ട്രംപിനെ പഠിപ്പിക്കാനില്ലെന്ന്​ കനേഡിയൻ പ്രധാനമന്ത്രി

വാഷിങ്​ടൺ: അഭയാർഥി വിഷയത്തിൽ യു.എസ്​ പ്രസിഡൻറ്​ ഡൊണൾഡ്​ ട്രംപിനെ പഠിപ്പിക്കാനില്ലെന്ന്​ കനേഡിയൻ പ്രധാനമന്ത്രി ജസ്റ്റിൻ ട്രൂഡൊ. ഇരു രാജ്യങ്ങളും തമ്മിലുള്ള സഹകരണം ശക്തമാക്കുന്നതി​െൻറ ഭാഗമായി യു.എസിലെത്തിയപ്പോഴായിരുന്നു ട്രൂഡോയുടെ പ്രതികരണം.

അഭയാർഥികളോട്​ അനുഭാവം പുലർത്തുന്ന ട്രൂഡൊ ഇൗ വിഷയത്തിൽ ഇരു രാജ്യങ്ങളുടെയും നിലപാട്​ വ്യത്യസ്​തമാണെന്ന്​ വ്യക്​തമാക്കി. മികച്ച ബന്ധമാണ്​ ഇരുരാജ്യങ്ങൾ തമ്മിലുള്ളതെങ്കിലും ചില കാര്യങ്ങിൽ ഭിന്ന കാഴ്ചപ്പാടുണ്ട്​. സുരക്ഷാ കാര്യങ്ങളിൽ വിട്ടുവീഴ്​ച ചെയ്യാതെ എല്ലാവരെയും സ്വീകരിക്കുന്ന സമീപനമാണ്​ കാനഡയുടേത്​. ലോകത്തിന് നല്ല മാതൃകയായി ത​​െൻറ രാജ്യത്തെ മാറ്റുകയാണ് ​ലക്ഷ്യമെന്നും ട്രൂഡൊ കൂട്ടിച്ചേർത്തു.

അതേസമയം തുറന്ന വാതിൽ നയം തന്നെയാണ്​ അമേരിക്ക ആഗ്രഹിക്കുന്നതെങ്കിലും മോശം ആളുകളെ രാജ്യത്തേക്ക്​ കടക്കാൻ അനുവദിക്കില്ലെന്ന്​ ട്രംപ് ​പറഞ്ഞു. നേരത്തെ 40000 അഭയാർഥികളെ സ്വീകരിക്കാനുള്ള ട്രൂഡോയുടെ തീരുമാനം അന്താരാഷ്ട്ര തലത്തിൽ ഏറെ ശ്രദ്ധ പിടിച്ച് പറ്റിയിരുന്നു.