തുനീഷ്യയിൽ കോവിഡ്​ പോസിറ്റീവില്ലാത്ത ദിനം

ടൂണിസ്​: തിങ്കളാഴ്​ച ഒറ്റ കോവിഡ്​ കേസും റിപ്പോർട്ട്​ ചെയ്​തില്ലെന്ന്​ തുനീഷ്യ സർക്കാർ. മാർച്ച് രണ്ടിന്​ കോവിഡ്​ രോഗം കണ്ടെത്തിയ രാജ്യത്ത്​ ഇതാദ്യമായാണ്​ ആർക്കും രോഗമില്ലാത്ത ദിവസം കടന്നുപോകുന്നത്​. 1,032 പേർക്ക്​ ഇതുവരെ കോവിഡ്​ പോസിറ്റീവ്​ സ്​ഥിരീകരിച്ച ഇവിടെ 45 പേർ മരണപ്പെട്ടു. 

വടക്കേ ആഫ്രിക്കൻ രാജ്യമായ തുനീഷ്യയിൽ അഞ്ഞൂറോളം തീവ്രപരിചരണ കിടക്കകൾ മാത്രമാണുള്ളത്​. പരിമിതമായ സൗകര്യങ്ങൾക്കിടയിലും 745 രോഗികൾ സുഖം പ്രാപിച്ചതായി ആരോഗ്യവകുപ്പ്​ അധികൃതർ അറിയിച്ചു. 11 പേർ മാത്രമാണ് ഇപ്പോൾ ആശുപത്രിയിൽ ചികിത്സയിലുള്ളത്. 

കഴിഞ്ഞയാഴ്ച മുതൽ രാജ്യത്ത്​ ലോക്​ഡൗണിൽ ഇളവ്​ നൽകിയിരുന്നു. ഭക്ഷണം, നിർമാണം, ഗതാഗതം എന്നീ മേഖലകളിൽ ഭാഗികമായി സർവിസ്​ പുനരാരംഭിച്ചു. പകുതി ജീവനക്കാരെ ഉപയോഗിച്ച്​  സർക്കാർ ഓഫിസുകളും പ്രവൃത്തിക്കുന്നുണ്ട്​. ഷോപ്പിങ്​ സ​​െൻററുകൾ, തുണിക്കടകൾ, ബാർബർ ഷോപ്പുകൾ എന്നിവ തിങ്കളാഴ്ച തുറക്കും. 

അതേസമയം, രാജ്യത്തി​​​െൻറ സമ്പദ്‌വ്യവസ്ഥ 4.3 ശതമാനം വരെ ഇടിയുമെന്നാണ്​ കണക്കുകൾ സൂചിപ്പിക്കുന്നത്​. 1956ൽ സ്വാതന്ത്ര്യം ലഭിച്ച ശേഷം ആദ്യമായാണ്​ ഇങ്ങനെ​െയാരു തകർച്ച നേരിടുന്നത്​. 400,000 പേർക്ക്​ തൊഴിൽ നഷ്​ടപ്പെടുമെന്നാണ്​ കണക്കാക്കുന്നത്​.