ചെക്ക്​-ഇൻ ബാഗേജ്​ ഇല്ലെങ്കിൽ കൂടുതൽ നിരക്കിളവ്​; പുതിയ മാർഗനിർദേശവുമായി ഡി.ജി.സി.എ

കോവിഡ്​ ഏറെ ബാധിച്ച മേഖലകളിലൊന്നാണ്​​ വിമാന സർവിസുകൾ. തങ്ങൾക്ക്​ വന്ന നഷ്​ടം നികത്താൻ നിരക്കുകളിൽ വർധന വരുത്തിയാണ്​ വിമാന കമ്പനികൾ ഇതിനെ മറികടക്കുന്നത്​. എന്നാൽ, ഇത്​ ഇരുട്ടടിയായത്​ യാ​ത്രക്കാർക്കാണ്​​, പ്രത്യേകിച്ച്​ ആഭ്യന്തര യാത്രക്കാരെ. ഇതിന്​ പരിഹാരമായി പുതിയ മാർഗനിർദേശം കൊണ്ടുവന്നിരിക്കുകയാണ്​ ഡയറക്​ടറേറ്റ്​ ജനറൽ ഓഫ്​ സിവിൽ ഏവിയേഷൻ. ഡി.ജി.സി.എയുടെ പുതിയ മാർഗനിർദേശം അനുസരിച്ച് ചെക്ക്-ഇൻ ബാഗേജില്ലാത്ത യാത്രക്കാർക്ക്​ കുറഞ്ഞനിരക്കിൽ ടിക്കറ്റ്​ ബുക്ക്​ ചെയ്യാം​.

നിലവിൽ ബാഗേജുകളോ ക്യാബിൻ ബാഗേജുകളോ ഇല്ലാത്ത യാത്രക്കാർക്ക് ടിക്കറ്റ് നിരക്കിൽ ഇളവ് നൽകാൻ ആഭ്യന്തര വിമാന കമ്പനികൾക്ക് അനുവാദമുണ്ട്. ഒരു യാത്രക്കാരന് ഏഴ്​ കിലോഗ്രാം വരെ ക്യാബിൻ ബാഗേജും 15 കിലോഗ്രാം ചെക്ക്-ഇൻ ബാഗേജും വഹിക്കാൻ കഴിയും. ഇതിൽ കൂടുതൽ കൊണ്ടുപോകാൻ അധികതുക ഈടാക്കും.

എന്നാൽ, പുതിയ നിർദേശപ്രകാരം ക്യാബിൻ ബാഗേജുമായി മാത്രം യാത്ര ചെയ്യാൻ ആഗ്രഹിക്കുന്നവർക്ക്​ കുറഞ്ഞവിലക്ക്​ ടിക്കറ്റ്​ നൽകണമെന്നാണ്​. ഇത്തരത്തിൽ യാത്ര പോകുന്നവർ തങ്ങൾ കൊണ്ടുപോകുന്ന ബാഗേജിന്‍റെ ഭാരം ടിക്കറ്റ്​ ബുക്ക്​ ചെയ്യു​േമ്പാൾ രേഖപ്പെടുത്തണം.

അതേസമയം, കുറഞ്ഞനിരക്കിൽ ടിക്കറ്റെടുത്ത്​ കൂടുതൽ ബാഗേജുമായി വരുന്നവർക്ക്​ ഇൗടാക്കുന്ന നിരക്കിനെ സംബന്ധിച്ച്​ ഇവർക്ക്​ മുൻകൂട്ടി വിവരം​ നൽകണം. ഇങ്ങനെ ഈടാക്കുന്ന തുക ന്യാമായിരിക്കണം. ടിക്കറ്റ് ബുക്ക് ചെയ്യുന്ന സമയത്ത് ഈ വിവരങ്ങൾ ടിക്കറ്റിൽ രേഖപ്പെടുത്തുകയും വേണമെന്ന്​ ഡി.ജി.സി.എയുടെ നിർദേശത്തിൽ പറയുന്നു.