റോഹിങ്ക്യൻ ബോട്ട്​ മുങ്ങി എട്ടു മരണം

കോക്​സ്​ ബസാർ (ബംഗ്ലാദേശ്​): മ്യാന്മറിൽനിന്ന്​ ബംഗ്ലാദേശിലേക്ക്​ റോഹിങ്ക്യൻ അഭയാർഥികളുമായി വരുകയായിരുന്ന ബോട്ട്​ മുങ്ങി കുട്ടികളടക്കം എട്ട്​ പേർ മരിച്ചു. 20ഒാളം പേരെ കാണാതായി. ബംഗ്ലാദേശിനെയും മ്യാന്മറിനെയും വേർതിരിക്കുന്ന നാഫ്​ നദി മുറിച്ചുകടക്കവെയാണ്​ 50ലധികം പേരുണ്ടായിരുന്ന ബോട്ട്​ മുങ്ങിയതെന്ന്​ ബംഗ്ലാദേശ്​ ബോർഡ്​ ഗാർഡ്​ ഏരിയ കമാൻഡർ ലഫ്​. കേണൽ എസ്​.എം. ആരിഫുൽ ഇസ്​ലാം പറഞ്ഞു. ബംഗ്ലാദേശ്​ തീരത്തിന്​ 200 മീറ്റർമാത്രം അകലെയെത്തിയ​പ്പോഴാണ്​ ബോട്ട്​ മുങ്ങിയത്​. അതുകൊണ്ട്​ 21 പേർക്ക്​ നീന്തി കരക്കെത്താൻ സാധിച്ചു.

ഒന്നര മാസത്തിനിടെ ബംഗ്ലാദേശിലേക്ക്​ അഭയാർഥികളുമായി വരുകയായിരുന്ന റോഹിങ്ക്യൻ ബോട്ടുകൾ​ മുങ്ങി 200ലധികം പേർ മരിച്ചിട്ടുണ്ട്​. മരം കൊണ്ട്​ നിർമിക്കുന്ന ദുർബലമായ ബോട്ടുകളിലാണ്​ തിങ്ങിക്കയറി അഭയാർഥികൾ ബംഗ്ലാദേശിലേക്കെത്താൻ ശ്രമിക്കുന്നത്​. അമിതഭാരത്തോടെ ഒരുവിധ സുരക്ഷ സംവിധാനങ്ങളുമില്ലാതെ പുറപ്പെടുന്ന ഇത്തരം ബോട്ടുകൾ പലപ്പോഴും അപകടത്തിൽപ്പെടുന്നു. മത്സ്യബന്ധനത്തിനു​പയോഗിക്കുന്ന ചെറിയ ബോട്ടുകളാണ്​ അഭയാർഥികളെ എത്തിക്കാൻ ഉപയോഗിക്കുന്നത്​. ബംഗ്ലാദേശ്​ ഭാഗത്തുള്ള ബോട്ടുടമകൾ വലിയ തുക വാങ്ങിയാണ്​ റോഹിങ്ക്യൻ അഭയാർഥികളെ നിറച്ച്​ നാഫ്​ നദി വഴി എത്തിക്കുന്നത്​. കഴിഞ്ഞയാഴ്​ച ഇത്തരത്തിലുള്ള ബോട്ട്​ മുങ്ങി 34 പേർ മരിച്ചിരുന്നു