തമിഴകത്ത്​ അയോയുഗപ്പിറവി

ഇരുമ്പ്​ യുഗം ആരംഭിച്ചത്​ തമിഴ്​നാട്ടിലാണോ? ഇരുമ്പിന്‍റെ ഉപയോഗം സംബന്ധിച്ച്​ ഇന്നേവരെയുള്ള കണ്ടെത്തലിനേക്കാൾ ഒന്നര സഹസ്രാബ്ദത്തിലേറെ മുമ്പ്​ തമിഴ്​നാട്ടിൽ ഇരുമ്പ്​ ഉപയോഗിച്ചിരുന്നോ? പുതിയ കണ്ടെത്തലുകളെക്കുറിച്ച്​ എഴുതുകയാണ്​ മാധ്യമം പത്രാധിപസമിതി അംഗംകൂടിയായ ലേഖകൻ. പുതിയ ഉദ്​ഖനനം നടക്കുന്ന മേഖലകൾ സന്ദർ​ശിച്ച ശേഷമാണ്​ ഇൗ ​റിപ്പോർട്ട്​ തയാറാക്കിയത്​.

ഇരുമ്പിന്‍റെ ഉപയോഗത്തെ സൂചിപ്പിക്കുന്ന സംഘകാല കൃതിയായ നട്രിനൈയിലെ ഈ വരികൾ ഉദ്ധരിച്ചാണ്​ തമിഴകത്തെ ഇരുമ്പുയുഗപ്പിറവിയുടെ പ്രഖ്യാപനം മുഖ്യമന്ത്രി എം.കെ. സ്റ്റാലിൻ നടത്തിയത്​.

* * *

ദ്രാവിഡപ്പഴമയും പെരുമയും ഉയർത്തിപ്പിടിക്കുന്നതിനുള്ള ഒരവസരവും തമിഴ്​നാട്​ മുഖ്യമന്ത്രി എം.കെ. സ്റ്റാലിൻ പാഴാക്കാറില്ല. ചരിത്രവും സംസ്കാരവും മുതൽ പുരാവസ്തു ഗവേഷണ രംഗം വരെ എന്തും അദ്ദേഹത്തിന്​ ആയുധങ്ങളാണ്​. വേദസംസ്കാരത്തിനപ്പുറം ദ്രാവിഡമാണ്​ ഇന്ത്യയു​ടെ ആത്മാവും ആധാരവു​മെന്ന കേവലവാദം ആവർത്തിക്കുക മാത്രമല്ല, അതിനുള്ള തെളിവുകൾ നിരത്തുന്നതിൽ ബദ്ധശ്ര​ദ്ധനുമാണ്​ അദ്ദേഹം. ഈ വർഷം തുടങ്ങി ആദ്യ മൂന്നാഴ്​ചക്കുള്ളിൽ രണ്ടുതവണയാണ്​ ഈ വിഷയത്തിൽ സ്റ്റാലിൻ മാധ്യമങ്ങൾക്ക്​ മുന്നിലെത്തിയത്​. ലോകം ഉറ്റുനോക്കിയ രണ്ടു പ്രഖ്യാപനങ്ങൾക്കായിരുന്നു അത്​.

ജനുവരി അഞ്ചിന്​ സിന്ധുനദീതട സംസ്കാരം കണ്ടെത്തിയതിന്‍റെ നൂറാം വാർഷികം കൊണ്ടാടുന്നതിന്‍റെ ഭാഗമായി സംഘടിപ്പിച്ച ത്രിദിന സമ്മേളനം ഉദ്​ഘാടനംചെയ്യവെയായിരുന്നു​ ആദ്യ പ്രഖ്യാപനം. ഒരു നൂറ്റാണ്ടായി ചരിത്രത്തിന്​ മുന്നിൽ പ്രഹേളികയായി തുടരുന്ന സിന്ധുനദീതട സംസ്​കാരത്തിലെ ലിപി വായിക്കുന്നവർക്ക്​ ഒരു ദശലക്ഷം ഡോളറിന്‍റെ സമ്മാനമായിരുന്നു അത്​. ‘‘സിന്ധുനദീതടത്തിൽ ഒരുകാലത്ത്​ പുഷ്​കലമായിരുന്ന എഴുത്ത്​ രീതിയെ ഇന്നും നമുക്ക്​ വ്യക്തമായി വായിച്ചെടുക്കാൻ കഴിഞ്ഞിട്ടില്ല. പുരാവസ്തു ശാസ്ത്രജ്​ഞരുടെയും ഭാഷാഗവേഷകരുടെയും അതികഠിനമായ പരിശ്രമങ്ങളെല്ലാം ഈ സമസ്യക്ക്​ മുന്നിൽ നിഷ്ഫലമാകുകയായിരുന്നു. അതിനാൽ, പുരാവസ്തു ഗവേഷകർക്ക്​ ബോധ്യമാകുന്ന നിലയിൽ ഈ ലിപിയുടെ കെട്ടഴിക്കാൻ സാധിക്കുന്ന വ്യക്തികൾ, സ്ഥാപനങ്ങൾ അങ്ങനെ ആർക്കും ഒരു ദശലക്ഷം യു.എസ്​ ഡോളറിന്‍റെ സമ്മാനം ഞാൻ പ്രഖ്യാപിക്കുകയാണ്​’’ –സ്റ്റാലിൻ പറഞ്ഞു.

