വിരമിക്കാൻ മണിക്കുറുകൾ ശേഷിക്കെ മുൻ എഫ്​.ബി.​െഎ ഡെപ്യൂട്ടി ഡയറക്​ടറെ പുറത്താക്കി

വാഷിങ്​ടൺ: വിരമിക്കാൻ മണിക്കൂറുകൾ മാത്രം ശേഷി​ക്കെ അമേരിക്കൻ അന്വേഷണ എജൻസിയായ എഫ്​.ബി.​െഎയുടെ മുൻ ഡെപ്യൂട്ടി ഡയറക്​ടറെ പുറത്താക്കി. മുൻ ഡയറക്​ടർ ആൻഡ്രൂ മക്​ബേയെയാണ്​ അറ്റോണി ജനറൽ ജെഫ്​ സെഷൻസ്​ പുറത്താക്കിയത്​. കഴിഞ്ഞ ജനുവരിയിൽ എഫ്​.ബി.​െഎ ഡെപ്യൂട്ടി ഡയറക്​ടർ സ്ഥാനം മക്​ബേ രാജിവെച്ചിരുന്നു.

എഫ്​.ബി.​െഎക്കുള്ളിൽ നടത്തിയ അന്വേഷണത്തിനൊടുവിലാണ്​ മക്​ബേയെ പുറത്താക്കാൻ തീരുമാനിച്ചതെന്ന്​ അറ്റോണി ജനറൽ അറിയിച്ചു. മാധ്യമങ്ങൾക്ക്​ എഫ്​.ബി.​െഎയുമായി ബന്ധപ്പെട്ട പല വാർത്തകളും ചോർത്തി നൽകിയെന്നാണ്​ മക്​ബേക്ക്​ എതിരായി ഉയർന്ന ആരോപണം.

അമേരിക്കൻ പ്രസിഡൻറ്​ തെരഞ്ഞെടുപ്പിലെ റഷ്യൻ ഇടപെടൽ സംബന്ധിച്ച്​ അന്വേഷണം നടത്തിയ സംഘത്തിൽ മക്​ബേയും അംഗമായിരുന്നു. അതേ സമയം, മക്​ബേയെ പുറത്താക്കിയ നടപടിയെ പ്രസിഡൻറ്​ ഡോണൾഡ്​ ട്രംപ്​ സ്വാഗതം ചെയ്​തു. വിരമിക്കുന്നതിന്​ മുമ്പ്​ പുറത്താക്കിയതോടെ മക്​ബേക്ക്​ പെൻഷൻ ഉൾപ്പടെയുള്ള ആനുകൂല്യങ്ങൾ ലഭിക്കില്ല​.