ട്രംപിനെ യുദ്ധകൊതിയനെന്ന്​ വിശേഷിപ്പിച്ച്​​ ഉത്തരകൊറിയ

ഹാനോയ്​: യു.എസ്​ പ്രസിഡൻറ്​ ഡോണൾഡ്​ ട്രംപ്​ യുദ്ധക്കൊതിയനെന്ന്​ ഉത്തര കൊറിയ. തങ്ങളുടെ  ആണവ ആക്രമണം തടുക്കുന്നതിനുവേണ്ടിയാണ്​ ട്രംപ്​ ഏഷ്യയിൽ തങ്ങുന്നതെന്നും ഉത്തര കൊറിയ പറഞ്ഞു. ഒറ്റപ്പെട്ട രാജ്യങ്ങൾ ഉയർത്തുന്ന ഭീഷണിക്കെതിരായി മറ്റു രാജ്യങ്ങൾ ​െഎക്യത്തോടെ പ്രതിരോധിക്കണമെന്നും അടുത്തിടെ ചില രാജ്യങ്ങൾ നടത്തിയ ആണവപരീക്ഷണം ലോകത്തിനുള്ള മുന്നറിയിപ്പാണെന്നും ട്രംപ്​ പറഞ്ഞിരുന്നു.

കൂടാതെ, സ്വേച്ഛാധിപതിയുടെ വളഞ്ഞ ബുദ്ധിയുടെ പിടിയിൽ അകപ്പെടരുതെന്നും​ വിയറ്റ്​നാമിലെ ഡനാങ്ങിൽ നടക്കുന്ന ഏഷ്യ-പസഫിക്​ ചർച്ചയിൽ ട്രംപ്​ ഉത്തര കൊറിയയെ ഉദ്ദേശിച്ച്​ സൂചിപ്പിക്കുകയും ചെയ്​തു. ഇതിന്​ മറുപടിയായാണ്​ ട്രംപിനെതിരെ ഉത്തര കൊറിയ രംഗത്തുവന്നത്​. അടുത്തിടെ അമേരിക്കൻ വൻകരയെ ലക്ഷ്യമാക്കി ഉത്തര കൊറിയ നിരന്തരമായി ആണവ മിസൈൽ പരീക്ഷണങ്ങൾ നടത്തിയിരുന്നു. 

അതേസമയം, ഏഷ്യ^പസഫിക്​ രാജ്യങ്ങളുമായുള്ള അമേരിക്കയുടെ വ്യാപാരബന്ധം പുതുക്കണമെന്ന്​ ട്രംപ്​ ഏഷ്യൻ^പസഫിക്​ വ്യാപാരചർച്ചയിൽ വ്യക്തമാക്കി. കൂടാതെ, ‘അമേരിക്ക ഫസ്​റ്റ്’ നയം പിന്തുടരണമെന്നും ട്രംപ്​ പറഞ്ഞു​. എന്നാൽ, അമേരിക്ക ഫസ്​റ്റ്​ നയത്തെ എതിർത്ത്​ ട്രാൻസ്​ പസഫിക്​ പങ്കാളിത്ത വ്യാപാര കരാറുമായി  (ടി.പി.പി) മുന്നോട്ടുപോകണമെന്ന്​ ചില അംഗ രാജ്യങ്ങൾ വ്യക്തമാക്കി. യു.എസ് ഇല്ലാതെ കരാറുമായി മുന്നോട്ടു പോകാനാണ്​ അംഗരാജ്യങ്ങളുടെ തീരുമാനം.  

 യു.എസ് ഇല്ലാത്ത കരാറി​​​െൻറ ഭാവിയെക്കുറിച്ച്​   കാനഡ ആശങ്ക പ്രകടിപ്പിച്ചു.  പുതിയ  കരാറിനായുള്ള ചർച്ചയിലും കാനഡ പങ്കെടുത്തില്ല. യു.എസ് വിട്ടുപോകുന്നതോടെ കരാറിലെ നിർണായക സാമ്പത്തിക ശക്തിയായി ജപ്പാൻ മാറും. രണ്ടാം സ്ഥാനത്ത്​ കാനഡയാണ്. രാജ്യത്തെ തൊഴിൽ സംരക്ഷണം ഉറപ്പാക്കുന്ന കരാർ  വേണമെന്നതാണ് കാനഡയുടെയും ആവശ്യം.