പുതു ചമയങ്ങളിഞ്ഞ്​ 'അമ്പ്രല്ല' ബീച്ച്

കടല്‍തീരങ്ങളാൽ അനുഗ്രഹീതവും മനോഹരവുമാണ് യു.എ.ഇ യുടെ കിഴക്കന്‍തീരത്തെ ഫുജൈറ. എമിറേറ്റിന്‍റെ മറുഭാഗത്ത് കൂറ്റന്‍ പര്‍വത നിരകളുമാണ്​. അതിനാൽ എന്നും വിനോദസഞ്ചാരികളുടെ ആകർഷണ കേന്ദ്രമാണ് ഫുജൈറ. ഇപ്പോള്‍ പുതിയതായി ആരംഭിച്ച 'അമ്പ്രല്ല ബീച്ച്' ഈ ആകർഷണീയത വർധിപ്പിച്ചിട്ടുണ്ട്​. അതിമനോഹരമായ ലാന്‍ഡ്‌ സ്​കേപ്പിങ്ങും നിര്‍മാണ മികവും കാരണമായി യൂറോപ്യന്‍ ടച്ച്‌ തന്നെ വന്നിട്ടുണ്ട് ബീച്ചിന്. വിശാലവും ശാന്തവുമായ തീരവും മനോഹരമായ പുല്‍ത്തകിടിയും എല്ലാം ആകർഷകമാണ്​. ഫുജൈറയില്‍ ഒഴിവുസമയം ചിലവഴിക്കാന്‍ പറ്റിയ നല്ലൊരു ബീച്ചില്ലെന്ന പരാതിക്ക് ഒരു പരിഹാരം ആയിരിക്കുകയാണ് ഇതിലൂടെ.

ഉദ്​ഘാടനം പ്രതീക്ഷിച്ചു നില്‍ക്കുന്ന ശൈഖ് ഖലീഫ ഹോസ്പിറ്റലിന് നേരെ മുന്‍ വശത്താണ് ബീച്ച്. നീളം കൂടിയ ജോഗിങ്​ ട്രാക്ക്, കുട്ടികൾക്കായി കളിസ്ഥലങ്ങൾ, പൊതു ടോയ്‌ലറ്റുകൾ, വിവിധ ഫാസ്റ്റ്​ഫുഡ്‌ റെസ്റ്റോറന്‍റുകൾ, ചുറ്റും മനോഹരമായ വൃക്ഷങ്ങള്‍ എന്നിവയെല്ലാമായി അതി മനോഹരമാണിത്​. ഖോര്‍ഫക്കാന്‍, കല്‍ബ ബീച്ചുകളുമായി കിടപിടിക്കുന്ന ബീച്ചാണിത്​. വാരാന്ത്യ അവധിദിനങ്ങളിലെല്ലാം വന്‍ തിരക്കാണ് ഇവിടെ അനുഭവപ്പെടുന്നത്.

ആദ്യത്തെ ഒരു മണിക്കൂര്‍ പാര്‍ക്കിങ്​ സൗജന്യവും പിന്നീടുള്ള ഓരോ മണിക്കൂറിലും പത്തു ദിർഹവുമാണ് ഫീസ്‌. ഫുജൈറ ഭരണാധികാരിയുടെ മകനായ ശൈഖ് മക്​തൂം ബിന്‍ ഹമദ് അല്‍ ശര്‍ഖിയുടെ ഉടമസ്ഥതയിലുള്ള സ്ഥാപനമാണ്‌ നവീകരണ പ്രവര്‍ത്തനത്തിന് മേൽനോട്ടം വഹിക്കുന്നത്. ബാർബിക്യൂ സൗകര്യത്തിനായി കുട പോലെയുള്ള ഷെല്‍ട്ടറുകള്‍ നിരനിരയായി സ്ഥാപിച്ച ബീച്ചായതിനാലാണ്​ 'അമ്പ്രല്ല ബീച്ച്' എന്നറിയിപ്പെട്ടിരുന്നത്.