ജൂൺ ഒന്ന്​ മുതൽ വിമാനങ്ങളിൽ പകുതി സീറ്റിൽ മാത്രം യാത്രക്കാർ; ടിക്കറ്റ്​ നിരക്ക്​ വർധിക്കും

ന്യൂഡൽഹി: ആഭ്യന്തര സർവിസ്​ നടത്തുന്ന വിമാനങ്ങളിൽ ജൂൺ ഒന്ന്​ മുതൽ പകുതി സീറ്റിൽ മ​ാത്രമേ യാത്രക്കാരെ അനുവദിക്കൂ. ​വർധിച്ചുവരുന്ന കോവിഡിന്‍റെ പശ്ചാത്തലത്തിലാണ്​ സിവിൽ ഏവിയേഷൻ മന്ത്രാലയം പുതിയ നിർദേശം പുറത്തിറക്കിയത്​​. നിലവിൽ 80 ശതമാനം സീറ്റുകളിൽ യാത്രക്കാരെ അനുവദിച്ചിരുന്നു.

സീറ്റ്​ കുറയുന്നതോടൊപ്പം വിമാന നിരക്കിലും വർധനവ്​ വരും. കഴിഞ്ഞവർഷം രണ്ട്​ മാസത്തെ ഇടവേളക്കുശേഷം 2020 മേയ്​ 25നാണ്​ ആഭ്യന്തര വിമാന സർവിസുകൾ പുനരാരംഭിച്ചത്​. ആദ്യഘട്ടത്തിൽ 33 ശതമാനം സീറ്റുകളിൽ മാത്രമാണ്​ ആളുകളെ കയറ്റിയിരുന്നത്​. എന്നാൽ, ഡിസംബറോടെ സീറ്റ് പരിധി ക്രമേണ 80 ശതമാനം വരെ വർധിപ്പിക്കാൻ മന്ത്രാലയം അനുമതി നൽകി.

ഇപ്പോൾ കോവിഡ്​ കേസുകൾ വർധിക്കുകയും പല സംസ്​ഥാനങ്ങളും ലോക്​ഡൗൺ ​പ്രഖ്യാപിക്കുകയും ചെയ്​തതോടെ വിമാനയാത്രക്കാരുടെ എണ്ണം ഗണ്യമായി കുറഞ്ഞിട്ടുണ്ട്​. 2021 ഫെബ്രുവരി 28ന് 3.13 ലക്ഷം ആഭ്യന്തര വിമാന യാത്രക്കാരുണ്ടായിരുന്നുവെങ്കിൽ മേയ്​ 25ന്​ അത്​ 39,000 ആയി കുറഞ്ഞു. ഇതോടെ വിമാനക്കമ്പനികൾ വൻ നഷ്​ടത്തിലേക്ക്​ കൂപ്പുകുത്തിയതോടെയാണ്​ ടിക്കറ്റ്​ നിരക്ക്​ വർധിപ്പിക്കാൻ അനുമതി നൽകിയത്​.

ജൂൺ ഒന്ന്​ മുതൽ 40 മിനിറ്റിനുള്ളിൽ ദൂരമുള്ള സർവിസുകളുടെ കുറഞ്ഞ നിരക്ക്​ 13 ശതമാനം വർധിപ്പിച്ച്​ 2300ൽനിന്ന്​ 2600 ആയി ഉയർത്തി. 40 മുതൽ 60 മിനിറ്റ്​ വരെയുള്ള സർവിസുകൾക്ക്​ 2900ന്​ പകരം 3300 രൂപയായിരിക്കും കുറഞ്ഞനിരക്ക്​. കൂടാതെ 60-90, 90-120, 120-150, 150-180, 180-210 എന്നിങ്ങനെ സമയപരിധിയിൽ സർവിസ്​ നടത്തുന്ന വിമാനങ്ങൾക്ക്​ യഥാക്രമം 4000, 4700, 6100, 7400, രൂപ 8700 രൂപ എന്നിങ്ങനെയായിരുക്കും കുറഞ്ഞനിരക്ക്​.

നിലവിൽ 60-90, 90-120, 120-150, 150-180, 180-210 മിനിറ്റികൾക്കിടയിലുള്ള ആഭ്യന്തര വിമാന സർവിസുകൾക്ക് യഥാക്രമം 3500 രൂപ, 4100 രൂപ, 5300 രൂപ, 6400 രൂപ, 7600 രൂപ എന്നിങ്ങനെയാണ്​ തുക.

കഴിഞ്ഞവർഷം മെയ് 25ന് സർവിസുകൾ പുനരാരംഭിക്കുമ്പോൾ സർവിസുകളുടെ സമയ​ം അടിസ്ഥാനമാക്കി ചുരുങ്ങിയും പരമാവധിയുമായ നിരക്ക്​ നിജപ്പെടുത്തിയിരുന്നു.