ജമ്മുകശ്​മീരിലെ ആരാധനാലയങ്ങൾ ആഗസ്​റ്റ്​ 16ന്​ തുറക്കും; വൈഷ്​ണോദേവി ക്ഷേത്രത്തിലും ഭക്​തരെ അനുവദിക്കും

ശ്രീനഗർ: ജമ്മുകശ്​മീരിലെ ആരാധനാലയങ്ങൾ ആഗസ്​റ്റ്​ 16 മുതൽ തുറക്കുമെന്ന്​ അധികൃതർ. റെസി ജില്ലയിലെ പ്രശസ്​ത ആരാധന കേന്ദ്രമായ വൈഷ്​ണോദേവി ക്ഷേത്രവും തുറക്കുമെന്ന്​ ക്ഷേത്ര ബോർഡ്​ അറിയിച്ചു.

കോവിഡ്​ രൂക്ഷമായതിനെ തുടർന്ന്​ മെയ്​ 18നാണ്​ വൈഷ്​ണോദേവി ക്ഷേത്രത്തിലേക്കുള്ള യാത്ര കേന്ദ്രസർക്കാർ തടഞ്ഞത്​. പിന്നീട്​ ജൂൺ എട്ട്​ മുതൽ ആരാധനാലയങ്ങൾക്ക്​ തുറന്ന്​ പ്രവർത്തിക്കാൻ അനുമതി നൽകിയിരുന്നെങ്കിലും കോവിഡ്​ ​കൂടി​യതോടെ നിയന്ത്രണങ്ങൾ ഏർപ്പെടുത്തിയിരുന്നു.

കോവിഡ്​ മാനദണ്ഡങ്ങൾ പൂർണമായും പാലിച്ചാവും ഭക്​തരെ അനുവദിക്കുകയെന്ന്​ ക്ഷേത്ര ബോർഡ്​ അറിയിച്ചു. ഭക്​തർക്കുള്ള നിർദേശങ്ങൾ പിന്നീട്​ അറിയിക്കും. നിയന്ത്രണങ്ങളോടെ ഹെലികോപ്​ടർ സർവീസ്​ ആരംഭിക്കുമെന്നും സൂചനയുണ്ട്​.