അവസ്ഥാന്തരങ്ങൾ
![അവസ്ഥാന്തരങ്ങൾ അവസ്ഥാന്തരങ്ങൾ](https://www.madhyamam.com/h-upload/2022/04/28/1539074-kavitha.webp)
ഇടയ്ക്കൊന്നു നോക്കൂ, മഴപ്പാറ്റ പാറുംതനിച്ചുള്ള വീട്ടിന്നകത്തെത്തണുപ്പിൽ തിളങ്ങുന്ന രാത്രി തന്നാലിംഗനത്തിൽ- ത്തളർന്നുറങ്ങുന്നൊരു ജീവന്റെ ബിന്ദു! ഇരുൾക്കാറ്റു ചൂളം മുഴക്കിത്തിമിർക്കെ, കനക്കുന്ന മാനം മുഖം കോട്ടിനിൽക്കെ, മരം കീറി മിന്നൽച്ചുരുൾ ബാക്കിവെക്കും- ഇളം മഞ്ഞ വെട്ടം തെളിഞ്ഞും മറഞ്ഞും; മരപ്പൊത്തിനുള്ളിലേക്കൂർന്നിറങ്ങീടും, കരിമ്പാമ്പ് പിന്നിൽക്കുരുക്കും നടുക്കം. വിരൽ വണ്ണമൊപ്പം ഇഴഞ്ഞോരിരുട്ടിൻ- നഖങ്ങൾ വരയ്ക്കും ഉടൽക്കയറ്റങ്ങൾ; ഉറക്കത്തിനുള്ളിൽക്കുതിച്ചും കിതച്ചും വിയർപ്പിൻ സമുദ്രം തിരക്കൈ വിടർത്തി- പ്പൊതിഞ്ഞും വലിച്ചങ്ങെറിഞ്ഞും, ക്ഷതങ്ങൾ- പടർന്നും,...
Your Subscription Supports Independent Journalism
View Plansഇടയ്ക്കൊന്നു നോക്കൂ, മഴപ്പാറ്റ പാറും
തനിച്ചുള്ള വീട്ടിന്നകത്തെത്തണുപ്പിൽ
തിളങ്ങുന്ന രാത്രി തന്നാലിംഗനത്തിൽ-
ത്തളർന്നുറങ്ങുന്നൊരു ജീവന്റെ ബിന്ദു!
ഇരുൾക്കാറ്റു ചൂളം മുഴക്കിത്തിമിർക്കെ,
കനക്കുന്ന മാനം മുഖം കോട്ടിനിൽക്കെ,
മരം കീറി മിന്നൽച്ചുരുൾ ബാക്കിവെക്കും-
ഇളം മഞ്ഞ വെട്ടം തെളിഞ്ഞും മറഞ്ഞും;
മരപ്പൊത്തിനുള്ളിലേക്കൂർന്നിറങ്ങീടും,
കരിമ്പാമ്പ് പിന്നിൽക്കുരുക്കും നടുക്കം.
വിരൽ വണ്ണമൊപ്പം ഇഴഞ്ഞോരിരുട്ടിൻ-
നഖങ്ങൾ വരയ്ക്കും ഉടൽക്കയറ്റങ്ങൾ;
ഉറക്കത്തിനുള്ളിൽക്കുതിച്ചും കിതച്ചും
വിയർപ്പിൻ സമുദ്രം തിരക്കൈ വിടർത്തി-
പ്പൊതിഞ്ഞും വലിച്ചങ്ങെറിഞ്ഞും, ക്ഷതങ്ങൾ-
പടർന്നും, നിഗൂഢം പതുക്കെപ്പിണഞ്ഞും,
ഉറക്കത്തിലാരോ തെളിക്കും പടർപ്പും-
ഇരുൾപ്പച്ച വിങ്ങിക്കനക്കുന്ന കാടും;
തിരിഞ്ഞൊന്നു നോക്കൂ, ചിറകറ്റു വീഴും-
മഴപ്പാറ്റകൾ നേർത്തു മായുന്ന നേരം
ഉറക്കം മുറിഞ്ഞും, തെളിഞ്ഞും, മറഞ്ഞും,
കിടക്കുന്ന പെണ്ണിന്റെ നീലിച്ച ചുണ്ടിൽ
പരക്കുന്നു ഞാറപ്പഴത്തിന്റെ ഗന്ധം
കാലാതിവർത്തിയാം കാടിൻ സുഗന്ധം!