിമാനമാർഗം​ വരാനാവുക. 63 അംഗീകൃത രാജ്യങ്ങളിലൊന്നിൽ കുറഞ്ഞത് 21 ദിവസമെങ്കിലും താമസിച്ചിരിക്കണം. തിരികെ വരുന്ന തായ്‌ലൻഡുകാരെയും മുമ്പ് തായ്‌ലൻഡിൽ യാത്ര ചെയ്ത വിദേശികളെയും ഈ നിബന്ധനയിൽനിന്ന് ഒഴിവാക്കിയിട്ടുണ്ട്​. കൂടാതെ രക്ഷിതാക്കൾക്കൊപ്പം യാത്ര ചെയ്യുന്ന 12 വയസ്സിന് താഴെയുള്ളവർക്ക്​ വാക്സിനേഷൻ ആവശ്യമില്ല.

തായ്​ലൻഡിലേക്ക്​ വരുന്ന സഞ്ചാരികൾ താഴെ പറയുന്ന കാര്യങ്ങൾ ഉറപ്പുവരുത്തണം:

• യാത്രക്ക്​ 14 ദിവസം മുമ്പെങ്കിലും എടുത്ത വാക്‌സിനേഷൻ സർട്ടിഫിക്കറ്റ്.
  
• മൂന്ന്​ മാസത്തിനുള്ളിൽ കോവിഡ്​ ബാധിച്ചവർ യാത്ര ചെയ്യുന്നതിന്‍റെ 14 ദിവസം മുമ്പെങ്കിലും അംഗീകൃത വാക്സിന്‍റെ ഒരു ഡോസ് സ്വീകരിച്ചിരിക്കണം.
  
• യാത്രയുടെ 72 മണിക്കൂറിനുള്ളിൽ എടുത്ത ആർ.ടി.പി.സി.ആർ നെഗറ്റീവ്​ ഫലം.
  
• തായ്​ലൻഡിലെ ഒരു രാത്രി താമസത്തിനും ആർ.ടി.പി.സി.ആർ പരിശോധനക്കും വേണ്ടി പണമടച്ചതിന്‍റെ രേഖ.
  
• 50,000 യു.എസ് ഡോളറിൽ കുറയാത്ത കവറേജുള്ള ഇൻഷുറൻസ് പോളിസി.
  

ഇത്തരം കാര്യങ്ങളെ ഉറപ്പുവരുത്തിയാൽ സാൻഡ്‌ബോക്‌സ് ഡെസ്റ്റിനേഷൻസ്​ എന്നറിയപ്പെടുന്ന 17 ലക്ഷ്യസ്ഥാനങ്ങൾ യാത്രക്കാർക്ക് തിരഞ്ഞെടുക്കാം. സന്ദർശകർ ഈ ലക്ഷ്യസ്ഥാനങ്ങളിലൊന്നിൽ ഏഴു രാത്രി തങ്ങണം. അതിനുശേഷം, തായ്‌ലൻഡിന്‍റെ മറ്റു ഭാഗങ്ങളിലേക്ക് പോകാൻ കഴിയും.

17 സാൻഡ്‌ബോക്‌സ് ഡെസ്റ്റിനേഷനുകൾ ഇവയാണ്​:

ബാങ്കോക്ക്, ക്രാബി, ട്രാറ്റ്, ചിയാങ് മായ്, ബുരി റാം, ചിൻ ബുരി, പ്രചുവപ്പ് ഖിരി ഖാൻ, ഫാങ്-നാഗ, ഫെതചബുരി, ഫുക്കറ്റ്, റനോങ്, റയോങ്, ലോയി, സമുത് പ്രകാൻ, സൂറത്ത് താനി, ഉഡോൺ താനി.

ബാങ്കോക്ക്, ക്രാബി, ഫാങ്-നാഗ, ഫുക്കറ്റ് എന്നിവിടങ്ങളിൽ എല്ലാ ഷോപ്പിംഗ് കേന്ദ്രങ്ങളും സിനിമാശാലകളും തിയറ്ററുകളും തുറന്നിട്ടുണ്ട്. ബാംഗ് പാ-ഇൻ പാലസ്, ചാങ് ഹുവാ മാൻ റോയൽ പ്രോജക്റ്റ്, ഭുബിംഗ് പാലസ്, ഗ്രാൻഡ് പാലസ് കോംപ്ലക്സിലെ ക്വീൻ സിരികിറ്റ് മ്യൂസിയം ഓഫ് ടെക്സ്റ്റൈൽസ്, സാല ചാലെർക്രുങ് റോയൽ തിയറ്റർ തുടങ്ങി നിരവധി പ്രധാന ആകർഷണങ്ങളിലേക്കെല്ലാം സഞ്ചാരികൾക്ക്​ പ്രവേശനമുണ്ട്​. അതേസമയം, പബ്ബുകളും ബാറുകളും ഇതുവരെ തുറന്നിട്ടില്ല.