കഴിഞ്ഞ വർഷം യു.എസിൽ രാഷ്​ട്രീയ അഭയം തേടിയത്​  7000 ഇന്ത്യക്കാർ

വാഷിങ്​ടൺ: 2017ൽ യു.എസിൽ രാഷ്​ട്രീയ അഭയം നൽകണമെന്നാവശ്യപ്പെട്ട്​  ഏഴായിരത്തിലേറെ ഇന്ത്യക്കാർ അപേക്ഷ നൽകിയതായി ​െഎക്യ രാഷ്​ട്ര സഭ അഭയാർഥി ഏജൻസിയുടെ റിപ്പോർട്ട്​. 2017ൽ ഏറ്റവും കൂടുതൽ അഭയാർഥി അപേക്ഷകൾ ലഭിച്ച രാജ്യം അമേരിക്കയാണെന്നും റിപ്പോർട്ടിൽ പറയുന്നു.

 ഏജൻസിയുടെ വാർഷിക ഗ്ലോബൽ ട്ര​​െൻറ്​ റിപ്പോർട്ടിലാണ്​ ഇക്കാര്യം വ്യക്തമാക്കുന്നത്​. ലോകത്താകമാനം 6.85 ലക്ഷം ആളുകളാണ്​ വിവിധ സ്​ഥലങ്ങളിലേക്ക്​ അഭയാർഥികളായി പോയിട്ടുള്ളത്​. അക്രമവും വേട്ടയാടലുമാണ്​ ഇത്തരത്തിൽ മറ്റു സ്​ഥലങ്ങൾ തേടി പോകാൻ കാരണമായി പറയുന്നത്​.

അതേ സമയം, യു.എസിലേക്ക്​ അനധികൃത കുടിയേറ്റം നടത്തിയ 52 ഇന്ത്യക്കാർ അറസ്​റ്റിലായി. യു.എസ്​ സംസ്​ഥാനമായ ഒറിഗോണിൽ തടവിലാക്കപ്പെട്ടിരിക്കുകയാണ്​ ഇവർ. അമേരിക്കയിൽ അഭയം തേടാനായി എത്തിയ സിഖ്​, ക്രിസ്​ത്യൻ വിഭാഗക്കാരാണ്​ ഇതിൽ ഭൂരിഭാഗവും. 

ഇന്ത്യയിൽ തങ്ങൾ മതപരമായി വേട്ടയാടപ്പെടുകയാണെന്നും മതപരമായ സ്വാതന്ത്ര്യത്തിനായി യു.എസിൽ അഭയം തേടാനായാണ്​ എത്തിയതെന്നുമാണ്​ ഇവർ പറയുന്നത്​. ഇടുങ്ങിയ മുറിയിൽ തടവിൽ കിടക്കുകയാണിവർ​. യു.എസിൽ അനധികൃത കുടിയേറ്റത്തിന്​ തടവിലാക്കപ്പെട്ടവരിൽ ഏറെയും ഇന്ത്യക്കാരാണ്​. 

123 ഇന്ത്യക്കാരാണ്​ അനധികൃത കുടിയേറ്റത്തിന്​ യു.എസിലെ ഷെരിദാനിൽ തടവിൽ കഴിയുന്നത്​. അഭയാർഥികളായാണ്​ ഇവരെല്ലാം യു.എസിലേക്ക്​ കടന്നത്​.