അവർ മാധ്യമപ്രവർത്തകരല്ല; കള്ളൻമാർ -പുലിറ്റ്​സർ ജേതാക്കൾക്കെതിരെ ട്രംപ്​

വാഷിങ്​ടൺ: പുലിറ്റ്​സർ ജേതാക്കളായ മാധ്യമപ്രവർത്തകർക്കെതിരെ കടുത്ത അധിക്ഷേപവുമായി അമേരിക്കൻ പ്രസിഡൻറ്​ ഡൊണാൾഡ് ട്രംപ്്. അവർ മാധ്യമപ്രവർത്തകരല്ല കള്ളൻമാരാണെന്നും  സമ്മാനം തിരികെ കൊടുക്കണമെന്നും വൈറ്റ്​ ഹൗസിൽ നടത്തിയ വാർത്ത സമ്മേളനത്തിൽ ട്രംപ്​ ആവശ്യപ്പെട്ടു.

2016 ലെ അമേരിക്കൻ തെരഞ്ഞെടുപ്പിൽ റഷ്യ ഇടപെട്ടുവെന്ന അന്വേഷണാത്മക റിപ്പോർട്ടിന്​ പുലിറ്റ്‌സർ നേടിയവ​െ​രയാണ്​ ട്രംപ്​ അധിക്ഷേപിച്ചത്​.  “അവർ പത്രപ്രവർത്തകരല്ല. കള്ളന്മാരാണ്. പുലിറ്റ്‌സർ നേടിയ എല്ലാ പത്രപ്രവർത്തകരും ആ സമ്മാനങ്ങൾ തിരികെ നൽകാൻ നിർബന്ധിതരാകണം. കാരണം അവരുടെ റിപ്പോർ​ട്ടെല്ലാം തെറ്റായിരുന്നു. തെരഞ്ഞെടുപ്പിൽ റഷ്യയുമായി യാതൊരു ബന്ധവുമില്ലെന്നതിന്​ കൂടുതൽ രേഖകൾ പുറത്തുവന്നിട്ടുണ്ട്” -അദ്ദേഹം പറഞ്ഞു.

റഷ്യൻ നയതന്ത്രജ്ഞനുമായുള്ള ബന്ധത്തി​​​െൻറ പേരിൽ മുൻ ദേശീയ സുരക്ഷാ ഉപദേഷ്ടാവ് മൈക്കൽ ഫ്ലിന്നിനെതിരായ ക്രിമിനൽ കേസ് ഉപേക്ഷിക്കാൻ യു.എസ് നീതിന്യായ വകുപ്പ് തീരുമാനിച്ചതിന് തൊട്ടുപിന്നാലെയായിരുന്നു ട്രംപി​​​െൻറ പ്രതികരണം. 

റഷ്യയുമായി കൂട്ടുകെട്ട് ഉണ്ടായിരിന്നുവെന്നത്​ തെറ്റാണെന്ന് ട്രംപ് പറഞ്ഞു. ആ കഥ പൂർണമായും തെറ്റായതിനാൽ പത്രങ്ങൾക്ക്​ അവാർഡ്​ ലഭിക്കുന്നത് അപമാനകരമാണ്​. ‘അത്​ വ്യാജ വാർത്തയായിരുന്നു, പുലിറ്റ്‌സർ സമ്മാനങ്ങൾ ഉടനടി തിരികെ നൽകണം. തെറ്റായ വാർത്തക്ക്​ ലഭിച്ച പുലിറ്റ്‌സർ തിരികെ നൽകാത്തത്​ അപമാനമാണ്​”അദ്ദേഹം പറഞ്ഞു.

ഫ്ലിൻ നിഷ്​കളങ്കനാണെന്നും മികച്ച യോദ്ധാവാണെന്നും അദ്ദേഹം വിശേഷിപ്പിച്ചു. ഫ്ലിന്നിന് സംഭവിച്ചത് ഇനി ഒരിക്കലും ആവർത്തിക്കരുത്​. ഗൂഡാലോചനക്ക്​ പിന്നിൽ ഒബാമ ഭരണകൂടമാണ്. അവർ ചെയ്തത് അപമാനകരമാണ്. വലിയ വില നൽകേണ്ടി വരും-ട്രംപ്​ കൂട്ടിച്ചേർത്തു.