വിവാഹമോചനനിയമം വില്ലനായി; 8,000 വർഷം ഇസ്രയേൽ വിടുന്നതിന്​ ആസ്​ട്രേലിയൻ പൗരന്​ വിലക്ക്, അല്ലെങ്കിൽ 18 കോടി രൂപ നൽകണം

ഇസ്രയേലിൽ വിവാഹമോചനനിയമ പ്രകാരം ആസ്​ട്രേലിയൻ പൗരന്​ 9999 വർഷം വരെ രാജ്യം വിടുന്നതിന്​ വിലക്ക്​. 44കാരനായ നോം ഹുപ്പർട്ടിനെതിരെയാണ്​​ ഇസ്ര​യേൽ കോടതി വിചിത്രമായ വിധി പ്രഖ്യാപിച്ചത്​. അല്ലെങ്കിൽ രാജ്യം വിടാൻ അനുവാദം നൽകാൻ 3.34 മില്ല്യൺ ഡോളർ (18.19 കോടി രൂപ) നൽകണം.

ഇസ്രയേലിലേക്ക്​ ഭാര്യ താമസം മാറ്റിയതിന്​ ശേഷം ഒരു വർഷം കഴിഞ്ഞ്​ 2012ലാണ്​ ഹുപ്പർട്ട്​ കുട്ടികളെ കാണാനായി ഇ​സ്രയേലിലെത്തിയത്​. ഇസ്രയേലി കോടതിയിൽ ഹുപ്പർട്ടിനെതിരെ ഭാര്യ വിവാഹമോചന കേസ്​ നൽകിയിരുന്നു. 2013ൽ കോടതി വിധി പ്രസ്താവിച്ചു. ഹുപ്പർട്ട്​ ഇസ്രയേലിൽ തുടരണമെന്നും കുട്ടികൾക്ക്​ 18വയസാകുന്നത്​ വരെ 5000 ​ഇസ്രയേലി ഷെക്കൽസ് ​(1.20 ലക്ഷം രൂപ) പ്രതിമാസം നൽകണമെന്നും ഉത്തരവിട്ടു. ജോലി സംബന്ധമായോ അവധിക്കോ പോലും രാജ്യം വിടാൻ ഹുപ്പർട്ടിന്​ അനുമതിയില്ല.

'2013 മുതൽ ഞാൻ ഇസ്രയേലിൽ കുടുങ്ങി കിടക്കുകയാണ്​' -പ്രദേശിക മാധ്യമത്തോട്​ ഹുപ്പർട്ട്​ പറഞ്ഞു. ഇസ്രയേലി സ്ത്രീകളെ വിവാഹം കഴിച്ചതുകൊണ്ടുമാത്രം ഇസ്രയേൽ നീതി വ്യവസ്ഥയാൽ പീഡിപ്പിക്കപ്പെട്ട നിരവധി വിദേശപൗരൻമാരിൽ ഒരാളാ​ണ്​ താനെന്ന്​ ഹുപ്പർട്ട്​ പറഞ്ഞു. ഒരു ഫാർമസ്യൂട്ടിക്കൽ കമ്പനിയുടെ അനലിറ്റിക്കൽ കെമിസ്റ്റാണ്​ ഹുപ്പർട്ട്​.

ഇസ്രയേലിലെ വിവാഹമോചന നിയമപ്രകാരം സ്ത്രീകൾക്ക്​ അവരുടെ കുട്ടികളുടെ പിതാവിന്‍റെ മേൽ യാത്രവിലക്ക്​ ഏർപ്പെടുത്താനാകും. കൂടാതെ കുട്ടികൾക്ക്​ ലഭിക്കേണ്ട പണം നൽകുന്നുണ്ടെന്ന്​ ഉറപ്പാക്കുകയും ചെയ്യാം -നോ എക്സിറ്റ്​ ഓഡർ ഡോക്യുമെന്‍ററി ഡയറക്ടർ സോറിൻ ലൂക്ക പറഞ്ഞു.