ഒരു ശക്തിക്കും ചൈനയുടെ കുതിപ്പിനെ തടയാനാവില്ല -ഷി ജിൻപിങ്​

ബെയ്​ജിങ്​: ഒരു ശക്തിക്കും ചൈനയുടെ കുതിപ്പിനെ തടയാനാവില്ലെന്ന്​ ചൈനീസ്​ പ്രസിഡൻറ്​ ഷി ജിൻപിങ്​. ഹോ​ങ്കോങ് ങി​േൻറയും മക്കാവുവി​േൻറയും ഐശ്വര്യവും സ്ഥിരതയും നിലനിർത്തുമെന്നും അദ്ദേഹം വ്യക്തമാക്കി. ചൈനയിൽ കമ്മ്യൂണിസ്​റ്റ്​ സർക്കാർ നിലവിൽ വന്നിട്ട്​ 70 വർഷം പൂർത്തിയാവുന്നതോ​ടനുബന്ധിച്ച്​ ചരിത്ര പ്രസിദ്ധമായ ടിയാൻമെൻ ചത്വരത്തിൽ രാജ്യത്തെ അഭിസംബോധന ചെയ്യുകയായിരുന്നു അദ്ദേഹം.

1949 ഒക്​ടോബർ ഒന്നിന് മാവോ സെ തുങ്​​ പീപ്പിൾസ്​ റിപ്പബ്ലിക്​ ഓഫ്​ ചൈനയുടെ പ്രഖ്യാപനം നടത്തിയ വേദിയിലാണ്​ 70 വർഷങ്ങൾക്ക്​ ശേഷം ഷി ജിൻപിങ്​ പ്രസംഗിച്ചത്​. അതേസമയം, ഹോ​ങ്കോങ്ങിൽ മാസങ്ങളായി നടക്കുന്ന പ്രക്ഷോഭത്തെ കുറിച്ച്​ ഒന്നും തന്നെ അദ്ദേഹം പരാമർശിച്ചില്ല.

ചൈനീസ്​ ദേശീയ ദിനത്തോടനുബന്ധിച്ച് രാജ്യത്തിൻെറ അത്യാധുനിക ആയുധങ്ങൾ പ്രദർശിപ്പിച്ചുകൊണ്ട്​​ 15,000 സൈനികർ അണിനിരന്ന പരേഡ്​ നടന്നു. 160ലേറെ വിമാനങ്ങളും 580ലേറെ ആയുധങ്ങളും പ്രദർശിപ്പിച്ചു. കൂടാതെ 70 ഗൺ സല്യൂട്ടുകളും സൈന്യം കാ​ഴ്​ച വെച്ചു.

ചൈനീസ്​ പതാക വഹിച്ചുകൊണ്ട്​ ഹെല​ികോപ്​റ്ററുകൾ ആകാശവീഥികൾ കൈയടക്കി. ചൈനയു​ടെ 70ാമത്​ ദേശീയ ദിനത്തിന്​ ആദരവ്​ അർപ്പിച്ചുകൊണ്ട്​ വിമാനങ്ങൾ ‘70’ എന്ന ആകൃതി സൃഷ്​ടിച്ചുകൊണ്ട്​ പറന്നു. ഡി.എഫ്​-41 ഭൂഖണ്ഡാനന്തര ബാലിസ്​റ്റിക്​ മിസൈൽ ഉൾപ്പെടെയുള്ള​ ആയുധങ്ങൾ പ്രദർശനത്തിൽ ഉണ്ടായിരുന്നു.