മൊഗാദിശുവിൽ ഇരട്ട സ്​ഫോടനം; 13 മരണം

മൊഗാദിശു: സോമാലിയൻ തലസ്​ഥാനമായ മൊഗാദിശുവിലുണ്ടായ രണ്ടു സ്​ഫോടനങ്ങളിൽ 13 മരണം. 16ലേറെ പേർക്ക്​ പരിക്കേറ്റു. ഇതിനിടയിൽ കനത്ത വെടിവെപ്പുമുണ്ടായി. തലസ്​ഥാന നഗരിയിലെ തിരക്കേറിയ നാസ ഹബ്​ലൂദ്​ ഹോട്ടലിന്​ പുറത്താണ്​ ആദ്യം കാർ ബോംബ്​ സ്​ഫോടനമുണ്ടായത്​. മിനിറ്റുകൾ കഴിഞ്ഞ്​ സമീപത്ത്​ മറ്റൊരു സ്​ഫോടനമുണ്ടായി. ഹോട്ടലിനകത്ത്​ കനത്ത വെടിവെപ്പ്​ നടന്നതായി ക്യാപ്​റ്റൻ മുഹമ്മദ്​ ഹുസൈൻ പറഞ്ഞു. ​

പ്രസിഡൻറി​​​െൻറ കൊട്ടാരത്തിന്​ വളരെ അടുത്താണ്​ ഹോട്ടൽ. രാഷ്​ട്രീയ, സാമൂഹിക മേഖലകളിലെ ഉന്നതരാണ്​ ഇവിടെ എത്താറുള്ളത്​. ഇവരെ ലക്ഷ്യമിട്ടായിരുന്നു ആക്രമണം. മുതിർന്ന പൊലീസ്​ ഉദ്യോഗസ്​ഥനും മുൻ സാമാജികനും മരിച്ചവരിൽപെടുന്നു. അൽശബാബ്​ ആക്രമണത്തി​​െൻറ ഉത്തരവാദിത്തം ഏറ്റെടുത്തു. 

തങ്ങളുടെ അംഗങ്ങൾ ഹോട്ടലിനകത്തുണ്ടെന്ന്​ അൽശബാബ്​ വൃത്തങ്ങൾ പറഞ്ഞു. മൊഗാദിശുവിലെ തിരക്കേറിയ ​റോഡിൽ 350 പേരുടെ മരണത്തിന്​ ഇടയാക്കിയ ട്രക്ക്​ ബോംബ്​ സ്​ഫോടനം നടന്ന്​ ദിവസങ്ങൾക്കുശേഷമാണ്​ പുതിയ സംഭവം.