റഷ്യന്‍ വിമാനാപകടം: ബ്ളാക്ബോക്സ് പരിശോധനക്കയക്കും

കൈറോ: ഈജിപ്തിലെ സിനായില്‍ തകര്‍ന്നുവീണ റഷ്യന്‍വിമാനത്തിന്‍െറ ബ്ളാക്ബോക്സ് കൂടുതല്‍ പരിശോധനക്കായി വിദേശത്തേക്കയക്കുമെന്ന് ഈജിപ്ത് അധികൃതര്‍ അറിയിച്ചു. ബ്ളാക്ബോക്സിലെ റെക്കോഡറില്‍ സ്ഫോടനത്തിന്‍െറ ശബ്ദം റെക്കോഡ് ചെയ്തതായി റിപ്പോര്‍ട്ടുകളുണ്ടായിരുന്നു. എന്നാല്‍, ഈ ശബ്ദം വിശകലനം ചെയ്യുന്നതിനുള്ള സംവിധാനം എല്ലാ രാജ്യങ്ങളിലുമില്ല. ഏതു രാജ്യത്താണ് ആ സംവിധാനമുള്ളത് എന്ന് പരിശോധിച്ചുവരുകയാണെന്നും ഈജിപ്ഷ്യന്‍ വ്യോമയാനമന്ത്രി ഹോസം കമാല്‍ അറിയിച്ചു. പടിഞ്ഞാറന്‍ രാജ്യങ്ങള്‍ അപകടത്തെക്കുറിച്ച് കെട്ടുകഥകള്‍ പടച്ചുവിടുകയാണെന്നും അദ്ദേഹം ആരോപിച്ചു. വിമാനാപകടത്തിന് പിന്നില്‍ ഐ.എസ് ആണെന്ന വാദം റഷ്യയും ഈജിപ്തും തള്ളിയിരുന്നു. എന്നാല്‍, ബ്രിട്ടനടക്കമുള്ള രാജ്യങ്ങള്‍ വിമാനം സ്ഫോടനത്തില്‍ തകര്‍ന്നതാണെന്നാണ് വിലയിരുത്തുന്നത്.