വാതിലുകളില്ലാത്ത ശനി ഷിൻഗ്​നപൂർ

കൂട്ടായിയിൽ നിന്ന്​ പുറപ്പെട്ടിട്ട്​ ഇന്ന്​ നാലാം ദിവസമാകുന്നു. ഇന്ന്​ പുലർച്ചെ സത്താറയിൽ നിന്ന്​ തുടങ്ങിയ യാത്ര വൈകുന്നേരം ഒൗറംഗബാദ്​ നഗരത്തിൽ എത്തിച്ചേർന്നിരിക്കുകയാണ്​.. രാവിലെ എഴുന്നേറ്റയുട​െന ആദ്യത്തെ ജോലി ബൈക്കി​​​​​​െൻറ ചെയിൻ ലൂബ്​ ചെയ്യലായിരുന്നു. വെളിച്ചം വീണു തുടങ്ങിയിരുന്നില്ല. റിസപ്​ഷൻ സ്​റ്റാഫ്​ ഒൗദാര്യത്തോ​െട നീട്ടിത്തന്ന എമർജൻസി ലൈറ്റി​​​​​​െൻറ വെളിച്ചത്തിലാണ്​ അത്​ ചെയ്​തത്​. ഞാൻ കൊണ്ടുവന്ന ലൈറ്റ്​ മുകളിലാണ്​. സ്​റ്റെയർ കേറി ചെന്ന്​ അതെടുക്കാനുള്ള മടികൊണ്ട്​ അയാൾ നീട്ടിയ ഇത്തിരി വെളിച്ചത്തിൽ ചെയിൻ ലൂബ്​ ചെയ്​തു. ദീർഘയാത്രയിൽ ബൈക്ക്​ ചെയിനി​​​​​​െൻറ ആരോഗ്യത്തിൽ കാര്യമായ ശ്രദ്ധ അനിവാര്യമാണ്​. മുൻകാല യാത്രകളിൽനിന്ന്​ പഠിച്ചൊരു പാഠമാണത്​.

കൃത്യമായ ഇടവേളകളിൽ ബൈക്കി​​​​​െൻറ ചെയിൻ ലൂബ്​ ചെയ്​തിരിക്കണം

 

രാവിലെ നല്ല തണുപ്പുണ്ടായിരുന്നു. ജാക്കറ്റ്​ ധരിച്ചുതന്നെ യാത്ര തുടങ്ങി.  സത്താറയിൽനിന്നും സംസ്​ഥാന പാത വഴിയാണ്​ ‘ഷിവൂർ’ എന്ന സ്​ഥലംവരെ പോകാനുള്ളത്​. പാതയ്​ക്കിരുവശവും കരിമ്പു തോട്ടങ്ങൾ തന്നെ.  ഷിവൂർ എത്തുന്നതുവരെ നല്ല ഭംഗിയുള്ള സ്​ഥലങ്ങളാണ്​. കുന്നിൻമുകളിലെ കാറ്റാടിപ്പാടം, വരണ്ടതാണെങ്കിലും തനിമ ചോരാത്ത തരിശുനിലങ്ങൾ, ഇഷ്​ടികചൂളകൾ, വളരെ ചെറിയ വീടുകൾ അങ്ങനെ എന്തിനും അതി​​​​​​െൻറതായ ഭംഗി നിറഞ്ഞ ഗ്രാമങ്ങളിലൂടെയായിരുന്നു യാത്ര.
ഒരു പാലത്തിനു മുകളിലെത്തിയപ്പോൾ താ​െഴ മുമ്പെങ്ങോ വെള്ളം ഒലിച്ചുപോയതി​​​​​​െൻറ പാടുകൾ മാത്രം ശേഷിച്ചിരിക്കുന്നു. ഇതുവഴി ഒരു പുഴ ഒഴുകിയിരുന്നു എന്നതിന്​ തെളിവായി ഒരു ജലരേഖ. ബൈക്കിൽ എഴുതി ഒട്ടിച്ചിരുന്ന ‘Save water the future is in Your Hands’ എന്ന സന്ദേശം എത്ര പ്രസക്​തമെന്നു തോന്നി​േപ്പായി.

