കിം ജോങ്​ നാമി​െൻറ കൊലക്കേസ്​ മലേഷ്യൻ ഹൈകോടതിയിലേക്ക്​ മാറ്റി

ക്വാലാലംപുർ: ഉത്തരകൊറിയൻ ഏകാധിപതി കിം ജോങ്​ ഉന്നി​​​െൻറ അർധ സഹോദരൻ കിം ജോങ്​ നാമി​​​െൻറ ​കൊലക്കേസ്​ വിചാരണ മലേഷ്യൻ ഹൈകോടതിയിലേക്ക്​ മാറ്റി. പ്രതികളെന്ന്​ സംശയിക്കുന്ന രണ്ട്​ സ്​ത്രീകളുടെ അഭിഭാഷകൻ തനിക്ക്​ രേഖകൾ നൽകുന്നില്ലെന്ന്​ പരാതിപ്പെട്ടതിനെ തുടർന്നാണ്​ ഉന്നത കോടതിയിലേക്ക്​ കേസ്​ മാറ്റിയത്​.

ഇന്തോനേഷ്യക്കാരിയായ സീതി ആയിഷ, വിയറ്റ്​നാം പൗരിയായ ദോൻ തി ഹോങ്​ എന്നിവരാണ്​ കേസിൽ പിടിയിലായിരിക്കുന്നത്​. ഫെബ്രുവരി 13ന്​ ഇവർ നാമിനെ ക്വാലാലംപുർ വിമാനത്താവളത്തിൽവെച്ച്​ രാസായുധ പ്രയോഗത്തിലൂടെ കൊലപ്പെടുത്തിയെന്നാണ്​ കേസ്​. ഉത്തര കൊറിയയുടെ താൽപര്യപ്രകാരമാണ്​ കൊലപാതമെന്നാണ്​ ആരോപിക്കപ്പെടുന്നത്​. എന്നാൽ, ഇത്​ ഉത്തരകൊറിയ നിഷേധിച്ചിട്ടുണ്ട്​.

പ്രതിപ്പട്ടികയിൽ ചേർക്കപ്പെട്ട സ്​ത്രീകൾ തങ്ങൾക്ക്​ സംഭവവുമായി ബന്ധമി​െല്ലന്നാണ്​ പറയുന്നത്​. എന്നാൽ, ഇവർക്കെതിരെ സി.സി ടി.വി ദൃശ്യങ്ങളടക്കമുള്ള തെളിവുകൾ പൊലീസ്​ ശേഖരിച്ചിട്ടുണ്ട്​. നേരത്തേ കേസന്വേഷണം ഉത്തര കൊറിയൻ എംബസിയിലേക്ക്​ നീണ്ടത്​ ഇരു രാജ്യങ്ങൾക്കുമിടയിൽ നയതന്ത്രയുദ്ധത്തിന്​ വഴിയൊരുക്കിയിരുന്നു.