ഹിമാലയത്തിന്‍റെ അദ്​ഭുതങ്ങളിലേക്ക്​ ​റൈഡ്​ പോകാം; കാർഗിൽ - ലേ പാത ഫെബ്രു. 27ന്​ തുറക്കും

സഞ്ചാരികളുടെയും റൈഡർമാരുടെയും ഇഷ്​ട റൂട്ടായ കാർഗിൽ - ലേ ഹൈവേ ഫെബ്രുവരി 27 മുതൽ ഗതാഗതത്തിനായി തുറന്നുകൊടുക്കും. ലഡാക്ക്​ ട്രാഫിക്​ എസ്​.പിയാണ്​ ഇതുസംബന്ധിച്ച്​ ഉത്തരവ്​ പുറത്തിറക്കിയത്​. മഞ്ഞുവീഴ്ച കാരണം മാസങ്ങളായി ഈ പാത അടഞ്ഞുകിടക്കുകയായിരുന്നു.

കാർഗിലിന്​ സമീപമുള്ള സോജിലയിൽ ഗതാഗതം സുഗമമായി നടപ്പാക്കാൻ റോഡിന്‍റെ അവസ്ഥയെക്കുറിച്ചും വാഹനങ്ങളെ സംബന്ധിച്ചും യഥാസമയം വിവരങ്ങൾ ശേഖരിക്കാൻ ഉത്തരവിൽ നിർദേശിക്കുന്നുണ്ട്​. ഇതിന്‍റെ ഭാഗമായി വെള്ളിയാഴ്ച​ വൈകുന്നേരത്തോടെ മിനമാർഗിൽ ട്രാഫിക് വിഭാഗം ക്യാമ്പ്​ ഒരുക്കും. ഇവിടെ വിന്യസിച്ചിരിക്കുന്ന ജില്ല പൊലീസുമായി ചേർന്നാണ്​ ഇതിന്‍റെ പ്രവർത്തനം.

പാത തുറക്കുന്നതോടെ കശ്​മീരിലെത്തുന്നവർക്ക്​ റോഡ്​ മാർഗം ലഡാക്ക്​ ഭാഗ​േത്തക്ക്​ കൂടി സഞ്ചരിക്കാനാവും. ലേയിൽനിന്ന്​ നുബ്ര വാലി, പാ​ൻഗോങ്​ തടാകം ഭാഗങ്ങളിലേക്ക്​ ഇപ്പോൾ യാത്ര സാധ്യമാണ്​. ഇതിനായി ഇന്നർലൈൻ​ പെർമിറ്റ്​ അനുവദിക്കുന്നുണ്ട്​. അതേസമയം, ലഡാക്കിൽ വരുന്നവർക്ക്​ കോവിഡ്​ നെഗറ്റീവ്​ സർട്ടിഫിക്കറ്റ്​ നിർബന്ധമാണ്​.