മുഖ്യമന്ത്രിയെന്ന നിലയിലും ഡി.എം.കെയുടെ അധ്യക്ഷനായും സ്റ്റാലിൻ തുടരുന്ന നിലപാടുകളുടെ ആവർത്തനമായിരുന്നു പിന്നീടുള്ള വാക്കുകൾ: ‘‘തമിഴ്​നാടോ തമിഴ്​ ഭാഷയോ കൂടാതെ ഇന്ത്യൻ ഉപഭൂഖണ്ഡത്തിന്‍റെ ചരിത്രം എഴുതാൻ കഴിയില്ല. രാജ്യചരിത്രത്തിൽ തമിഴ്​നാടിന്​ അതിന്‍റെ ശരിയായ സ്ഥാനം ഉറപ്പാക്കാനാണ്​ സംസ്ഥാന സർക്കാർ പരിശ്രമിക്കുന്നത്​. സിന്ധു നദീതടത്തിൽ കാളകളുണ്ടായിരുന്നു. ദ്രാവിഡ ചിഹ്നമാണ്​ കാളകൾ. അങ്ങ്​ സിന്ധുനദീതടം മുതൽ ഇവിടെ അലങ്കനല്ലൂരിൽ (മധുരക്ക്​ അടുത്തുള്ള ജല്ലിക്കട്ടിന്​ പ്രശസ്തമായ ഗ്രാമം) വരെ കാളയുടെ സാന്നിധ്യം വ്യാപിച്ചുകിടക്കുന്നു. പൗരാണിക തമിഴ്​ സാഹിത്യത്തിൽ ജല്ലിക്കട്ടിനെ കുറിച്ചുള്ള പരാമർശങ്ങളുണ്ട്​. സിന്ധുനദീ തട സംസ്കാരത്തിൽ മനുഷ്യൻ കാളയെ മെരുക്കാൻ ശ്രമിക്കുന്ന മുദ്രണങ്ങളുണ്ട്​.’’

തമിഴകത്തെ ആധാരമാക്കി ഇന്ത്യയുടെ ചരിത്രമെഴുതുന്നതിന്​ ഉതകുന്ന ശാസ്​ത്രീയ തെളിവുകൾ സമാഹരിക്കുകയാണ്​ തന്‍റെ സർക്കാറിന്‍റെ ദൗത്യമെന്ന്​ 2021ൽ അധികാരമേറ്റതു മുതൽ സ്റ്റാലിൻ ആവർത്തിക്കുന്നതാണ്​. അതിനുള്ള അധ്വാനവും പണവും ചെലവഴിക്കുന്നതിലും സ്റ്റാലിന്​ മടിയേതുമില്ല. സിന്ധുനദീതട ലിപി വായിക്കുന്നതിന്​ സമ്മാനം പ്രഖ്യാപിച്ചതിന്​ മൂന്നാഴ്ച തികയുന്നതിനുമുമ്പേ, ജനുവരി 23ന്​ സ്റ്റാലിൻ വീണ്ടും ലോകത്തെ ഞെട്ടിച്ചു. ഇത്തവണ പക്ഷേ, മാനവ സംസ്കൃതിയുടെ വികാസ പരിണാമങ്ങളെ കുറിച്ചുള്ള ഇതുവരെയുള്ള ധാരണകളെ മൊത്തം മാറ്റിയെഴുതുന്ന പ്രഖ്യാപനമായിരുന്നു.

ഇരുമ്പ്​ യുഗം ആരംഭിച്ചത്​ തമിഴ്​നാട്ടിലാണ്. ഇരുമ്പിന്‍റെ ഉപയോഗം സംബന്ധിച്ച്​ ഇന്നേവരെയുള്ള കണ്ടെത്തലിനേക്കാൾ ഒന്നര സഹസ്രാബ്​ദത്തിലേറെ മുമ്പ്​ തമിഴ്​നാട്ടിൽ ഇരുമ്പ്​ ഉപയോഗിച്ചിരിക്കുന്നു. തൂത്തുക്കുടിയിലെ ശിവകല, തിരുനെൽവേലിയിലെ ആദിച്ചനല്ലൂർ, കൃഷ്ണഗിരിയിലെ മയിലാടുംപാറൈ, സേലത്തെ മങ്കാട്, തിരുവണ്ണാമലൈയിലെ കിൽനമണ്ടി എന്നിവിടങ്ങളി​ൽനിന്ന്​ ഉദ്​ഖനനത്തിൽ ലഭിച്ച ലോഹഭാഗങ്ങളുടെ വിദഗ്​ധ ശാസ്ത്രീയ പരിശോധനയാണ്​ ഈ നിഗമനത്തിലെത്താൻ തമിഴ്​നാട്​ ആർക്കിയോളജി വകുപ്പിനെ സഹായിച്ചത്​.

