വി.ടിയെക്കുറിച്ച്​ മകൻ എഴുതു​​മ്പോൾ...

വി.ടി. ഭട്ടതിരിപ്പാടിനെക്കുറിച്ച്​ മകൻ വി.ടി. വാസുദേവൻ എഴുതു​​മ്പോൾ, ഇവിടെയുണ്ടായിരുന്ന വി.ടി ഇപ്പോഴും ഇവിടെയുണ്ടെന്ന ബോധ്യമാണ്​ നാം അനുഭവിക്കുന്നത്​. ഇന്നലെയെന്നോണം തന്‍റെ ചുറ്റിലും അച്ഛൻ തീർത്ത ലോകത്തെ വീണ്ടെടുക്കുകയാണ്​. മകന്‍റെ ഓർമകൾ ചേർന്നുകിടക്കുന്ന സമാഹാരം ‘വി.ടി. ഒരു തുറന്ന പുസ്​തകം’ എന്ന പേരിൽ പുറത്തിറങ്ങി. ഈ വായന ഇന്നലെകളിലേക്കും ഇന്നിലേക്കും കണ്ണുതുറപ്പിക്കുന്നു.

ഈ പുസ്​തകം സമർപ്പിച്ചിരിക്കുന്നത്​ കോവിലനാണ്. ഒപ്പം ഈ കുറിപ്പുകൾ എഴുതിവരുന്ന വേളയിൽ കോവിലൻ എഴുതിയ കത്ത്​ ആമുഖമായി ​ചേർത്തിരിക്കുന്നു. അതിലിങ്ങനെ: ‘‘പ്രിയ​പ്പെട്ട വാസുദേവൻ, ബുദ്ധനെ കേട്ടിട്ടു​ണ്ടല്ലോ. നരമേധമാണ്​ ബുദ്ധനെ പ്രകോപിപ്പിച്ചത്​ എന്നാണ്​ എന്‍റെ ഉൗഹം. ത​ന്റെ അവസാനകാലത്ത്​ തെണ്ടിയാലും ഭിക്ഷകിട്ടാത്ത വിധത്തിൽ ബുദ്ധനെ ഒറ്റ​​പ്പെടുത്തിയിരുന്നു എന്നും ബുദ്ധൻ പട്ടിണി കിടന്നാണ്​ മരിച്ചതെന്നും ഞാൻ മനസ്സിലാക്കുന്നു. ഇത്​, എവിടെയോ ഞാൻ എഴുതിയിട്ടുണ്ട്​.

ചിലേടത്തൊക്കെ പറഞ്ഞിട്ടുമുണ്ട്​. ഏറ്റവും മര്യാദയോടുകൂടി പറയുകയാണെങ്കിൽ വി.ടിയെക്കുറിച്ച്​ താങ്കൾ എന്തെങ്കിലും എഴുതു​േമ്പാൾ ഇവിടത്തെ ഹിപ്പോക്രാറ്റുകളുടെ മുഖത്തല്ല, മുഖംമൂടികളിലാണ​ല്ലോ നാം തുപ്പുന്നത്​...'' വി.ടിയെന്ന മനുഷ്യന്‍ കേരളീയ സമൂഹത്തിന്​ എന്തായിരുന്നുവെന്ന ചോദ്യത്തിന്​ കോവിലൻ നൽകുന്ന ഉത്തരം കൂടിയാണ്​ കത്തിലെ ഈ വരികൾ.

കേരളത്തിന്‍റെ നവോത്ഥാനചരി​ത്രത്തിലെ മുൻനിരപ്പോരാളികളിൽ ഒരാൾ. നാടാകെ പുതിയ വെളിച്ചം തേടു​േമ്പാൾ ഇരുണ്ട ഇടനാഴിയിൽ തളച്ചിടപ്പെട്ട നമ്പൂതിരി സമുദായത്തി​നു മുകളിൽ വെളിച്ചം വീശാൻ വി.ടി ഒറ്റയാൾ പട്ടാളമായി. അതാണ്, ആ ജീവിതത്തെ മാറ്റിമറിച്ചത്​. നാലു പതിറ്റാണ്ടുകാലം ഒരു കൂട്ടിരിപ്പുകാരനെപ്പോലെ അച്ഛനോടൊപ്പം നിന്ന മകന്‍റെ ഓർമയാണ് ഈ പുസ്​തകം. പക്ഷേ, അച്ഛനെ എനിക്ക്​ മനസ്സിലായോ എന്ന കുറിപ്പ്​ വി.ടിയുടെ ആന്തരിക സംഘർഷങ്ങൾ പിടിച്ചെടുക്കാൻ കഴിയുന്നതല്ലെന്ന്​ ബോധ്യപ്പെടുത്തുന്നു.

‘അമ്പലങ്ങൾക്ക്​ തീ​കൊളുത്തുക’

അനാചാരങ്ങൾക്കെതിരായ പോരാട്ടത്തിന്‍റെ ഒരു ഘട്ടത്തിൽ വി.ടി എഴുതി, ‘ഇനി നമുക്ക്​ അമ്പലങ്ങൾക്ക്​ തീകൊളുത്താം​’ എന്ന്​. ഈ പ്രസ്​താവനക്കു പിന്നാലെ അന്നത്തെ ​​കൊച്ചി രാജ്യത്തേക്ക്​ വി.ടിക്ക്​ പ്രവേശനം നി​​ഷേധിച്ചിരുന്നു. ഇതേത്തുടർന്ന്​ അദ്ദേഹം അനുഭവിച്ച യാതനകൾ മകൻ എഴുതുന്നു. അക്കാലത്ത്​ വി.ടിയുടെ വീട്​ നിൽക്കുന്ന ഇടത്തെ മന എന്നാണ്​ വിളിച്ചിരുന്നത്​മനയെന്ന പ്രയോഗത്തോട്​ വി.ടി യോജിച്ചില്ല. അതിനാൽ, വി.ടിയുടെ വീട്​ എന്ന്​ സ്വ​ന്തം വാസസ്ഥലത്തിനു പേരിടുന്നതി​ലേക്കെത്തി.

കമ്യൂണിസ്റ്റുകാരനായ സുഹൃത്തിന് വി.ടി എഴുതി: ‘ഇ.എം.എസ്​ തന്ന അരിവാളും ചുറ്റികയും മറ്റുള്ളവരുടെ തലകൊയ്യാനല്ല, സ്വന്തം അന്ധതയുടെയും പൊങ്ങച്ചത്തിന്‍റെയും നേർക്കാണ്​ ഉപയോഗിക്കേണ്ടത്​​.’ വി.ടി എത്രമാത്രം വേറിട്ട വഴിയിലൂടെയാണ്​ സഞ്ചരിച്ചതെന്ന്​ വി.ടിയുടെ എഴുത്തും ജീവിതവും മലയാളിയെ ബോധ്യപ്പെടുത്തിയതാണ്​. അതിന്​ അടിവരയിടുകയാണ്​ മകൻ ഈ ഓർമക്കുറിപ്പുകളിലൂടെ...