വെറും ടെഡി ബിയറുകളല്ലിത്, ഗസ്സയിൽ പിടഞ്ഞൊടുങ്ങിയ കുഞ്ഞുങ്ങളാണ്

ദോഹ: നിരത്തിവെച്ച 15,000 ​ടെഡി ബിയറുകൾ വെറും പാവകളായിരുന്നില്ല. ഭൂമിക്കുമേൽ കളിച്ചും ചിരിച്ചും ജീവിച്ചിരുന്ന മനുഷ്യക്കുഞ്ഞുങ്ങളായിരുന്നു. ഗസ്സയിലെ ഇസ്രായേൽ നരമേധത്തിൽ കൊല്ലപ്പെട്ട അത്രയും കുട്ടികളുടെ പ്രതിനിധികൾ ആയിരുന്നു അവയോരോന്നും. ആ കുഞ്ഞുങ്ങൾ വെറും അക്കങ്ങളല്ലെന്ന് ലോകത്തെ കാണിക്കുകയാണെന്ന് ഖത്തറിൽ ഇതൊരുക്കിയ ലബനീസ്-സിറിയൻ കലാകാരനായ ബാഷിർ മൊഹമ്മദ് പറയുന്നു. ഗുണപരമായ സ്വാധീനം രൂപപ്പെടുത്തുന്നതിലൂടെ കലയെ എങ്ങനെ അനുകമ്പാപൂരിതമാക്കാമെന്നുകൂടിയാണ് ഈ 41കാരൻ കാണിക്കുന്നത്. ​

ഏഴു കിലോ തൂക്കം വരുന്ന കോൺക്രീറ്റ് ​​​​​കട്ടക്കു മുകളിൽ ഓരോ ടെഡി ബിയറിനെ സ്ഥാപിച്ചാണ് ഇദ്ദേഹം ഇൻസ്റ്റലേഷൻ ഒരുക്കിയത്. ഗസ്സയിലെ ഓരോ കുഞ്ഞി​ന്‍റെയും തലയിൽ പതിച്ച കോൺക്രീറ്റ് കഷ്ണങ്ങളെ അനുസ്മരിപ്പിക്കാനാണിത്.

ഫലസ്തീൻ പ്രശ്നം മാനവികതയുടെ പ്രശ്നമാണെന്നു പറയുന്ന മൊഹമ്മദ് ത​ന്‍റെ ഈ നിർമിതി വിറ്റഴിച്ച് കിട്ടുന്ന പണം ഗസ്സയിലേക്ക് സംഭാവനയായി നൽകാനാണ് ഉ​ദ്ദേശിക്കുന്നത്. ഒരു കലാകാരനെന്ന നിലയിൽ ഇത്രയെങ്കിലും ​താൻ ചെയ്യേണ്ടതുണ്ടെന്ന് അദ്ദേഹം പറയുന്നു. ഖത്തർ ചാരിറ്റി വഴി ഇതിൽനിന്ന് കിട്ടുന്ന തുക കൈമാറും.

ഖത്തറിൽ ഉടനീളമുള്ള സന്ദർശകരുടെ ശ്രദ്ധ പിടിച്ചുപറ്റുകയാണ് ഈ ഇൻസ്റ്റലേഷൻ ഇപ്പോൾ. അവരിൽ അവിടെയുള്ള ഫലസ്തീനികളുമുണ്ട്. ഈ കാഴ്ച ത​ന്‍റെ കണ്ണുകളെ നിറച്ചുവെന്ന് ഒരു യുവതി പറയുന്നു. ഗസ്സയിലെ കുട്ടികളു​ടെ ജീവിതം പഴയപോലെ ആവണമെന്നും അവർ പറഞ്ഞു. ഗസ്സയിൽ ഇസ്രായേൽ ഇതുവരെ കൊലപ്പെടുത്തിയ കുട്ടികളുടെ എണ്ണം 16,400ലേറെ വരുമെന്നാണ് കണക്കുകൾ.