മുഖ്യമന്ത്രിയെന്ന രാഷ്ട്രീയക്കാരനാണ്​ അക്കാദമിക പ്രാധാന്യമുള്ള പ്രഖ്യാപനം നടത്തിയതെങ്കിലും ഇതിനായി ആശ്രയിച്ച പരിശോധനകളും അതിലെ നിഗമനങ്ങളും കുറ്റമറ്റതായിരുന്നു. ഇതുപ്രകാരം ശിവകലയിൽനിന്ന്​ ലഭിച്ച ​ഇരുമ്പിന്‍റെ മൂന്നു സാമ്പിളുകളുടെ പഴക്കം ബി.സി 3345 വരെ നീളുന്നു. അതായത്​ ആകെ 5300ൽ ഏറെ വർഷം പഴക്കം. വടക്കൻ ഈജിപ്തിലെ അൽഗിർസയിലുള്ള ശവക്കല്ലറകളിൽനിന്ന്​ 1911ൽ കണ്ടെത്തിയ ലോഹകഷണങ്ങളാണ്​ ഇന്നേവരെ ലഭ്യമായ ഏറ്റവും പഴക്കമുള്ള ഇരുമ്പ്​. അതിന്‍റെ പഴക്കം ബി.സി 3400. പക്ഷേ, ഈ ഇരുമ്പ്​ ഉൽക്കാപതനത്തിന്‍റെ ഭാഗമായ അഭൗമ വസ്തുവാണ്​. ഭൂമിയിലെ അയിര്​ സ്ഫുടംചെയ്തുള്ള ഇരുമ്പിൽ ഇതുവരെ കിട്ടിയതിൽ ഏറ്റവും പഴക്കമുള്ളത്​ തുർക്കിയിലെ അനത്തോലിയയിലാണ്​. ബി.സി 1300ലാണ്​ ഇവിടെനിന്ന്​ കിട്ടിയ ഇരുമ്പിന്‍റെ പഴക്കം. അയിര്​ സ്ഫുടംചെയ്ത്​ ഇരുമ്പുണ്ടാക്കുന്ന വിദ്യ അനത്തോലിയയിൽനിന്നാണ്​ ലോകത്തിന്‍റെ മറ്റിടങ്ങളിലേക്ക്​ വ്യാപിച്ചതെന്നായിരുന്നു ഇതുവരെയുള്ള നിഗമനം.

ഇന്ത്യയിൽ ഇ​രുമ്പ്​ യുഗം തുടങ്ങിയത്​ ബി.സി 1000ന്​ അടുത്താണെന്നായിരുന്നു കുറച്ചുമുമ്പു വരെയുള്ള ധാരണ. അടുത്തിടെ യു.പിയിലെ അക്​തയി​ലും തെലങ്കാനയിലെ ക​ച്ചിഗുഡയിലും നടത്തിയ ഉദ്​ഖനനങ്ങളിൽ ഈ കാലഗണനയെ പിന്നിലാക്കുന്ന തെളിവുകൾ ലഭിച്ചിരുന്നു. എന്നാൽ, ഈ മുൻധാരണയെയൊക്കെ അപ്രസക്തമാക്കുന്നതാണ്​ തമിഴ്​നാട്ടിലെ കണ്ടെത്തൽ. ‘‘ഇന്ത്യയുടെ ചരിത്രം ഇവിടെനിന്നാണ്​ (തമിഴ്​നാട്) തുടങ്ങേണ്ടത്​. നമ്മുടെ ദ്രവീഡിയൻ മോഡൽ സർക്കാറിന്‍റെ അതിശ്രദ്ധാപൂർവമായ ഇടപെടലുകളുടെ ഫലമായി നമ്മുടെ പൗരാണിക സാഹിത്യങ്ങളിൽ എഴുതിയതൊക്കെയും ഇതാ ശാസ്ത്രീയമായി തെളിയിക്കപ്പെട്ടിരിക്കുന്നു. തമിഴ്​ കുലത്തിനും തമിഴ്​നാടിനും തമിഴകത്തിനും ഇത്​ അഭിമാനമാണ്​. മാനവരാശിക്കുള്ള തമിഴകത്തിന്‍റെ ഉപഹാരമാണിതെന്ന്​ നമുക്ക്​ സാഭിമാനം പറയാം’’ –സ്റ്റാലിൻ പിന്നീട്​ ട്വിറ്ററിൽ കുറിച്ചു.

പൊരുനൈ തീരം വഴി ശിവകലയിലേക്ക്​

തിരുനെൽവേലി-തിരുച്ചെന്തൂർ സംസ്ഥാന പാതയിൽ തണൽവിരിക്കുന്ന വടവൃക്ഷങ്ങൾക്കും കാറ്റിലുലയുന്ന വാഴത്തോപ്പുകൾക്കും അപ്പുറം താമ്രപർണിയെന്ന മഹാനദി. താമ്രപർണിയെന്നു പറഞ്ഞാൽ തമിഴ്​ സാംസ്കാരികതയുടെയും ​ചരിത്രത്തിന്‍റെയും ആവേശത്തിലമരുന്ന പുതിയ തലമുറക്ക്​ ചിലപ്പോൾ ദഹിക്കില്ല. ‘പൊരുനൈ’ എന്ന്​ തന്നെ പറയണം.