​പൊരിവെയിലത്ത്​ കുഞ്ഞുങ്ങളുമായി അമ്മമാർ ഇഷ്​ടികക്കളങ്ങളിൽ പണിയെടുക്കുന്നത്​ കാണാം

 

സ്​ഥലപ്പേര്​ വായിക്കാൻ കഴിയുമായിരുന്നെങ്കിലും ബോർഡുകളിൽ മറാഠി അക്കത്തിൽ എഴുതിയിരിക്കുന്ന കിലോ മീറ്റർ പിടി തന്നില്ല. മനസ്സിനൊത്ത നല്ലൊരു ഭക്ഷണശാല കണ്ടെത്താൻ ബുദ്ധിമുട്ടിയതിനാൽ വൈകിയാണ്​ പ്രഭാതഭക്ഷണം കഴിച്ചത്​. കയറിയ ​േഹാട്ടലിൽ ‘പൂവ’ എന്നു പറയുന്ന ഒരു വിഭവമാണ്​ ഉണ്ടായിരുന്നത്​.സംഗതി കാണാൻ നല്ല രസമുണ്ട്​. അവിൽ മഞ്ഞപ്പൊടി ഇട്ട്​ പുഴുങ്ങി എടുത്ത വിഭവമാണെന്ന്​ കണ്ടപ്പോൾ തോന്നി. ഞാൻ ഹോട്ടലിലേക്ക്​ കയറു​േമ്പാൾ ഒര​ു വലിയ ചെമ്പിൽ ഒരാൾ കുത്തിയിളക്കുന്നതു കണ്ടിരുന്നു. അത്​ ‘പൂവ’ ഉണ്ടാക്കുന്നതായിരിക്കുമെന്ന്​ ഉൗഹിച്ചു. മധുരവും പുളിയും എരിവും എല്ലാം കൂടിച്ചേർന്ന്​ രസമുകുളങ്ങളെ പൂവ ഇളക്കിമറിച്ചു.  കൂടെ ഒര​ു കോഫി കൂടി കഴ​ിച്ചിട്ടും 40 രൂപയേ ആയുള്ളു.

അവിൽ മഞ്ഞപ്പൊടി ഇട്ട്​ പുഴുങ്ങി എടുത്ത പൂവ മധുരവും പുളിയും എരിവും എല്ലാം കൂടിച്ചേർന്ന്​ രസമുകുളങ്ങളെ ഇളക്കിമറിച്ചു

 

സംസ്​ഥാന പാത കഴിഞ്ഞപ്പോൾ നാലുവരി പാതയായി. വഴിയിൽനിന്ന്​ ക്ഷീണമകറ്റാൻ കരിമ്പ്​ ജ്യൂസ്​. പ്രതീക്ഷിച്ച തുക ആയില്ല. കൊടുത്ത പണത്തിൽനിന്ന്​ ബാക്കിയായത്​ ജ്യൂസ്​ വിൽക്കുന്നയാളി​​​​​​െൻറ ചെറിയ മകൾക്കു കൊടുത്തപ്പോൾ അവളുടെ മുഖത്ത്​ പുഞ്ചിരി തെളിഞ്ഞു. ആ ചിരിവെളിച്ചത്തിൽ യാത്ര തുടർന്ന്​ വൈകാതെ ‘അഹമ്മദ്​ നഗർ’ എന്ന സ്​ഥലത്തേക്ക്​ റോഡ്​ തിരിഞ്ഞു. പിന്നെ ഏതാണ്ട്​ ഒരു 20 കിലോ മീറ്റർ പൊട്ടിപ്പൊളിഞ്ഞ റോഡും പൊടിയും. ശപിച്ചുകൊണ്ട്​ നല്ല റോഡ്​ തെളിയുമെന്ന വിശ്വാസത്തിൽ മുന്നോട്ട്​.

വെജിറ്റബിൾ പുലാവ്​ കഴിച്ചുകൊണ്ടിരിക്കുന്നതിനിടയിലാണ്​ ഹോട്ടലിനു പിന്നിലെ തണൽ മരം ശ്രദ്ധ ആകർഷിച്ചത്​

 

വണ്ടി നിർത്താൻ തണലുള്ള ഹോട്ടൽ തേടി നടന്ന്​ ഒരിടത്ത്​ എത്തി.​ വെജിറ്റബിൾ പുലാവ്​ കഴിച്ചുകൊണ്ടിരിക്കുന്നതിനിടയിലാണ്​ ഹോട്ടലിനു പിന്നിലെ തണൽ മരം ശ്രദ്ധ ആകർഷിച്ചത്​. മനോഹരമായ കാഴ്​ച. അൽപനേരം അതിനു ചുവട്ടിൽ വിശ്രമിച്ചു. യാത്രയിൽ അത്തരം വിശ്രമവേളകളിലേ മൊബൈൽ എടുത്ത്​ മെസേജുകളും ചാറ്റുകളും നോക്കാറുള്ളു. അല്ലാത്തപ്പോൾ ദിശ അറിയാൻ മാപ്പും ജി.പി.എസും അറിയാനും മാത്രമേ ഉപയോഗിക്കൂ.

