'കാല്​ മുറിച്ചുകളയൂ' എന്ന ക്രൂരമായ കമന്‍റ്​; ശരീരം കൊണ്ടും മനസുകൊണ്ടും ഞാന്‍ സുന്ദരിയെന്ന്​ മഹോഗനിയുടെ മറുപടി -നീരു​െവച്ച കാലുമായി ഒരു മോഡലിന്‍റെ ജീവിതം

'ഭയം തോന്നാതിരിക്കുന്നവനല്ല ധൈര്യവാൻ, ഭയത്തെ കീഴടക്കുന്നവനാണ്' -യുഗപുരുഷൻ നെൽസൻ മണ്ടേലയുടെ ഈ വാക്കുകളാണ്​ മഹോഗനി ഗെറ്ററിന്‍റെ ജീവിതത്തെ അടയാളപ്പെടുത്തുന്നത്​. അമേരിക്കയിലെ ടെന്നിസീയിലെ നോക്​സ്​വില്ലിൽ നിന്നുള്ള 23കാരിയായ മഹോഗനി വളർന്നുവരുന്നൊരു മോഡലാണ്​. അസാധാരണമാം വിധം നീരുവെച്ച ഇടതുകാൽ ആണ്​ മഹോഗനിക്കുള്ളത്​. എന്നാല്‍ തന്‍റെ വൈകല്യത്തെ ഭയന്ന് വീട്ടിനുള്ളിൽ മറഞ്ഞിരിക്കാൻ അവൾ ഒരുക്കമായിരുന്നില്ല. പകരം ഒരു മോഡലായി തിളങ്ങാനുള്ള ശ്രമത്തിലാണ്​. ഇതിനിടെ നേരിടേണ്ടി വരുന്ന അപമാനങ്ങളെയും ആത്​മവിശ്വാസത്തോടെ നേരിടുകയാണ്​ അവൾ. ​

തന്‍റെ വൈകല്യത്തെ മറച്ചുവെക്കാതെ അതിനെ മറികടക്കുന്ന തരത്തിലുള്ള ചിത്രങ്ങൾ ഇന്‍സ്റ്റഗ്രാമിലും യൂട്യൂബിലുമെല്ലാം പങ്കുവെച്ചാണ്​ മഹോഗനി ശ്രദ്ധേയയായത്​. അതേസമയം, വ്യക്​തിഹത്യ നടത്തിയും പരിഹസിച്ചുമുള്ള കമന്‍റുകൾ ഈ ചിത്രങ്ങൾക്ക്​ ലഭിക്കാറുമുണ്ട്​. 'കാല് മുറിച്ചു കളയൂ, അപ്പോള്‍ കൂടുതല്‍ നന്നായിരിക്കും', 'കണ്ടാല്‍ അന്യഗ്രഹജീവിയെ പോലെ തോന്നുന്നു' തുടങ്ങിയ ക്രൂരമായ കമന്‍റുകളാണ് മഹോഗനിക്ക്​ ലഭിച്ചത്​. എന്നാൽ, 'ഞാനിപ്പോള്‍ ഒരു പ്രചോദനമാണ്. ശരീരം കൊണ്ടും മനസുകൊണ്ടും ഞാന്‍ സുന്ദരിയാണ്. എന്‍റെ ശരീരത്തെക്കുറിച്ചോര്‍ത്ത് ഞാന്‍ അഭിമാനിക്കുന്നു' എന്ന മറുപടി നൽകിയാണ്​ മഹോഗനി ഈ കമന്‍റുകളെ നേരിട്ടത്​. കളിയാക്കുന്നവരെക്കാൾ അഭിനന്ദിക്കുന്നവരാണ്​ കൂടുതലെന്നത്​ മഹോഗനിയുടെ ആത്മവിശ്വാസം വർധിപ്പിക്കുന്നു.

ജന്മനാ തന്നെ ലിംഫെഡീമ (lymphedema) എന്ന രോഗം മഹോഗനിക്കുണ്ട്​. ശരീരത്തിലെ മൃദുവായ കോശങ്ങളില്‍ അധികമായ ദ്രാവകം ശേഖരിക്കുകയും ആ ശരീരഭാഗങ്ങള്‍ അസാധാരണമാംവിധം നീരു ​െവക്കുകയും ചെയ്യുന്ന അവസ്ഥയാണ്​ ലിംഫെഡീമ. മഹോഗനിയുടെ ഇടതുകാലിനെയാണ് ഈ രോഗം ബാധിച്ചത്. ഈ കാലിന് മാത്രം 45 കിലോയാണ്​ ഭാരം. തന്‍റെ അവസ്ഥയെക്കുറിച്ചും ഇത്തരം രോഗം ബാധിക്കുന്നവരെകുറിച്ചുമൊക്കെ മറ്റുള്ളവരെ ബോധവത്​കരിക്കാനും മഹോഗനി തന്‍റെ സോഷ്യൽ മീഡിയ അക്കൗണ്ടുകൾ ഉപയോഗിക്കാറുണ്ട്​.

'ജനിച്ചയുടൻ എന്‍റെ രോഗം കണ്ടെത്തിയിരുന്നു. കുട്ടിക്കാലത്ത് ദൈവം എന്നെ ശപിച്ചതാണെന്നാണ്​ ഞാൻ വിശ്വസിച്ചിരുന്നത്​. വിഷമം വരുമ്പോള്‍ ആരും കാണാതെ കരഞ്ഞിരുന്ന കുട്ടിക്കാലമായിരുന്നു എ​േന്‍റത്​. എന്നാല്‍, മുതിർന്നതോടെ ഞാൻ സ്വയം അംഗീകരിക്കാന്‍ പഠിച്ചത്​ എന്‍റെ ജീവിതത്തെ മാറ്റിമറിച്ചു. ഇന്ന്​ എന്നെ പിന്തുണക്കുന്നവർ നിരവധിയാണ്​. ഫാഷന്‍ മോഡലിങില്‍ എ​േന്‍റതായ ഒരു സ്ഥാനമുണ്ടാക്കാനാണ് ശ്രമം. അമ്മയായ തിമിക്ക എല്ലാ പ്രതിസന്ധിയിലും പിന്തുണയുമായി കൂടെയുണ്ട്​' -മഹോഗനി പറയുന്നു.

നിലവിൽ ഈ അവസ്​ഥക്ക്​ ചികിത്സയൊന്നുമില്ല. ഇത്​ മൂലമുണ്ടാകുന്ന വേദന കുറക്കാനുള്ള മരുന്നുകൾ മാത്രമാണുള്ളത്​. മസാജ്, കംപ്രഷന്‍ ഡ്രസ്സിങ്​, ഫിസിയോതെറാപ്പി എന്നിവയാണ് കാലിന് പ്രധാനമായും നല്‍കുന്ന ചികിത്സ.