നടിയെ ആക്രമിച്ച സംഭവം: ഇന്ത്യൻ മാധ്യമങ്ങളുടെ സമീപന​െത്ത വിമർശിച്ച്​ പാകിസ്​താൻ മാസിക

കറാച്ചി: നടിയെ ആക്രമിച്ച സംഭവത്തിൽ ഇന്ത്യൻ മാധ്യമങ്ങൾ വാർത്ത റിപ്പോർട്ട്​ ചെയ്​ത രീതിയെ വിമർശിച്ച്​ പാകിസ്​താൻ മാസിക. പാകിസ്​താനിൽ നിന്നുള്ള മാസികയായ ഹെറാൾഡാണ്​ വിമർശനവുമായി രംഗത്തെത്തിയത്​. ബലാൽസംഗ വാർത്തകൾ റിപ്പോർട്ട്​ ചെയ്യുന്നതിൽ ഇന്ത്യൻ മാധ്യമങ്ങൾ കൂടുതൽ ശ്രദ്ധ പുലർത്തണമെന്ന്​ ആവശ്യപ്പെടുന്ന ലേഖനത്തിലാണ്​ നടിയെ ആക്രമിച്ച സംഭവവും പരാമർശിക്കപ്പെടുന്നത്​.

കേരളത്തിൽ നടിയെ ആക്രമിച്ച സംഭവത്തിൽ മലയാളം ചാനാലായ കൈരളിയും ഇംഗ്ലീഷ്​ ദിനപത്രമായ ടൈംസ്​ ഒാഫ്​ ഇന്ത്യയും വാർത്ത റിപ്പോർട്ട്​ ചെയ്​ത രീതി ശരിയായില്ലെന്ന വിമർശനമാണ്​ ഹെറാൾഡ്​ ഉയർത്തുന്നത്​. ഇവരുടെ വാർത്തകൾക്കെതിരെ സാമൂഹിക മാധ്യമങ്ങളിൽ വൻ വിമർശനമുയർന്നതായും ഹെറാൾഡിലെ ലേഖനത്തിൽ പറയുന്നുണ്ട്​.

വിവിധ സംഭവങ്ങളിലായി ഇന്ത്യയിലെ മറ്റ്​ ദേശീയ ദിനപത്രങ്ങളായ ഹിന്ദുസ്​ഥാൻ ടൈംസ്​, ഇന്ത്യൻ എക്​സ്​പ്രസ്​ എന്നിവയെയും ലേഖനത്തിൽ വിമർശിക്കുന്നു. വയർ ഇന്ത്യയിൽ വന്ന ലേഖനം​ ഹെറാൾഡ്​ അവരുടെ ന്യൂസ്​ വെബ്​സൈറ്റിൽ പോസ്​റ്റ്​ ചെയ്യുകയായിരുന്നു.