ഫോർഡോസ് ട്രാവലിന്റെ ‘നോ ലിസ്റ്റി’ൽ കേരളവും

ടൂറിസത്തിന്റെ സാധ്യതകൾ ഉപയേഗപ്പെടുത്താൻ സംസ്ഥാന സർക്കാർ വിവിധ പദ്ധതികൾ ആവിഷ്‍കരിക്കുന്നതിനിടെ ഫോർഡോസിന്റെ ‘നോ ലിസ്റ്റി’ൽ കേരളം ഇടംപിടിച്ചത് തിരിച്ചടിയായി.

യാത്ര-വിനോദ സഞ്ചാര മേഖലയിൽ വിവരങ്ങൾ നൽകുന്ന യാത്ര ഗൈഡ് ആണ് ഫോർഡോസ് ട്രാവൽ. ​2025ൽ വിനോദ സഞ്ചാരികൾ വേണ്ടെന്നു വെക്കാനിടയുള്ള 15 സ്ഥലങ്ങളുടെ പട്ടികയിലാണ് കേരളവും സ്ഥാനം പിടിച്ചത്. ലോകം മുഴുവനുമുള്ള വിനോദ സഞ്ചാരികൾ പിന്തുടരുന്ന യാത്രാ വിവര പത്രികയാണിത്. ടൂറിസം മേഖലയിൽ പ്രവർത്തിക്കുന്ന ഈ പ്രസിദ്ധീകരണം എല്ലാവർഷവും നോ ലിസ്റ്റ് പുറത്തു വിടാറുണ്ട്.

സ്ഥിരമായി വീഴ്ച വരുത്തുന്നവർ, പുതുതായി പട്ടികയിൽ പെടുന്നവർ എന്നിങ്ങനെ രണ്ടു വിഭാഗങ്ങളിലായാണ് ലിസ്റ്റ് തയാറാക്കുന്നത്. പുതുതായി പട്ടികയിൽ പെടുന്നവരുടെ കൂട്ടത്തിലാണ് കേരളം. ഇറ്റലിയിലെ അഗ്രിഗെന്റൊ, ബ്രിട്ടീഷ് വിർജിൻ ഐലൻഡ്, ജപ്പാനിലെ ക്യോട്ടോ, ടോക്യോ, മെക്സികോയിലെ ഒയക്സാക, സ്കോട്‍ലൻഡ് നോർത്ത് കോസ്റ്റ് എന്നീ സ്ഥലങ്ങൾ കേരളം കൂടാതെ ലിസ്റ്റിൽ ഇടം പിടിച്ചിട്ടുണ്ട്. ടൂറിസം സജീവമായതും പ്രകൃതി ദുരന്തങ്ങളുമാണ് കേരളത്തിന് തിരിച്ചടിയായത്. ‘ദൈവത്തിന്റെ സ്വന്തം നാട്’ എന്ന് വിളിക്കപ്പെടുന്ന കേരളം പണ്ടേ സഞ്ചാരികളുടെ ഇഷ്ടകേന്ദ്രമാണ്. വിശാലമായ കടൽത്തീരങ്ങളും ആകർഷകമായ കായലുകളും ലോകമെമ്പാടുമുള്ള യാത്രക്കാരെ ഏറെ ആകർഷിക്കുന്നു.

2023ൽ 21.8 ദശലക്ഷം ആഭ്യന്തര വിനോദസഞ്ചാരികളും 6,49,057 അന്താരാഷ്ട്ര സന്ദർശകരുമാണ് സംസ്ഥാനത്തെത്തിയത്. സംസ്ഥാന സമ്പദ് വ്യവസ്ഥയിൽ ജി.ഡി.പിയുടെ 10 ശതമാനം ടൂറിസം രംഗത്തുനിന്നാണ് ലഭിക്കുന്നത്. കേരളത്തിലെ സമ്പദ് വ്യവസ്ഥക്ക് ഗുണപ്രദമാണെങ്കിലും നോ ലിസ്റ്റിൽ ഇടം പിടിച്ചത് തിരിച്ചടിയാകുമോ എന്ന് വിനോദ സഞ്ചാരം മേഖലയിലുള്ളവർക്ക് ആശങ്കയുണ്ട്. ടൂറിസം രംഗത്ത് പ്രാദേശിക സർക്കാറുകൾ ആശയക്കുഴപ്പമുണ്ടാക്കുന്ന സമീപനങ്ങൾ സ്വീകരിച്ചിരിക്കുന്നതായി പരിസ്ഥിതി പ്രവർത്തകൻ ശ്രീധർ രാധാകൃഷ്ണൻ അഭിപ്രായപ്പെടുന്നതായും റിപ്പോർട്ടിൽ പറഞ്ഞു. ജൂലൈയിലാണ് വയനാട് ജില്ലയിലെ മുണ്ടക്കൈ, ചൂരൽമല ഗ്രാമങ്ങളിൽ 400ലധികം പേരുടെ ജീവൻ അപഹരിച്ച വൻ പ്രകൃതി ദുരന്തത്തിന് കേരളം സാക്ഷ്യം വഹിച്ചത്.

