രാജ്യത്തെ രണ്ട്​ ചരിത്ര നഗരങ്ങൾ കൂടി യുനെസ്​കോ പൈതൃക പട്ടികയിൽ

ഭോപ്പാൽ: മധ്യപ്രദേശിലെ രണ്ട്​ ചരിത്ര നഗരങ്ങളെ കൂടി യുനെസ്​കോ ലോക പൈതൃക പട്ടികയിൽ ഉൾപ്പെടുത്തി. കോട്ട നഗരമായ ഗ്വാളിയാർ, വിവിധ ക്ഷേത്രങ്ങളാൽ പ്രശസ്​തമായ ഓർച്ച എന്നിവയാണ്​ പട്ടികയിൽ ഉൾപ്പെട്ടത്​. അർബൻ ലാൻഡ്സ്കേപ്പ് സിറ്റി പ്രോഗ്രാമിലാണ്​ ഇവ ഉൾപ്പെട്ടിട്ടുള്ളത്​.

വിദ്യാഭ്യാസം, ശാസ്ത്രം, സംസ്കാരം എന്നിവയിലെ അന്താരാഷ്​ട്ര സഹകരണത്തിലൂടെ ലോക സമാധാനവും സുരക്ഷയും പ്രോത്സാഹിപ്പിക്കുകയെന്നതാണ് ഐക്യരാഷ്​ട്രസഭയുടെ ഏജൻസിയായ യുനെസ്കോ ലക്ഷ്യമിടുന്നത്. പൈതൃക നഗര പട്ടികയിൽ ഉൾപ്പെടുന്നതോടെ ഗ്വാളിയോറി​െൻറയും ഓർച്ചയുടേയും മുഖഛായ തന്നെ മാറുമെന്ന്​ സർക്കാർ വൃത്തങ്ങൾ അറിയിച്ചു.

യുനെസ്കോയും സംസ്ഥാന ടൂറിസം വകുപ്പും ചേർന്ന് രണ്ട് സ്ഥലങ്ങളും കൂടുതൽ മോടികൂട്ടാൻ ആവശ്യമായ മാസ്​റ്റർ പ്ലാൻ തയാറാക്കും. അടുത്തവർഷം യുനെസ്കോ സംഘം സംസ്ഥാനം സന്ദർശിക്കും. പൈതൃക സ്വത്തുക്കൾ പരിശോധിച്ച ശേഷം അവയുടെ വികസനത്തിനും സംരക്ഷണത്തിനുമായി പദ്ധതികൾ ഒരുക്കും.

ഒമ്പതാം നൂറ്റാണ്ടിലാണ്​ ഗ്വാളിയോർ നഗരം സ്ഥാപിക്കപ്പെടുന്നത്​. ഗുർജാർ പ്രതിഹാർ രാജ്വാൻഷ്, തോമർ, ബാഗേൽ കച്‌വാഹോ, സിന്ധ്യാസ് തുടങ്ങിയവരാണ്​ ഇവിടം ഭരിച്ചത്. കോട്ടകൾ, കൊട്ടാരങ്ങൾ എന്നിവയെല്ലാം ഇതി​െൻറ ഓർമകളായി ഉയർന്നുനിൽക്കുന്നു.

ക്ഷേത്രങ്ങൾക്കും കൊട്ടാരങ്ങൾക്കും പേരുകേട്ട ഓർച്ച പതിനാറാം നൂറ്റാണ്ടിലെ ബുണ്ടേല രാജ്യത്തി​െൻറ തലസ്ഥാനമായിരുന്നു. രാജ് മഹൽ, ജഹാംഗീർ മഹൽ, രാമരാജ ക്ഷേത്രം, റായ് പ്രവീൺ മഹൽ, ലക്ഷ്മിനാരായൺ മന്ദിർ എന്നിവയാണ് നഗരത്തിലെ പ്രശസ്തമായ സ്ഥലങ്ങൾ.