അങ്ങകലെ​ പൊതികൈ മലയിലെ അസ്ത്യാർകൂടത്തുനിന്ന്​ ഉത്ഭവിച്ച്​ തിരുനെൽവേലി, തൂത്തുക്കുടി ജില്ലകളിലൂടെ ഒ​ഴുകി മാന്നാർ ഉൾക്കടലിൽ ചെന്നുചേരുന്ന താമ്രപർണിക്ക്​ സംഘസാഹിത്യത്തിൽ പേര്​ ​​‘പൊരുനൈ’യെന്നാണ്​. താമ്രപർണിയെന്ന പേരിന്​ ആയിരം വർഷത്തെയൊക്കെ പഴക്കമേയുള്ളുവത്രെ. വൈഗയെയും കാവേരിയെയുംപോലെ ഒരുപക്ഷേ, അതിനെക്കാളൊക്കെ ചരിത്രം പേറുന്ന മഹാനദിക്ക്​ അതിന്‍റെ തനതു തമിഴ്​നാമം തന്നെ വേണമെന്ന്​ തമിഴർ ശഠിക്കുന്നു. പൊരുനൈ തടത്തിലെ ശ്രീവൈകുണ്​ഠത്തെ ശ്രീ കുമാര ഗുരുപര സ്വാമികൾ ഹയർസെക്കൻഡറി സ്കൂളിലെ ചരിത്രാധ്യാപകനായ മാണിക്കത്തിന്‍റെ വാക്കുകളിൽ ‘പൊരു​നൈ’ എന്ന്​ ഉപയോഗിക്കാത്തവർ ഈ കാലഘട്ടത്തിന്‍റെ വൈകാരിക പരിസരത്തിന്​ ചേരാത്തവരാണ്​.

നമ്മുടെ കഥയിൽ ഈ മാണിക്കം നിർണായക ഘടകമാണ്​. അതിലേക്ക്​ വരുന്നതിനുമുമ്പ്​ വീണ്ടും തിരുച്ചെന്തൂർ റോഡിലേക്ക്​. പുളിയംകുളം കഴിഞ്ഞാൽ റോഡിന്‍റെ ഇരുവശങ്ങളിലും പച്ചനിറത്തിലുള്ള ലോഹവേലി​. ഇന്ത്യയിലെ ഏറ്റവും പഴക്കമേറിയ പുരാവസ്തു ഖനനകേന്ദ്രങ്ങളിലൊന്നായ ആദിച്ചനല്ലൂർ സൈറ്റാണത്​. റോഡിന്‍റെ ഇരു പാർശ്വങ്ങളിലുമായി 114 ഏക്കർ സ്ഥലത്താണ്​ ആർക്കിയോളജിക്കൽ സർവേ ഓഫ്​ ഇന്ത്യയുടെ (എ.എസ്​.ഐ) നിയന്ത്രണത്തിലുള്ള ഉദ്​ഖനന മേഖല. റോഡിന്‍റെ ഇടതുവശത്തെ വളപ്പിലേക്ക്​ കയറിയാൽ വലിയൊരു ഓലപ്പന്തൽ. പന്തലിനപ്പുറം പൊരുനൈ നദി സ്വച്ഛമായി ഒഴുകുന്നു. അങ്ങേക്കരയിൽ നദിയുടെ യഥാർഥ വലുപ്പം വ്യക്തമാക്കുന്ന മണൽപ്പരപ്പിനും അപ്പുറം പച്ചപുതച്ച വള്ളനാട്​ കുന്നുകളുടെ കാഴ്​ചയാകും കണ്ണിലാദ്യം തടയുക.

അതും നോക്കി നിൽക്കുമ്പോൾ എ.എസ്​.ഐയുടെ താൽക്കാലിക ജീവനക്കാരൻ ഗജാ ഓലപ്പന്തലിനുള്ളിലേക്ക്​ ക്ഷണിച്ചു. മാനവചരിത്രത്തെ കുറിച്ച ഇതുവരെയുള്ള ധാരണകളെ തിരുത്തിയെഴുതുന്ന മഹത്തായ ഭൂമികയിലേക്കുള്ള ക്ഷണമാണ്​. ഇരുമ്പുയുഗത്തിന്‍റെ തുടക്കം തമിഴകത്താണെന്ന്​ മുഖ്യമന്ത്രി എം.കെ. സ്റ്റാലിൻ പ്രഖ്യാപിക്കു​മ്പോൾ അതിന്​ കരുത്തായത്​ ആദിച്ചനല്ലൂരിലെ കണ്ടെത്തലുകളുമാണ്​. സംഭവബഹുലമായ ആദിച്ചനല്ലൂരിന്‍റെ ആർക്കിയോളജി ചരിത്രത്തിലെ ഏറ്റവും ഒടുവിലത്തെ ഉദ്​ഖനനങ്ങളിൽ (2021-22, 2022-23) വാളുകൾ, കഠാരകൾ, കുന്തങ്ങൾ, അസ്ത്രമുനകൾ, ചാട്ടുളികൾ തുടങ്ങിയ ലോഹവസ്തുക്കൾ കണ്ടെത്തിയിരുന്നു.

