അമേരിക്കയിൽ വിമാനം തകർന്ന്​ ഇന്ത്യൻ വംശജരായ ഡോക്​ടർ ദമ്പതികൾ കൊല്ലപ്പെട്ടു

ഹൂസ്​റ്റൺ: സ്വകാര്യ വിമാനം തകർന്ന്​ ഇന്ത്യന്‍ വംശജരായ ഡോകടർ ദമ്പതിമാർ അമേരിക്കയില്‍ കൊല്ലപ്പെട്ടു. മനോരോഗ വിദഗ്​ദരായ ഉമാമഹേശ്വര കലാപടപ്പ് (63) ഭാര്യ സീതാ ഗീത കലാപടപ്പ്​(61) എന്നിവരാണ് കൊല്ലപ്പെട്ടത്. യു.എസ്സിലെ ഒഹിയോയയിലാണ് സംഭവം. 

ശനിയാഴ്ച്ച രാവിലെ 10.36നും 12.30നും ഇടയിലാണ് അപകടം നടന്നതെന്നാണ് നിഗമനം. ഉമാമഹേശ്വരയായിരുന്നു വിമാനം പറത്തിയിരുന്നത്.ഒഹിയോവിലെ ബെവര്‍ളി ഗ്രാമത്തിന് സമീപമുള്ള ജലസംഭരണിയിൽ നിന്ന് വിമാനത്തി​​​​െൻറ അവശിഷ്ടങ്ങള്‍ ലഭിച്ചു.

അപകട കാരണം വ്യക്തമല്ല. അന്വേഷണം നടക്കുകയാണെന്ന് വ്യോമയാന അധികൃതര്‍ അറിയിച്ചു. ആന്ധ്രപ്രദേശിലെ മച്ചിലപട്ടണം സ്വദേശികളായ ഇരുവരും ഇന്ത്യാനയിലെ ലോഗൻസ്പോർട്ടിലാണ് താമസം. 

അമേരിക്കയിലെ അറിയപ്പെടുന്ന ഫോട്ടോഗ്രാഫര്‍ കൂടിയായ ഉമാമഹേശ്വര ഫോട്ടോഗ്രാഫിയില്‍ ഒട്ടേറെ ദേശീയ, അന്തര്‍ദേശീയ പുരസ്‌കാരങ്ങള്‍ നേടിയിട്ടുണ്ട്.