വിമാനയാത്രക്കിടെ കോവിഡ്​ പോസിറ്റീവായി; ബാത്ത്​റൂമിൽ ക്വാറന്‍റീനിൽ കഴിഞ്ഞ്​ അധ്യാപിക

വാഷിങ്​ടൺ: വിമാനയാത്രക്കിടെ കോവിഡ്​ സ്ഥിരീകരിച്ചതിനെ തുടർന്ന്​ മൂന്ന്​ മണിക്കൂർ വിമാനത്തിന്‍റെ ബാത്ത്​റൂമിൽ ക്വാറന്‍റീനിൽ കഴിഞ്ഞ്​ അധ്യാപിക. സ്വിറ്റ്​സർലാൻഡിലേക്കുള്ള വിനോദയാത്രക്കിടെയാണ്​ മരീസ ഫോട്ടിയോക്ക്​ രോഗബാധ സ്ഥിരീകരിച്ചത്​. ചിക്കാഗോയിൽ നിന്നായിരുന്നു ഇവർ ഐസ്​ലാൻഡിലേക്കുള്ള വിമാനം കയറിയത്​. അവിടെ നിന്നും സ്വിറ്റ്​സർലാൻഡിലേക്ക്​ പോകാനായിരുന്നു പദ്ധതി.

വിമാനത്തിൽ കയറുന്നതിന്​ മുമ്പ്​ രണ്ട്​ തവണ പി.സി.ആർ പരിശോധനയും അഞ്ച്​ തവണ റാപ്പിഡ്​ ടെസ്റ്റും നടത്തി. പരിശോധനകളുടെ ഫലമെല്ലാം നെഗറ്റീവായിരുന്നു. പിന്നീട്​ യാത്രക്കിടെ ​തൊണ്ടവേദന അനുഭവപ്പെട്ടതിനെ തുടർന്ന്​ കൈയിലുണ്ടായിരുന്നു കോവിഡ്​ പരിശോധന കിറ്റ്​ ഉപയോഗിച്ച്​ പരിശോധന നടത്തുകയായിരുന്നു. പരിശോധനയിൽ കോവിഡ്​ സ്ഥിരീകരിക്കുകയും ചെയ്തു.

ഉടൻ തന്നെ വിമാന ജീവനക്കാരെ താൻ വിവരമറിയിച്ചുവെന്ന്​ ഫോട്ടിയോ പറഞ്ഞു. തനിക്ക്​ തന്‍റെ കുടുംബത്തെയോർത്തും വിമാനത്തിലെ മറ്റ്​ യാത്രക്കാരെയോർത്തും കടുത്ത ആശങ്കയുണ്ടായി. പിന്നീട്​ വിമാനത്തിന്‍റെ ജീവനക്കാർ തനിക്കായി പ്രത്യേക സീറ്റ്​ ഒരുക്കാൻ ശ്രമിച്ചു. എന്നാൽ, വിമാനത്തിൽ യാത്രികരുടെ എണ്ണം കൂടുതലയാതിനാൽ അത്​ സാധ്യമായില്ല. തുടർന്ന്​ താൻ തന്നെ വിമാനത്തിന്‍റെ ബാത്ത്​റൂമിൽ ക്വാറന്‍റീനിലിരിക്കാൻ തീരുമാനിക്കുകയായിരുന്നുവെന്ന്​ അധ്യാപിക പറഞ്ഞു. ബാത്ത്​റൂമിൽ ഭക്ഷണം ഉൾപ്പടെ വിമാനയാത്രക്കാർ എത്തിച്ച്​ നൽകിയെന്ന്​ അവർ കൂട്ടിച്ചേർത്തു. പിന്നീട്​ ഐസ്​ലാൻഡിൽ എത്തിയതിന്​ ശേഷം അധ്യാപികയെ ക്വാറന്‍റീനിലേക്ക്​ മാറ്റി.