ട്രഞ്ച്​ നമ്പർ 17ലെ നാലാം പാളിയിൽ 220 സെന്‍റിമീറ്റർ താഴ്​ചയിൽ കണ്ടെത്തിയ ഇരുമ്പുവസ്തുവിന്‍റെ പരിശോധനയുടെ ഫലമാണ്​ 2517-2613 ബി.സിയിലേക്ക്​ ഇരുമ്പുയുഗത്തിന്‍റെ ഉദയത്തെ വലിച്ചുകൊണ്ടുപോകുന്നത്​. അതായത്​ ബി.സി മൂന്നാം സഹസ്രാബ്​ദത്തിന്‍റെ പകു​തിയിലേക്ക്​. ഇന്നത്തെ തുർക്കിയയിൽ നിലനിന്ന ഹിറ്റൈറ്റ്​ സാമ്രാജ്യത്തിന്‍റെ കാലത്താണ്​ ആദ്യമായി ഇരുമ്പ്​ ഉപയോഗിക്കാൻ തുടങ്ങിയതെന്നായിരുന്നു​ ഇതുവരെയുള്ള നിഗമനം. അവിടെ കണ്ടെത്തിയ ഇരുമ്പിന്‍റെ പഴക്കമാകട്ടെ, ബി.സി 1380 ആണ്​. ആദിച്ചനല്ലൂരുമായി തട്ടിച്ചുനോക്കു​മ്പോൾപോലും അനത്തോലിയയിലെ ഹിറ്റൈറ്റ്​ സൈറ്റിൽനിന്ന്​ കിട്ടിയ ഇരുമ്പ്​ ആയിരത്തോളം വർഷം പിന്നിലാണ്​.

പക്ഷേ, കഥ അവിടെയും തീരുന്നില്ല. ആദിച്ചനല്ലൂരിൽനിന്ന്​ 14 കിലോമീറ്റർ കിഴക്കുമാറി ​പൊരുനൈയുടെ ഇടത്തേക്കരയിലെ ശിവകലയിൽ ചരിത്രം മറ്റൊരു വിസ്മയം രചിക്കുന്നു. അവിശ്വസനീയമാം വണ്ണം വിസ്തൃതമായ ജലരാശിക്ക്​ നടുവിലാണ്​ ശിവകലയെന്ന ചുവപ്പുമണ്ണിന്‍റെ ഭൂമി. പൊരുനൈക്ക്​ കു​റുകേയുള്ള ശ്രീവൈകുണ്ഠം ഡാം കടന്ന്​ പേരൂർകുളത്തിന്​ കരയിലൂടെ വേണം ശിവകല തടാകത്തിനും പെരുകുളം തടാകത്തിനും മധ്യേയുള്ള വിചിത്ര പ്രകൃതിയിലേക്ക്​ കടന്നെത്താൻ. ചുവന്ന മണ്ണ്​. കാര്യമായി ചെടികൾപോലും വളരാത്ത പ്രദേശം. ഒറ്റപ്പെട്ട മരങ്ങൾ. അതും ഉയരം കുറഞ്ഞത്​.

പ്രത്യേകതരം വെളുത്ത, തിളങ്ങുന്ന കല്ലുകളാണ്​ എങ്ങും. ഈ കല്ലുകൾക്ക്​ ചില പ്രത്യേകതകളുണ്ട്​. പടക്ക, വെടിമരുന്ന്​ നിർമാണത്തിന്​ ഇത്​ ഉപയോഗിക്കുന്നു​. വെടിമരുന്നിനൊപ്പം പൊടിച്ചുചേർക്കും. വെടിക്കെട്ടിന്​ വർണഭംഗി പകരാൻ ഈ കല്ലിന്​ കഴിയുമത്രെ. തൊട്ടാൽ തണുപ്പാണെങ്കിലും കടുത്ത സൂ​ര്യപ്രകാശത്തിന്‍റെ ചൂടിനെ പരിസരത്തേക്ക്​ ഇ​രട്ടിയിരട്ടിയായി ഇത്​ പ്രസരിപ്പിക്കും. ഇവിടെങ്ങും ചെടിയും മരങ്ങളും വളരാത്തതിന്​ കാരണമതാണെന്ന്​ നാട്ടുകാർ പറയുന്നു. വിളിപ്പാടകലെ തടാകക്കരയിലുള്ള പ്രകൃതിയുടെ ഹരിതാഭയൊന്നും ഇവിടെയില്ല. കത്തിക്കാളുന്ന വെയിലിൽനിന്ന്​ വേഗം ശിവകല പറമ്പിലെ ടിൻഷീറ്റ്​ ഷെഡിന്‍റെ തണലിലേക്ക്​ കയറി.

