സിറിയൻ നഗരമായ ഇദ്​ലിബിൽ കോവിഡ്​ സ്​ഥിരീകരിച്ചു; മുന്നറിയിപ്പുമായി​ യു.എൻ

ദമസ്​കസ്​: ആഭ്യന്തര യുദ്ധം രൂക്ഷമായ സിറിയയിലെ ഇദ്​ലിബിൽ കോവിഡ്​ സ്​​ഥിരീകരിച്ചു. സിറിയ-തുർക്കി അതിർത്തി പ്രദേശത്ത്​ മൂന്ന്​ ഡോക്​ടർമാർക്കും ഒരു ​നഴ്​സിനുമാണ്​ 
രോഗം ബാധിച്ചത്​. എവിടെ നിന്നാണ്​ ഇവർക്ക്​ രോഗം പകർന്നതെന്ന്​ വ്യക്​തമല്ല. ഇതോടെ, യുദ്ധാനന്തര ഭീകരത ഏറ്റുവാങ്ങിയ ഇദ്​ലിബിലെ ഈ പ്രദേശത്ത്​ രോഗം അതിവേഗം വ്യാപിക്കു​മെന്ന ആശങ്കയിലാണ്​ ​േ​ലാകാരോഗ്യ സംഘടന. വീടും നാടും നഷ്​ടമായ നിരവധി പേർ തമ്പുകൾ കെട്ടി തിങ്ങിപ്പാർക്കുകയാണ്​ ഇവിടെ. 

കഴിഞ്ഞ വ്യാഴാഴ്​ച രാത്രി തന്നെ ഡോക്​ടർ രോഗ ലക്ഷണങ്ങൾ പ്രകടിപ്പിച്ചിരുന്നു. അതിർത്തിയിലെ ബാബ്​ അൽ ഹവ്വ ആശുപത്രിയിലെ ഡോക്​ടറാണ്​ ഇയാൾ. തുർക്കിയിൽ നിന്നാണ്​ രോഗം എത്തിയതെന്ന്​ ആരോഗ്യപ്രവർത്തകർ സംശയിക്കുന്നു. 21 ലക്ഷത്തോളം രോഗികളുള്ള തുർക്കിയിൽ 5266 പേർ ഇതുവരെ മരിച്ചിട്ടുണ്ട്​. ഇതോടെ ജൂൺ 25 മുതൽ ബാബ്​ അൽ ഹവ്വ ആശുപത്രിയിലെത്തിയ ​രോഗികളെയും മറ്റും ക്വാറൻറീനിലാക്കിയിട്ടുണ്ട്​. 

ആദ്യ കേസുമായി ബന്ധപ്പെട്ടതാണ്​ ഇദ്​ലിബിൽ റിപ്പോർട്ട്​ ചെയ്യപ്പെട്ട മറ്റു കേസുകളെന്ന്​ ഇടക്കാല സർക്കാറിലെ ആരോഗ്യ വിഭാഗം തലവൻ മർആം അൽ ഷെയ്​ഖ്​ പറഞ്ഞു. 
കോവിഡ്​ പശ്ചാതലത്തിൽ രാജ്യത്തി​​െൻറ വിവിധ ഭാഗങ്ങളിലായി ദ്രുതകർമ്മ സേനയെ ഇടക്കാല സർക്കാർ നിയോഗിച്ചിട്ടുണ്ടെങ്കിലും ആഭ്യന്തര സംഘർഷങ്ങൾ അണയാത്തതിനാൽ ഒന്നും ഫലപ്രദമാകുന്നില്ല. ലോകാരോഗ്യ സംഘടനയുടെ സഹായത്തോടെയാണ്​ ആ​​രോഗ്യപ്രവർത്തനങ്ങൾ രാജ്യത്ത്​ പുരോഗമിക്കുന്നത്​. 

ആഭ്യന്തര യുദ്ധം കാരണം പത്തുലക്ഷത്തോളം കുടുംബങ്ങൾക്ക്​ വീടുകൾ നഷ്​ടമായ ഇവിടങ്ങളിൽ രോഗം വ്യാപിച്ചാൽ നിയന്ത്രണ വിധേയമാക്കാൻ കഴിയില്ലെന്ന്​ ബന്ധപെട്ടവർ പറയ​ുന്നു. നേരത്തെ, ആഭ്യന്തര യുദ്ധത്താൽ തകർന്ന സിറിയ ഉൾപ്പെടെയുള്ള മറ്റു രാജ്യങ്ങളിൽ കോവിഡ്​ രോഗം വ്യാപകമായ പ്രതിസന്ധിയുണ്ടാക്കുമെന്ന്​ യു.എൻ മുന്നറിയിപ്പ്​ നൽകിയിരുന്നു. സിറിയയിൽ​ 417 കേസുകളും മൂന്ന്​ മരണവുമാണ്​ ഇതുവരെ പുറത്തു വന്ന​ റിപ്പോർട്ടിലുള്ളത്​.