കോടമഞ്ഞിൻ കുളിരുമായി കാത്തിരിക്കുന്നു; ഡിസംബർ 20 മുതൽ പൊന്മുടിയിലേക്ക്​​ സ്വാഗതം

തിരുവനന്തപുരം: കോടമഞ്ഞിൻ കുളിരുമായി പൊന്മുടി സഞ്ചാരികളെ വരവേൽക്കാൻ ഒരുങ്ങുന്നു. വനം വകുപ്പിൻെറ നിയന്ത്രണത്തിലുള്ള പൊൻമുടി അപ്പർ സാനിറ്റോറിയം ഡിസംബർ 20ന് തുറക്കും. ദീർഘനാളത്തെ സഞ്ചാരികളുടെ ആവശ്യത്തെത്തുടർന്നാണ് തീരുമാനം. ഇതിനായുള്ള നടപടിക്രമങ്ങൾ പുരോഗമിക്കുകയാണ്​.

സംസ്​ഥാനത്തെ ടൂറിസം കേന്ദ്രങ്ങൾ ഒക്ടോബർ 12ന് സഞ്ചാരികൾക്കായി തുറന്നെങ്കിലും പൊൻ‌മുടിയിൽ പ്രവേശനമില്ലായിരുന്നു. ആദിവാസികൾ നേതൃത്വം നൽകുന്ന വനസംരക്ഷണ സമിതിക്കാണ് പ്രദേശത്തിൻെറ നിയന്ത്രണം. ഇവരുടെ തീരുമാനം ലഭിക്കാതിരുന്നതാണ് തടസ്സമായിരുന്നത്. കമ്മിറ്റിയുടെ ഉറപ്പ്​ ലഭിച്ചതോടെ​ വനം വകുപ്പ് സഞ്ചാരികളെ പ്രവേശിപ്പിക്കാൻ തീരുമാനിക്കുകയായിരുന്നു.

പൂർണമായും കോവിഡ് മാനദണ്ഡങ്ങൾ പാലിച്ചാകും പൊന്മുടിയിലേക്ക്​ പ്രവേശനം അനുവദിക്കുക. മാസ്‌ക്, സാനിറ്റൈസർ എന്നിവ നിർബന്ധമാണ്​. സാമൂഹിക അകലം പാലിക്കുകയും വേണം.

തിരുവനന്തപുരം ജില്ലയിലെ പ്രധാന വിനോദസഞ്ചാര കേന്ദ്രമാണ്​ പൊന്മുടി. തലസ്​ഥാന നഗരിയിൽനിന്ന്​​ 60 കിലോമീറ്റർ ദൂരമുണ്ട്​ ഇവിടേക്ക്​. അറബിക്കടലിന്​ സമാന്തരമായി പശ്ചിമഘട്ടത്തിൻെറ ഭാഗമായ പൊന്മുടിയിലെ കാലാവസ്ഥ വർഷത്തിൽ മിക്കവാറും തണുപ്പും മൂടൽമഞ്ഞും നിറഞ്ഞതാണ്. 22 ഹെയർപിൻ വളവുകൾ താണ്ടിയുള്ള യാത്രയും ഏറെ മനോഹരമാണ്​.

പൊന്മുടിക്ക് സമീപത്തായി കാടിനുള്ളിൽ ഒരുപാട് അരുവികളും വെള്ളച്ചാട്ടങ്ങളും നിലനിൽക്കുന്ന വിതുര ഗോൾഡൻ വാലിയും സഞ്ചാരികളെ ആകർഷിക്കുന്നു. വിതുര കല്ലാർ നദിയിലേക്കുള്ള കവാടവുമാണ് പൊന്മുടി. 2000 അടി ഉയരത്തിൽ നിൽക്കുന്ന അഗസ്ത്യകൂടമാണ് ഈ പ്രദേശത്തെ മറ്റൊരു ആകർഷണം. വിതുര മീൻ‌മുട്ടി വെള്ളച്ചാട്ടം, പൊന്മുടി കൊടുമുടിയുടെ സമീപത്തെ എക്കോ പോയിൻറ്​ എന്നിവയെല്ലാം സഞ്ചാരികളുടെ മനം മയക്കുന്നതാണ്​.