റോഹിങ്ക്യൻ വംശജർക്കിടയിൽ ബംഗ്ലാദേശ്​ മൊബൈൽ ഫോൺ നിരോധിച്ചു

ധാക്ക: റോഹിങ്ക്യൻ അഭയാർഥികൾക്ക്​ മൊബൈൽ ഫോൺ കണക്​ഷൻ നൽകുന്നതിൽ ടെലി കമ്യൂണിക്കേഷൻ കമ്പനികൾക്ക്​ ബംഗ്ലാദേശി​​െൻറ വിലക്ക്​. സുരക്ഷപരമായ കാരണങ്ങളാലാണ്​ ഇതെന്ന്​ ഉദ്യോഗസ്​ഥർ അറിയിച്ചു. പുതുതായി എത്തിയ നാലര ലക്ഷത്തോളം അഭയാർഥികളിൽ ആർക്കെങ്കിലും പ്ലാ​നുക​ളോടെയുള്ള കണക്​ഷൻ നൽകിയാൽ പിഴ അടക്കേണ്ടതായി വരുമെന്ന്​ രാജ്യത്തെ നാല്​ മൊബൈൽ കമ്പനികൾക്ക്​ ബംഗ്ലാദേശ്​ മുന്നറിയിപ്പ്​ നൽകിയിട്ടുണ്ട്​.

ഒൗദ്യോഗിക ​തിരിച്ചറിയൽ കാർഡുകൾ ലഭ്യമാക്കാ​ത്ത സ്വന്തം പൗരന്മാർക്കും ബംഗ്ലാദേശ്​ മൊബൈൽ സിം കാർഡ്​ അനുവദിക്കാറില്ല. അഭയാർഥികൾക്ക്​ ബയോമെട്രിക്​ കാർഡുകൾ അനുവദിക്കുന്ന​േതാടെ നിരോധനം എടുത്തുകളയുമെന്നും അധികൃതർ വ്യക്​തമാക്കി. ഇതിന്​ ആറുമാസം വരെ എടുക്കുമെന്നാണ്​ പറയപ്പെടുന്നത്​.