അമിതവികസനം മൂലം പാരിസ്ഥിതിക തകർച്ച നേരിടുന്ന പ്രദേശത്താണ് ദുരന്തമുണ്ടായത്. കഴിഞ്ഞ ദശകത്തിൽ നിരവധി സർക്കാർ റിപ്പോർട്ടുകൾ ഈ അപകടങ്ങളെക്കുറിച്ച് മുന്നറിയിപ്പ് നൽകിയിരുന്നുവെങ്കിലും പലപ്പോഴും അവഗണിക്കപ്പെട്ടു.

അതേസമയം, വെള്ളപ്പൊക്കം, അനധികൃത നിർമ്മാണം അനിയന്ത്രിതമായ ടൂറിസം എന്നിവ കാരണം മറ്റൊരു പ്രധാന ആകർഷണമായ വേമ്പനാട് കായൽ ചുരുങ്ങുകയാണ്. ഒരുകാലത്ത് പരിസ്ഥിതി സൗഹൃദ സങ്കൽപ്പമായിരുന്ന ഹൗസ് ബോട്ടുകൾ ഇപ്പോൾ വലിയ വാണിജ്യ വ്യവസായമായി വികസിച്ചിരിക്കുന്നു. ഈ അനിയന്ത്രിതമായ വളർച്ച പരിസ്ഥിതി നാശത്തിലേക്ക് നയിക്കുന്നു.

മിക്ക ഹൗസ് ബോട്ടുകളിൽ നിന്നുമുള്ള മലിനജലവും മലിനജലവും നേരിട്ട് തടാകത്തിലേക്ക് പുറന്തള്ളപ്പെടുന്നു, ഇത് മലിനീകരണത്തിന്റെ അളവ് വർദ്ധിപ്പിക്കുകയും ജലജീവികൾക്ക് ദോഷം വരുത്തുകയും ചെയ്യുന്നതായും റി​പ്പോർട്ടിൽ പറയുന്നു. ബോട്ടുകളിൽ നിന്നുള്ള മലിനീകരണവും എൻജിനുകളിൽ നിന്നുള്ള ചോർച്ചയും കാരണം കേരളത്തിലെ കായൽ ടൂറിസത്തിന്റെ സുസ്ഥിരത തന്നെ ചോദ്യം ചെയ്യപ്പെടുകയാണ്.

കേരള യൂനിവേഴ്സിറ്റി ഫോർ ഫിഷറീസ് ആൻഡ് ഓഷ്യൻ സ്റ്റഡീസിന് കീഴിലുള്ള സെൻറർ ഫോർ അക്വാട്ടിക് റിസോഴ്‌സ് മാനേജ്‌മെന്റ് ആന്റ് കൺസർവേഷൻ നടത്തിയ വിശദമായ പഠനവും വേമ്പനാട് കായലിലെ പരിസ്ഥിതി നാശത്തെ കുറിച്ച് മുന്നറിയിപ്പ് നൽകിയിരുന്നു.

വർദ്ധിച്ചുവരുന്ന പാരിസ്ഥിതിക ആശങ്കകളുടെ വെളിച്ചത്തിൽ ‘മാലിന്യ മുക്തം നവകേരളം’ കാമ്പയിൻ്റെ ഭാഗമായ ‘ഗ്രീൻ ടൂറിസം ഡെസ്റ്റിനേഷൻസ്’ ഉൾപ്പെടെ നിരവധി സംരംഭങ്ങൾ കേരളം ആരംഭിച്ചിട്ടുണ്ട്. ഇത്തരം പദ്ധതികളിലൂടെ പാരിസ്ഥിതി നാശം ഒഴിവാക്കാനും ഹരിത കേരളം സംരക്ഷിക്കാനുമുള്ള തീവ്ര യജ്ഞത്തിലാണ് ടൂറിസം വകുപ്പും സംസ്ഥാന സർക്കാറും.