തത്ത്വചിന്തകനും തൊണ്ടമുഴയും
![തത്ത്വചിന്തകനും തൊണ്ടമുഴയും തത്ത്വചിന്തകനും തൊണ്ടമുഴയും](https://www.madhyamam.com/h-upload/2022/08/29/1735956-nazimudheen2a.webp)
തത്ത്വചിന്തകൻ ഉറങ്ങി കഴിഞ്ഞപ്പോൾ തൊണ്ടമുഴ മെല്ലേ ഇറങ്ങിവന്ന് കിടക്കകോണിൽ സമാധിസ്ഥനായ് ഇങ്ങനെ ആത്മഗതം ചെയ്തു വെറുമൊരു മുഴക്കുപോലും ഹാ ചരിത്രത്തെ എങ്ങനെ സ്വാധീനിക്കാൻ കഴിയുന്നു തൊണ്ടയിലെ എന്റെ വേദനാപെരുക്കങ്ങളാൽ ഇയാളുടെ വാക്കുകൾ തീക്ഷ്ണമായി എഴുത്തിലും പ്രഭാഷണങ്ങളിലും...
Your Subscription Supports Independent Journalism
View Plansതത്ത്വചിന്തകൻ ഉറങ്ങി കഴിഞ്ഞപ്പോൾ
തൊണ്ടമുഴ
മെല്ലേ ഇറങ്ങിവന്ന്
കിടക്കകോണിൽ
സമാധിസ്ഥനായ്
ഇങ്ങനെ ആത്മഗതം ചെയ്തു
വെറുമൊരു മുഴക്കുപോലും
ഹാ ചരിത്രത്തെ
എങ്ങനെ സ്വാധീനിക്കാൻ
കഴിയുന്നു
തൊണ്ടയിലെ
എന്റെ വേദനാപെരുക്കങ്ങളാൽ
ഇയാളുടെ വാക്കുകൾ
തീക്ഷ്ണമായി
എഴുത്തിലും പ്രഭാഷണങ്ങളിലും തീജ്വാലകളായി
യുവാക്കളും
ഉൽപതിഷ്ണുക്കളും
ഏറ്റുവാങ്ങി
സ്വേച്ഛാധിപതികൾ
ഉള്ളാലെ ഭയപ്പെട്ടു
അത്
സിംഹഗർജനങ്ങളായി
അവരുടെ കോട്ടകൊത്തളങ്ങളെ
വിറപ്പിച്ചു
ഭരണയന്ത്രങ്ങൾ
കൊഴിഞ്ഞുവീണു
രാജ്യത്തിന്റെ ചരിത്രം
ഞാൻ അങ്ങനെ
മാറ്റിയെഴുതി
എന്നാൽ
പണ്ഡിതർക്കും
ഗവേഷകർക്കും
ചരിത്രത്തിന്റെ
ഇരുൾ ചാലുകളിൽ
കുടികൊണ്ടിരുന്ന
എന്റെ പങ്ക്
കണ്ടെത്താനായില്ല
ഈ വൈരൂപ്യമാണിതിനു
കാരണമെന്നു
അറിയുന്നത്
ദൈവം മാത്രം
മഹാനായ തത്ത്വചിന്തകൻ എന്ന്
ഇയാൾ ജനങ്ങൾക്കിടയിൽ
അറിയപ്പെട്ടപ്പോൾ
ശത്രുതക്കിടയിൽ
എന്റെ പേരിൽ
വിഷം കുടുങ്ങിയ
നീലകണ്ഠൻ എന്ന്
പരിഹസിക്കപ്പെട്ടു
ഞാൻ മൂലമുണ്ടായ അപകർഷതയാൽ... ഇയാൾ സുന്ദരികളായ
ആരാധികമാരിൽനിന്നും
അകന്നു ജീവിച്ചു
ഇയാളെ സ്വവർഗക്കാരൻ
ആക്കിയതിലും
ഞാൻ പങ്കുവഹിച്ചു
എന്റെ സാന്നിധ്യമില്ലാത്ത
ഈ ഉറക്കത്തിൽ
ഇയാൾ മെല്ലേ ചിരിക്കുന്നു
പുല്ലിനും പുഴുവിനും
ഇടം നൽകിയ ദൈവം
ഇയാളുടെ തൊണ്ടയിൽ
എനിക്ക് പാർപ്പിടം നൽകി
തൊണ്ടമുഴ
ആത്മഗതം കഴിഞ്ഞ് വീണ്ടും
നുഴഞ്ഞു കേറിയപ്പോൾ
അയാൾ അവ്യക്തമായ്
എന്തോ പിറുപിറുത്തു.