തേക്കടിയിൽ ബോട്ട് സവാരി നിർത്തി

കുമളി: കനത്ത മഴയെ തുടർന്ന് പെരിയാർ കടുവ സങ്കേതത്തിലെ ഇക്കോ ടൂറിസം പരിപാടികൾക്കൊപ്പം തേക്കടി തടാകത്തിലെ ബോട്ട് സവാരിയും നിർത്തി. ജില്ലയിലെ ടൂറിസം പരിപാടികൾ ഈ മാസം നാല് വരെ നിർത്തിവെക്കാൻ കലക്ടർ നിർദേശം നൽകിയിരുന്നു.

പതിവിന് വിപരീതമായി സഞ്ചാരികളുടെ തിരക്കുണ്ടായിരുന്ന തേക്കടിയിൽ തിങ്കളാഴ്ച വൈകിട്ട് മൂന്നരക്കുള്ള ബോട്ട് സവാരിക്ക് സഞ്ചാരികൾ തയാറെടുക്കുന്നതിനിടെയാണ് പരിപാടികൾ നിർത്തിവെച്ച് അറിയിപ്പ് എത്തിയത്. പെരിയാർ വനമേഖലയിലെ മുഴുവൻ ഇക്കോ ടൂറിസം പരിപാടികളും നിർത്തിയിട്ടുണ്ട്.