പ്രദേശവാസിയായ നടരാജനാണ്​​ ലോകം വിസ്മയത്തോടെ വായിച്ചറിഞ്ഞുകൊണ്ടിരിക്കുന്ന ശിവകല പുരാഭൂമിയുടെ കാവൽക്കാരൻ. അഞ്ചര സഹസ്രാബ്​ദത്തിന്‍റെ അതിപ്രൗഢമായ ചരിത്രത്തിനാണ്​ കാവൽനിൽക്കുന്നതെന്ന ഗർവൊന്നും നടരാജനില്ല. ഇതുവരെ കണ്ടെത്തിയതിനേക്കാളും വലുതെന്തോ ഈ ചുവന്ന മണ്ണിന്‍റെ അടരുകൾക്കുള്ളിൽ ഉണ്ടെന്ന പ്രതീക്ഷകൾ ശേഷിപ്പിച്ചാണ്​ ശിവകലയിലെ മൂന്നാംഘട്ട ഉദ്​ഖനനം രണ്ടുവർഷം മുമ്പ്​ അവസാനിപ്പിച്ചത്. അന്നത്തെ കണ്ടെത്തലുകളാണ്​ ഇരുമ്പുയുഗ ചരിത്രത്തെ ബി.സി 5300ലേക്ക്​ കൂട്ടിക്കൊണ്ടുപോയത്​.

ഉദ്​ഖനനം കഴിഞ്ഞ ഗർത്തങ്ങൾക്ക്​ മുകളിലാണ്​ വിശാലമായ ഷെഡ് നിർമിച്ചിരിക്കുന്നത്. അടച്ചുപൂട്ടിയ ഷെഡിന്​ ഉള്ളിലേക്ക്​ കയറുമ്പോൾ മണ്ണിന്‍റെ ആദിമഗന്ധം. രണ്ടുതട്ടുകളിലായി 12 സമചതുര ഗർത്തങ്ങൾ. പല ഗർത്തങ്ങളിലും അവിടെനിന്ന്​ ലഭിച്ച മൺപാനകൾ. പലതും ഇളക്കിയെടുത്തിട്ടില്ല. ഒരേസമയം അനുഗ്രഹവും ശാപവുമാണ്​ മൺപാനകളെന്ന്​ പുരാവസ്തു ഗവേഷകർ പറയും. ഒരിടത്ത്​ ഖനനം തുടങ്ങുമ്പോൾ ആദ്യമൊക്കെ പാനകളുടെ കാഴ്ച ആവേശം സൃഷ്ടിക്കും. പക്ഷേ, ആദിച്ചനല്ലൂരും ശിവകലയും കീഴടിയുമൊക്കെ പോലെ വലിയ സൈറ്റുകളിൽനിന്ന്​ ലഭിക്കുന്ന അസംഖ്യം പാനകൾ പിന്നീട്​ ഭാരമാകും. അങ്ങനെ നിരവധി പാനകൾ ശിവകലയിലെ ഖനന ഗർത്തങ്ങളിൽതന്നെ സൂക്ഷിച്ചിരിക്കുകയാണ്. ചിലതൊന്നും മണ്ണിൽനിന്ന്​ പൂർണമായും ഇളക്കിയെടുത്തിട്ടുമില്ല.

ശിവകലയിലും പരിസരത്തുമായി എട്ടിടങ്ങളിലാണ്​ ഖനനം നടന്നത്​. അതിൽ മൂന്നിടങ്ങൾ ശ്മശാനഭൂമിയും ബാക്കിയുള്ളവ വാഴ്വിടങ്ങളുമാണ്​. നാമിപ്പോൾ നിൽക്കുന്ന ശിവകല പറമ്പ്​ എന്ന 500 ഏക്കറിൽ വ്യാപിച്ചുകിടക്കുന്ന ശ്മശാന ഭൂമിയാണ്​. ഇരുമ്പുയുഗം മുതൽ ഈയടുത്തുവരെയും ഇവിടെ മനുഷ്യരെ സംസ്കരിച്ചിരുന്നുവെന്നതിന്​ ഒറ്റകാഴ്ചയിൽ തന്നെ തെളിവുണ്ട്​. ഷെഡിനുള്ളിലെ ഖനന ഗർത്തങ്ങൾക്ക്​ നടുവിൽ ഉയർന്നുനിൽക്കുന്ന വെള്ളയടിച്ച ക്രിസ്ത്യൻ ശവകുടീരങ്ങൾ. കെട്ടിപ്പൊക്കിയ രണ്ട്​ വലിയ കല്ലറകളും ഒരെണ്ണം തറനിരപ്പിലും. ഷെഡിന്​ പുറത്ത്​ ശിവകല പറമ്പിലെ മറ്റൊരു കല്ലറയിൽ, അവിടെ അടക്കിയ ജാനറ്റ്​ റാണിയുടെ മരണദിനം രേഖപ്പെടുത്തിയിട്ടുണ്ട്​; 22.04.2009. സ്മാരകശിലയിൽ ഒരു ബൈബിൾ വാക്യവും: ‘‘ദൈവത്തിന്‍റെയും മനുഷ്യരുടെയും പ്രീതിക്ക്​ പാത്രമായവർ.’’ ക്രിസ്ത്യാനികളെ മാത്രമല്ല, വിവിധ ഹിന്ദുവിഭാഗക്കാരെയും ഈ തരിശുനിലത്തിൽ അടക്കിയിട്ടുണ്ട്​.

