ആസ്​ട്രേലിയൻ കോവിഡ്​ വാക്​സിൻ സുരക്ഷിതം; ആൻറിബോഡി ഉൽപ്പാദിപ്പിക്കുന്നുണ്ടെന്ന്​ റിപ്പോർട്ട്

ഓഷിയാന: ആസ്​ട്രേലിയൻ സർവകലാശാലയും ​സി.എസ്​.എൽ ലിമിറ്റഡും സംയുക്തമായി വികസിപ്പിച്ച കോവിഡ്​ വാക്​സിൻ സുരക്ഷിതമെന്ന്​ ആസ്​ട്രേലിയൻ ആരോഗ്യമന്ത്രി. കോവിഡ്​ വാക്​സിൻ പരീക്ഷിച്ചവരുടെ ശരീരത്തിൽ കോവിഡിനെതിരായ ആൻറിബോഡി ഉൽപ്പാദിച്ചാതായും മന്ത്രി ഗ്രെഗ്​ ഹണ്ട്​ പറഞ്ഞു.

ആസ്​ട്രേലിയൻ സർവകലാശാലയായ ക്യൂൻസ്​ലാൻഡും സി.എസ്​.എല്ലും ചേർന്ന്​ നിർമിക്കുന്ന കോവിഡ്​ വാക്​സി​െൻറ അവസാന ഘട്ട പരീക്ഷണം ആരംഭിച്ചു. ആദ്യഘട്ട പരീക്ഷണത്തിൽ വാക്​സിൻ വിജയമായിരുന്നു. പരീക്ഷണം നടത്തിയവരിൽ ആൻറിബോഡി ഉൽപ്പാദിപ്പിച്ചതായും അ​ദ്ദേഹം കൂട്ടിച്ചേർത്തു. പരീക്ഷണം പൂർത്തിയായി കഴിഞ്ഞാൽ വാക്​സിൻ വിതരണം 2021 മൂന്നാംപാദത്തോടെ ആരംഭിക്കാനാകുമെന്നും ആരോഗ്യമന്ത്രി അറിയിച്ചു.

ലോകത്ത്​ കോവിഡ്​ പടർന്നുപിടിച്ചതോടെ നൂറിലധികം കമ്പനികൾ കോവിഡ്​ വാക്​സിൻ നിർമിക്കാൻ തയാറെടുത്തിരുന്നു. നിരവധിപേരുടെ വാക്​സിൻ പരീക്ഷണം അവസാന ഘട്ട പരീക്ഷണത്തിലാണ്​.

ഫൈസർ, ആസ്​ട്രസെനക തുടങ്ങിയവയുടെ വാക്​സിൻ ഉടൻ തന്നെ ലഭ്യമാകുമെന്നാണ്​ വിവരം. പരീക്ഷിച്ച 90 ശതമാനത്തിൽ അധികം പേരിലും വാക്​സിൻ ഫലപ്രദമാണെന്ന്​ ഫൈസർ കഴിഞ്ഞദിവസം അറിയിച്ചിരുന്നു.