അഫ്​ഗാനിൽ നടിയും സംവിധായകയുമായ സബാ സഹറിന്​ വെടിയേറ്റു

അഫ്​ഗാനിൽ നടിയും സംവിധായകയുമായ സബാ സഹറിന്​ വെടിയേറ്റുകാബൂൾ: അഫ്ഗാനിസ്ഥാനിലെ സംവിധായകയും നടിയുമായ സബാ സഹറിന്​ നേരെ അക്രമികൾ വെടിവെച്ചു. വയറ്റിൽ വെടിയേറ്റ നടിയെ കാബൂളിലെ ആശുപത്രിയിൽ പ്രവേശിപ്പിച്ചു. 44 കാരിയായ സാബ അഫ്​ഗാനിലെ ആദ്യത്തെ വനിതാ സംവിധായകരിൽ ഒരാളായി അറിയപ്പെടുന്ന വ്യക്തിയാണ്​.

കാബൂളി​െല വസതിയിൽ നിന്ന്​ ജോലിക്ക് പോകാനായി ഇറങ്ങിയ സാബയുടെ കാറിന്​ നേരെ മൂന്നംഗ സംഘം വെടിയുതിർക്കുകയായിരുന്നു. വെടിയേറ്റ സാബ ഭർത്താവ്​ എമൽ സാകിയെ വിളിച്ച്​ പരിക്കേറ്റതായി അറിയിക്കുകയും ഉടൻ ആശുപത്രിയിലെത്തിക്കുകയുമായിരുന്നു. താരത്തെ അടിയന്തര ശസ്​ത്രക്രിയക്ക്​ വിധേയയാക്കി.

സാബയുടെ കാറിൽ രണ്ട്​ അംഗരക്ഷകർ ഉൾപ്പെടെ നാലുപേരുണ്ടായിരുന്നു. ആക്രമണത്തിൽ അംഗരക്ഷകർക്കും വെടിയേറ്റിട്ടുണ്ട്​. ഡ്രൈവറും കാറിലുണ്ടായിരുന്ന കുട്ടിയും പരിക്കേൽക്കാതെ രക്ഷപ്പെട്ടു.

ആക്രമണത്തെ അപലപിച്ച മനുഷ്യാവകാശ സംഘടനയായ ആംനസ്റ്റി ഇൻറർനാഷണൽ സമീപകാലത്ത് അഫ്​ഗാനിൽ അഭിനേതാക്കൾക്കും ആക്ടിവിസ്റ്റുകൾക്കുമെതിരായ ആക്രമണങ്ങളിൽ അങ്ങേയറ്റം ആശങ്കയുണ്ടാക്കുന്നതായി ചൂണ്ടിക്കാട്ടി,

അഫ്ഗാനിസ്ഥാനിലെ പ്രശസ്ത നടിയ​​ും സംവിധായകനും ആക്ടിവിസ്റ്റുമാണ് സഹർ. 'കമീഷണർ അമാനുല്ല', ' ദ ലോ', 'പാസിങ്​ ദി റെയിൻബോ', 'കാബൂൾ ഡ്രീം ഫാക്ടറി' എന്നിവയുൾപ്പെടെ നിരവധി സിനിമകളും ടെലിവിഷൻ ഷോകളും സംവിധാനം ചെയ്​തിട്ടുണ്ട്​.