ശിവകല പറമ്പിൽ മാത്രം രണ്ടിടത്തായി 17 കുഴികളാണ്​ കുഴിച്ചത്​. മറ്റിടങ്ങളിലെ ഏഴെണ്ണം ഉൾപ്പെടെ 24 എണ്ണം. വിവിധ വലുപ്പത്തിലുള്ള 160 മൺപാനകളാണ്​ മൊത്തം ലഭിച്ചത്​. കൂടിയ ഉയരം 115 സെന്‍റിമീറ്റർ. കുറഞ്ഞത്​ 65 സെ.മീ. ചിലതിനൊക്കെ മേൽമണ്ണിന്‍റെ സമ്മർദത്താൽ കാലാന്തരത്തിൽ വിള്ളൽ വീണിട്ടുണ്ടായിരുന്നു. മിക്കതിന്‍റെയും മേൽമൂടി ഭദ്രമായി അടച്ചനിലയിലായിരുന്നു. ഇ​രുമ്പ്​ വസ്തുക്കൾ മൺപാനക്കുള്ളിൽനിന്നും പുറത്തുനിന്നും ലഭിച്ചു. കഠാര, അസ്ത്രമുന, മോതിരം, ഉളി, കോടാലി, വാൾ തുടങ്ങി 85 ഇരുമ്പ്​ വസ്തുക്കളാണ്​ കിട്ടിയത്​. പ്രത്യേകം ശ്ര​ദ്ധയാകർഷിക്കുന്നവയാണ് A2 നമ്പർ കുഴിയിൽനിന്ന്​ കിട്ടിയ മൂന്നു മൺപാനകൾ​.

ഭദ്രമായി മൂടിയ നിലയിൽ കണ്ടെത്തിയ ഈ പാനകൾക്കുള്ളിൽനിന്ന്​ മനുഷ്യാസ്ഥികൾ, ഇ​രുമ്പുവസ്തുക്കൾ, നെല്ല്​ എന്നിവ കണ്ടെത്തി. ഈ നെല്ലിന്‍റെ കാർബൺ ഡേറ്റിങ്​ ഫലം ബി.സി 1155 ആണ്​ കാണിച്ചത്​. ഈ ഫലത്തിൽ ഉത്തേജിതരായ ഗവേഷകർ സമീപത്തെ വാഴ്വിട മേഖലയായ വളപ്പാലൻപിള്ള തിരടിലെ A1 കുഴിയിൽനിന്ന്​ ലഭിച്ച മരക്കരിയുടെ സാമ്പിളും മറ്റ്​ ഇ​രുമ്പ്​ വസ്തുക്കളും പരിശോധനക്കയച്ചു. അതിലാണ്​ ഇരുമ്പിന്‍റെ പഴക്കം ബി.സി 2953 -ബി.സി 3345 കാലമാണെന്ന്​ തെളിഞ്ഞത്​. അങ്ങനെയാണ്​ തമിഴകത്ത്​ ഇരുമ്പിന്‍റെ ഉപയോഗം ബി.സി നാലാം സഹസ്രാബ്ദത്തിന്‍റെ ആദ്യപാദത്തിലേക്ക്​ നീളുന്നുവെന്ന നിഗമനത്തിലെത്തിയത്​.

ലോകത്തെ സംബന്ധിച്ചിടത്തോളം അതിമഹത്തായ കണ്ടെത്തലാണിതെന്ന്​ കേരള കൗൺസിൽ ഓഫ്​ ഹിസ്​റ്റോറിക്കൽ റിസർച്​ മുൻ ഡയറക്ടർ ഡോ. പി.ജെ. ചെറിയാൻ വ്യക്തമാക്കി. ‘‘മാനവകുലത്തിന്‍റെ പരിണാമം, സാ​ങ്കേതിക വികാസം എന്നിവയെ കുറിച്ചുമുള്ള ധാരണകളെ ചോദ്യം ചെയ്യുന്നതും ​ ദീർഘകാലമായി നിലനിൽക്കുന്ന ആഖ്യാനങ്ങളിൽ പുനർവായന ആവശ്യപ്പെടുന്നതുമാണ്​ ഇത്​. മാനവചരിത്രത്തെ പാലിയോലിത്തിക്​, മെസോലിത്തിക്, നിയോലിത്തിക്​, ചാൽകോലിത്തിക്​, അയൺ ഏജ്​ എന്നിങ്ങനെ വേർതിരിക്കുന്ന ഗോർഡൺ ചൈൽഡിന്‍റെ ചട്ടക്കൂട്​ സമഗ്രവും വസ്തുനിഷ്ഠവുമാണെന്ന ധാരണയാണ്​ നിലനിൽക്കുന്നത്​.​

