അഫ്​ഗാൻ പ്രതിസന്ധി: ഇന്ത്യക്ക്​ നഷ്​ടം​ ശതകോടികളുടെ ഉഭയകക്ഷി വ്യാപാരം

ന്യൂഡൽഹി: താലിബാൻ പിടിച്ച അഫ്​ഗാനിസ്​താനി​ൽ​ അതിർത്തികൾ മുടങ്ങിക്കിടക്കുന്നത്​ ശരിക്കും പ്രതിസന്ധിയിലാക്കിയത്​ ഉഭയകക്ഷി വ്യാപാരം. 150 കോടി ഡോളറി (11,100 കോടിയിലേറെ രൂപ) ന്‍റെ വ്യാപാരമാണ്​ ഇരു രാജ്യങ്ങൾക്കുമിടയിൽ നടന്നിരുന്നത്​.

കാർഷിക രംഗമാണ്​ അഫ്​ഗാനികളുടെ പ്രധാന തൊഴിൽ. കാർഷിക ഉൽപന്നങ്ങളുടെ കയറ്റുമതിയാണ്​ വരുമാന മാർഗങ്ങളിൽ മുഖ്യം. എന്നാൽ, താലിബാൻ പിടിച്ചതിന്​ പിന്നാലെ ഭരണപ്രതിസന്ധിയിൽ ആദ്യം നിലച്ചത്​ അതിർത്തി കടന്നുള്ള വ്യാപാരമാണ്​.

ഇന്ത്യയുമായി അഫ്​ഗാനിസ്​താന്​ ശക്​തമായ വ്യാപാര ബന്ധമാണ്​ നിലവിലുണ്ടായിരുന്നത്​. കഴിഞ്ഞ രണ്ടു പതിറ്റാണ്ടിനിടെ ഇത്​ അനേക ഇരട്ടിയായി വളരുകയും ചെയ്​തു. 2019- 20ൽ മാത്രം കയറ്റുമതി- ഇറക്കുമതി ഇനത്തിൽ 150 കോടി ഡോളറിന്‍റെ വ്യാപാരമാണ്​ ഇരുരാജ്യങ്ങൾക്കുമിടയിൽ നടന്നത്​.

ഡ്രൈഫ്രൂട്ടുകളാണ്​ കാര്യമായും അഫ്​ഗാനിസ്​താനിൽനിന്ന്​ ഇന്ത്യയിലെത്തിയിരുന്നത്​. അത്തിപ്പഴം, അക്രൂട്ട്​, ബദാം, അത്തിപ്പഴം, ഉണക്ക മുന്തിരി, കായം എന്നിങ്ങനെ പഴങ്ങളായും അല്ലാതെയും ഇന്ത്യയിൽ വൻവിപണി സാധ്യതയാണ്​ ഡ്രൈഫ്രൂട്ടുകൾ തുറന്നത്​.

ഇന്ത്യയിൽനിന്ന്​ അഫ്​ഗാനിസ്​താനിലേക്ക്​ വസ്​ത്രം, മരുന്ന്​, മെഡിക്കൽ ഉപകരണങ്ങൾ, കമ്പ്യൂട്ടറുകൾ, ഹാർഡ്​വെയർ ഉപകരണങ്ങൾ, സിമെന്‍റ്​, പഞ്ചസാര, സിന്തറ്റിക്​ ഫൈബർ എന്നിവ കയറ്റി അയച്ചു.

അഫ്​ഗാനിസ്​താനിൽനിന്ന്​ ഡ്രൈഫ്രൂട്ടുകൾ വരവ്​ കുറഞ്ഞത്​ രാജ്യത്ത്​ ഇവക്ക്​ വില കൂട്ടാനിടയാക്കിയിട്ടുണ്ട്​.