മരപാഠശാല

മണ്ണടിഞ്ഞൊരോർമത്തുണ്ട്

മടമ്പിലൊന്ന് പോറുമ്പോൾ

മരുന്നിനൊരില നീട്ടും

പള്ളിക്കാട്ടിലെ കരിനൊച്ചി

പ്രാർഥനകളാർത്തമാകും

പ്രദക്ഷിണവഴിക്കുമീതെ

ആയിരം ചില്ല വീശി

അരയാൽ കുടനിവർത്തും

നോവിനാത്മനിവേദനങ്ങൾ

നൊവേനയുരുവിടുമ്പോൾ

നറുസുഗന്ധധൂമമാകാൻ

കറ ചുരത്തും കുന്തിരിക്കം

അവധൂതസമസ്യകൾക്ക്

അവബോധസത്യമേകാൻ

ചലപത്രമന്ത്രമോതി

ഛായ തീർക്കും വടവൃക്ഷം

മരമേതാകിലും വേര്

മണ്ണിനെപ്പുൽകി നിൽക്കും

മതമേതാകിലും മരം

മരുന്നും തണലുമാകും

ആതിരയോ പെരുന്നാളോ

ആര് പന്തിയിലിരുന്നാലും

ആരടുപ്പ് കൂട്ടിയാലും

അരി വെന്ത് പാകമാക്കും

കട്ടിലാകും കതകുമാകും

കടശ്ശിയിൽ പെട്ടിയാകും

പട്ടടയ്ക്ക് വിറകുമാകും

കാട്ടുതീയുമാകും മരം

അരഞ്ഞുവെൺതാളായതിൽ

അക്ഷരങ്ങൾ പെറ്റുകൂട്ടും