രേഖീയമായ ഈ വർഗീകരണത്തിൽ പുനരാലോചനക്കുള്ള സമയമാണോ ഇത്​? മാനവകുലത്തിന്‍റെ പ്രത്യഭിജ്ഞാന, സാംസ്കാരിക വികാസം ഒരിക്കലും ഏകമുഖമായ, ​സാർവലൗകിക ഗതിക്ക്​ അനുസരിച്ചായിരുന്നില്ല. സാ​ങ്കേതിക, ഭൗതിക പുരോഗതി അസമമായ, പലപ്പോഴും അപ്രവചനീയമായ പാതകളിലാണ്​ സംഭവിച്ചത്​. പ്രാദേശിക വിഭവങ്ങൾ, കാലാവസ്ഥ, പരിസ്ഥിതി, ഇടപെടലുകൾ എന്നിവയെല്ലാം ഇതിൽ പങ്കുവഹിക്കുന്നു.

വികാസപരിണാമം സംബന്ധിച്ച ലളിത വ്യാഖ്യാനങ്ങ​ളോട്​ മാനവചരിത്രത്തിന്‍റെ സങ്കീർണത പ്രതിരോധം തീർക്കുകയാണ്​. കുറഞ്ഞത്​, കാലഗണനാപരമായ വികാസചക്രങ്ങൾ പലപ്പോഴും അതിക്രമിക്കുന്നുണ്ടെന്ന്​ നാം തിരിച്ചറിയണം. ചരിത്രത്തിന്‍റെ അഗാധതകളിലേക്കുള്ള പ്രയാണത്തിൽ തമിഴ്​നാട്​ സ്വീകരിക്കുന്ന ബഹുവിഷയക, സഹകരണ സമീപനം ഒരു അമൂല്യ മാതൃകയാണ്​. നഷ്ട ഭൂതകാലത്തിന്‍റെ തെളിവിലധിഷ്ഠിതമായ, ശാസ്ത്രീയ പുനർനിർമാണത്തിൽ തമിഴ്​നാട്​ ആർക്കിയോളജി വകുപ്പ്​ പുത്തൻ മാനദണ്ഡങ്ങൾ സൃഷ്ടിക്കുകയാണ്​’’ –ഡോ. ചെറിയാൻ വ്യക്തമാക്കി. ഇരുമ്പുയുഗത്തിന്‍റെ പ്രഖ്യാപനവുമായി ബന്ധപ്പെട്ട്​ തമിഴ്​നാട്​ സർക്കാർ പുറത്തിറക്കിയ ‘Antiquity of Iron: Recent Radiometric Dates from Tamil Nadu’ എന്ന പുസ്തകത്തിൽ എഴുതിയ ഏക മലയാളിയും ഡോ. ചെറിയാൻ ആണ്​.

തമിഴ്​നാടിന്‍റെ കണ്ടുപിടിത്തം ഉടൻതന്നെ അക്കാദമിക പഠനരംഗത്തേക്ക്​ എത്തുമെന്ന്​ കേരള സർവകലാശാല ആർക്കിയോളജി ഡിപ്പാർട്മെന്‍റിലെ അസി. പ്രഫസർമാരായ ഡോ. എസ്​.വി. രാജേഷും ഡോ. ജി.എസ്.​ അഭയനും ചൂണ്ടിക്കാട്ടുന്നു. ഇരുമ്പിന്‍റെ ആവിർഭാവം കണ്ടെത്തിയത്​ തന്നെ വലിയ നേട്ടമാണ്​. ഈ പ്രദേശങ്ങളിൽ ഇരുമ്പിന്‍റെ ഉല കൂടി കണ്ടെത്തപ്പെട്ടാൽ ​ഈ കണ്ടെത്തലിന്‍റെ പ്രാധാന്യം പതിന്മടങ്ങ്​ വർധിക്കും. തമിഴ്​നാടിന്‍റെ ഇത്തരം ശ്രമങ്ങൾ കേരളത്തിലെ പുരാവസ്തു ഗവേഷകർക്കും ആവേശം പകരുന്നതാണ്​. സമാനമായ വൻകിട ഗവേഷണങ്ങൾ ഇവിടെയും നടക്കേണ്ടതുണ്ടെന്നും ഡോ. രാ​േജഷും ഡോ. അഭയനും കൂട്ടി​ച്ചേർത്തു. ജനുവരി 23ന്​ ചെന്നൈയിൽ മുഖ്യമന്ത്രി സ്റ്റാലിൻ നടത്തിയ ഇരുമ്പുയുഗപ്പിറവി പ്രഖ്യാപന ചടങ്ങിലേക്ക്​ ഡോ. രാ​ജേഷിന്​ ക്ഷണം ഉണ്ടായിരുന്നു.