സുഹൃത്ത​​ുക്കളുമായി ചില ചാറ്റുകൾ. ഞാൻ ഇങ്ങനെ ഒരു പിടിത്തംവിട്ട യാത്രക്കാരനായി മാറാൻ കാരണമായ ‘​ൈ​റഡേഴ്​സ്​’ എന്ന വാട്ട്​സാപ്പ്​ ഗ്രൂപ്പിനെക്കുറിച്ച്​ പറയാതിരിക്കാനാവില്ല. ആദ്യം ചെറിയ ചെറിയ ബൈക്ക്​ യാത്രകളിലൂടെ എന്നിൽ യാത്ര ലഹരി പിടിപ്പിച്ചുതന്നത്​ റൈഡേഴസ്​ ഗ്രൂപ്പിലെ അംഗം, തിരൂർ ഒാവുങ്ങൽ സ്വദേശിയായ ഇല്ല്യാസാണ്​. ചാറ്റിങും വിശ്രമവും അവസാനിപ്പിച്ച്​ എളുപ്പത്തിൽ യാത്ര തുടരാൻ കാരണം അടുത്ത വീട്ടിൽനിന്ന്​ നിർത്താതെ കുരച്ചുകൊണ്ട്​ എ​​​​​​െൻറ നേരേ വന്ന പട്ടിയാണ്​. വെയിലും പൊടിയും ക്ഷീണവും, ഇനി പട്ടിയുടെ കടിയും കൂടി കൊള്ളാൻ വയ്യ.

ശനി ഷിൻഗ്​നാപൂരിലെ വീടുകൾക്കും ലോഡ്​ജുകൾക്കുമൊന്നും കതകുകളില്ല

 

ഒൗറംഗബാദ്​ ലക്ഷ്യമാക്കിയ ബൈക്ക്​ ‘ശനി ഷിൻഗ്​നപൂരി’ൽ എത്തി. ഇതൊരു വിചിത്രമായ ഗ്രാമമാണ്​.വാതിലില്ലാത്ത ഒരു വീടോ കെട്ടിടമോ നമുക്ക്​ സങ്കൽപ്പിക്കാനാവുമോ...? കതകുകൾ  ഇല്ലാത്ത വീടുകളാണ്​ ഇൗ ഗ്രാമത്തിൽ. കതകുകൾ ഇല്ലെങ്കിലും സുരക്ഷാ പ്രശ്​നങ്ങൾ ഒന്നുമില്ലെന്നാണ്​ ഗ്രാമവാസികൾ പറയുന്നത്​. വീടു വെക്കു​ന്നതിനു മുമ്പ്​ കൂറ്റൻ മതിലു പണിയുന്ന മലയാളിക്ക്​ ഇത്​ അതിശയമായി തോന്നാം.
എല്ലാ സുരക്ഷയ​ും അവർ ശനി ദേവ​​െൻറ കൈകളിൽ ഏൽപ്പിച്ചിരിക്കുന്നു. ശനി ദേവ ക്ഷേത്രത്തിൽ ഭക്​തജനങ്ങളുടെ തിരക്ക്​ നന്നായി കാണാം.

ശനി ഷിൻഗ്​നപൂരിൽനിന്നും വീണ്ടും ബൈക്ക്​ ഒൗറംഗബാദ്​ റോഡിലേക്ക്​ കയറി. ഒൗറംഗബാദ്​ അടുക്കുന്തോറും തിരക്ക്​ കൂടി വന്ന​​ു. ഒാൺലൈൻ ബുക്കിങ്​ സൈറ്റിൽ ഹോളി ഒാഫറി​​​​​​െൻറ ഭാഗമായി കുറഞ്ഞ നിരക്കിൽ മികച്ച ഒരു റൂമിൽ താമസമുറപ്പിച്ച്​ ഒൗറംഗബാദിൽ ഇന്നത്തെ എ​​​​​​െൻറ യാത്ര അവസാനിപ്പിച്ചു.

                                                                                                                                                                                     (തുടരും......)