തായ്​ലാൻറിലെ ഗുഹയിൽ അകപ്പെട്ടവർ പുറത്തെത്താൻ മാസങ്ങളെടുത്തേക്കും

ബാ​േങ്കാക്​: തായ്​ലാൻറിലെ ചിയാങ്​ റായിലെ താം ലുവാങ്​ ഗുഹയിൽ അകപ്പെട്ട ഫുട്​ബോൾ ടീമംഗങ്ങളായ12 ആൺകുട്ടികളേയും അവരുടെ പരിശീലകനേയും ഉടൻ പുറത്തെത്തിക്കാൻ കഴിയില്ലെന്ന്​ റിപ്പോർട്ട്​. പുറത്തെത്തിക്കുന്നതു വരെ ഇവർക്ക്​ കഴിക്കാനായി നാലുമാസത്തേക്കുള്ള ഭക്ഷണം ഗുഹയിലെത്തിക്കാനാണ്​ ശ്രമം നടക്കുന്നത്​. കുട്ടികൾക്ക്​ നീന്തൽ പരിശീലനം നൽകുമെന്നും സൈന്യം അറിയിച്ചു. 

ഒമ്പതു ദിവസത്തിനു ശേഷം സംഘത്തെ ജീവനോടെ കണ്ടെത്തിയെങ്കിലും അവരെ ഗുഹക്കു പുറത്തെത്തിക്കുന്നത്​ ഇനിയും മാസങ്ങളെടുത്തേക്കുമെന്നാണ്​ റിപ്പോർട്ട്​. ഗുഹയുടെ നിർമാണത്തിലെ സങ്കീർണതയും ഗുഹയിലെ ഇരുട്ടും കാരണമാണ്​ പുറത്തെത്തിക്കുന്നതിൽ ബുദ്ധിമുട്ട്​ നേരിടുന്നത്​. ഭക്ഷണത്തോടൊപ്പം ഉയർന്ന കലോറിയുള്ള ജെല്ലുകളും പാരസെറ്റമോൾ ഗുളികകളും ഗുഹയിലെത്തിക്കും. ഗുഹക്കകത്തെ മൺകൂനക്കു മുകളിൽ അഭയം തേടിയ കുട്ടികളേയും കോച്ചിനേയും ബ്രിട്ടീഷ്​ മുങ്ങൽ വിദഗ്​ധരാണ്​ കണ്ടെത്തിയത്​.
 

കനത്ത മഴ കാരണം വെള്ളം ഉയർന്നതോടെ പുറത്തുവരാൻ കഴിയാതെയാണ്​ ഇവർ കുടുങ്ങിയത്​. 10 കി.​മീ​റ്റ​റി​ലേ​റെ​വ​രു​ന്ന ഗുഹയിൽ ചളി നിറഞ്ഞത്​ നേര​െത്ത രക്ഷാപ്രവർത്തനത്തിന്​ തടസ്സം സൃഷ്​ടിച്ചിരുന്നു. എന്നാൽ, മല തുരന്ന്​ ഗുഹയിലേക്ക്​ മറ്റൊരു വഴിതുറന്ന്​ നടത്തിയ രക്ഷാപ്രവർത്തനമാണ്​ വിജയത്തിലെത്തിയത്​.
ജൂൺ 23നാണ്​ സംഘം ഇവിടെ സന്ദർശനത്തിനെത്തിയത്​.

കുട്ടികൾ 11നും 16നും ഇടയിൽ പ്രായമുള്ളവരാണ്​. 25കാരനായ സഹ പരിശീലകൻ കുട്ടികളെ നേരത്തെയും ഇവിടെ സന്ദർശനത്തിന്​ കൊണ്ടുവന്നിരുന്നു. ഇൗ പരിചയത്തിൽ ഇവർ ഗുഹയുടെ സുരക്ഷിത ഭാഗങ്ങളിൽ കഴിയുകയായിരുന്നെന്നാണ്​ കരുതപ്പെടുന്നത്​. ‘മൂ പാ’ ഫുട്​ബാൾ ക്ലബിലെ അംഗങ്ങളാണ്​ അപകടത്തിൽപെട്ടവരെല്ലാം. 1000ത്തി​ന​ടു​ത്തു​വ​രു​ന്ന താ​യ്​ നാ​വി​ക​സേ​ന വി​ദ​ഗ്​​ധ​ർ​ക്കൊ​പ്പം യു.​എ​സ്, ആ​സ്​​ട്രേ​ലി​യ, ചൈ​ന, ജ​പ്പാ​ൻ എ​ന്നീ രാ​ജ്യ​ങ്ങ​ളും രക്ഷാപ്രവർത്തനത്തിൽ സ​ഹ​ക​രി​ച്ചിരുന്നു.