പുഴക്കമ്പം
![പുഴക്കമ്പം പുഴക്കമ്പം](https://www.madhyamam.com/h-upload/2023/10/22/2099637-untitled-1.gif)
നാൽപ്പത്തിനാല്
നദികളൊ
രുമിച്ചൊ-
രുത്സവക്കമ്പം
കഴിഞ്ഞ മട്ട്
നീണ്ട വിരൽ
നിലവിട്ടുയർന്നാരെയും
പേരു ചോദിക്കാതെ
തൂത്തെടുത്തു
വഴികൾ തിരിച്ചുപിടിച്ചു,
ജലവാളു വീശി
പുറമ്പോക്കു കൈയടക്കി,
ജലസൂചികൾ
കോർത്തെടുത്തു,
മിനുക്കിയ
നിലയും വിലയു-
മണിഞ്ഞതെല്ലാം
കാറ്റിലാടുന്നൊരു
വൻമരം കണ്ട നാൾ
പേടി മുളച്ചു
തിരികെയോടി
പൊങ്ങുതടിപോലെ
വെള്ളം തുഴഞ്ഞെന്റെ
വീടൊഴുകുന്നൊരു
കാഴ്ച കണ്ടു.
പുസ്തകം കൈനീട്ടി
യെത്തിപ്പിടിക്കെ
യെൻ പാഠം പഠിപ്പുര
വിട്ടുപോയി
എച്ച് ടു ഒ -
എന്നെഴുതിയ
ബോർഡിലെ
ഹൈഡ്രജൻ ഭീകര
ബോംബുതന്നെ
നീർച്ചുഴിക്കുള്ളിൽ
നടുങ്ങും നിമിഷത്തി
ലൊന്നുമല്ലെന്നുള്ള
നേരറിഞ്ഞു.
പുഴയിലെറിഞ്ഞ
പാഴ് വസ്തുക്ക
ളൊക്കെയും
തിരികെയെത്തിച്ചു
പിൻവാങ്ങിടുമ്പോൾ
നീൾമുടിത്തുമ്പൊ
ന്നൊതുക്കിവേഗം
കുറച്ചാഴത്തിലേക്ക്
മടങ്ങിയെത്തി.
ജലവാളുവീശി
ത്തിരികെയെത്താനിടം
നമ്മളിലൂറി
നിൽക്കുന്നു വീണ്ടും..!