അക്രമികൾ ‘കൊറോണ..കൊറോണ’ എന്ന്​ അലറി; ഇന്ത്യൻ വംശജന്​ ഇസ്രായേലിൽ മർദനം

ജെറൂസലം: ഇന്ത്യൻ വംശജനായ ജൂതന് ഇസ്രായേലിൽ മർദനം. മണിപ്പൂരിലെ ബ്​നേയ്​ മെനാഷെ സമൂഹത്തിൽ നിന്നുള്ള ആം ഷാലെം സിങ ്‌സൺ (28)എന്നയാൾക്കാണ്​ മർദനമേറ്റത്​. ചൈനക്കാരനെന്ന്​ ആരോപിച്ച്​​​ ‘കൊറോണ..കൊറോണ’ എന്ന്​ അലറിക്കൊണ്ടായി രുന്നു രണ്ട്​ പേർ ചേർന്ന് ഇയാളെ​ മർദിച്ചത്​. ഇസ്രായേലിലെ ടിബീരിയാസ് നഗരത്തിൽ ശനിയാഴ്ചയായിരുന്നു വംശീയാതിക്രമം.

നെഞ്ചിന് ഗുരുതരമായി പരിക്കേറ്റ ഷാലെം സിങ്‌സനെ പോറിയ ആശുപത്രിയിൽ പ്രവേശിപ്പിച്ചതായി ചാനൽ 13 റിപ്പോർട്ട് ചെയ്തു. താൻ ചൈനക്കാരനല്ലെന്നും കൊറോണ വൈറസ് ബാധിച്ചിട്ടില്ലെന്നും അക്രമികളോട് പറഞ്ഞുവെങ്കിലും ഫലമുണ്ടായില്ലെന്ന്​ സിങ്​സൺ പൊലീസിനോട് പറഞ്ഞു. പരാതിയുടെ അടിസ്ഥാനത്തിൽ പ്രതികൾക്കായി പൊലീസ് തെരച്ചിൽ ആരംഭിച്ചിട്ടുണ്ട്​.

മൂന്ന് വർഷം മുമ്പാണ്​ സിങ്‌സൺ കുടുംബത്തോടൊപ്പം ഇന്ത്യയിൽ നിന്ന് ഇസ്രായേലിലേക്ക് കുടിയേറിയത്​. സംഭവത്തിന് സാക്ഷികളാരും ഉണ്ടായിരുന്നില്ല. പ്രദേശത്തെ സി.സി.ടി.വി ദൃശ്യങ്ങളുടെ അടിസ്ഥാനത്തിലാണ് പൊലീസ് അന്വേഷണം നടത്തുന്നത്​​.