വിവാഹ യാത്രക്കിടെ ഇടിമിന്ന​ലേറ്റ്​ 16 പേർ മരിച്ചു; വരനടക്കം നിരവധി പേർക്ക്​ പരിക്ക്​

ധാക്ക: വിവഹ യാത്രക്കിടെ ഇടിമിന്നലേറ്റ്​ 16 പേർ മരിച്ചു. വരനടക്കം നിരവധി പേർക്ക്​ പരിക്കേറ്റു. ബംഗ്ലാദേശിലെ പടിഞ്ഞാറൻ ജില്ലയായ ചപ്പൈനാവബ്ഗഞ്ചിലാണ്​​ സംഭവം.

വരനും സംഘവും വിവാഹ ചടങ്ങിൽ സംബന്ധിക്കാനായി നദിയിലൂടെ വഞ്ചിയിൽ വരികയായിരുന്നു. കനത്ത മഴ പെയ്​തതോടെ വഞ്ചിയിൽനിന്നിറങ്ങി നദീതീരത്ത്​ അഭയം തേടി. ഇതിനിടയിലാണ്​ ദുരന്തമായി ഇടിമിന്നലെത്തിയത്​. സംഘത്തിനൊപ്പം വധുവും ബന്ധുക്കളും ഉണ്ടായിരുന്നില്ല.

ശക്തമായ മൺസൂൺ ബംഗ്ലാദേശിനെ സാരമായി ബാധിച്ചിട്ടുണ്ട്​. കോക്സ് ബസാറിലെ തെക്കുകിഴക്കൻ ജില്ലയിൽ ഒരാഴ്ച തോരാതെ പെയ്ത മഴയിൽ ആറ് റോഹിങ്ക്യൻ അഭയാർഥികൾ ഉൾപ്പെടെ 20 പേരാണ്​ മരിച്ചത്​.

രാജ്യത്ത്​ മിന്നലിൽ പ്രതിവർഷം നൂറുകണക്കിന് ആളുകളാണ്​ മരണപ്പെടുന്നത്​. ഔദ്യോഗിക കണക്കനുസരിച്ച്, 2016ൽ ഇരുനൂറിലധികം ഇടിമിന്നൽ മരണങ്ങളുണ്ടായി. മേയിൽ ഒരു ദിവസം 82 പേർ മരിച്ചു.

വനനശീകരണം മരണനിരക്ക്​ വർധിപ്പിക്കുന്നതായി വിദഗ്​ധർ ചൂണ്ടിക്കാട്ടുന്നു. ഇതിന്‍റെ അടിസ്​ഥാനത്തിൽ, കാലാവസ്ഥാ വ്യതിയാനത്തിന്‍റെ ആഘാതവും മിന്നൽ മരണങ്ങളുടെ എണ്ണവും കുറക്കാനായി ബംഗ്ലാദേശ് ലക്ഷക്കണക്കിന് പനകൾ നട്ടുപിടിപ്പിക്കുകയാണ്​.