ഫ്രഞ്ച്​ അന്തർവാഹിനി കരാറിൽനിന്ന്​ പിന്മാറിയതിൽ ഖേദമില്ല –ആസ്​ട്രേലിയ

സിഡ്​നി: ഫ്രാൻസുമായുള്ള അന്തർവാഹിനി കരാറിൽനിന്ന്​ പിന്മാറിയതിൽ ഖേദിക്കുന്നില്ലെന്ന്​ ആസ്​ട്രേലിയൻ പ്രധാനമന്ത്രി സ്​കോട്​ മോറിസൺ. ഫ്രാൻസി​െൻറ നിരാശ മനസ്സിലാക്കുന്നു. എന്നാൽ, സ്വന്തം രാജ്യത്തി​െൻറ താൽപര്യമാണ്​ വലുത്​.

കരാർ മുന്നോട്ടുകൊണ്ടുപോകാൻ പറ്റാത്തതിനെക്കുറിച്ച്​ നേരത്തേ ഫ്രാൻസിനെ അറിയിച്ചിരുന്നു. ഇപ്പോഴത്തെ പ്രശ്​നം പരിഹരിക്കാൻ ഫ്രഞ്ച്​ പ്രതിരോധമന്ത്രിയടക്കമുള്ളവരുമായി ചർച്ച നടത്തും-മോറിസൺ വ്യക്തമാക്കി. ഫ്രാൻസുമായി 2016ൽ ഒപ്പുവെച്ച കരാറിൽ നിന്ന്​ ആസ്​ട്രേലിയ പിൻവാങ്ങിയത്​ ഇരുരാജ്യങ്ങളും തമ്മിലുള്ള നയതന്ത്രപ്രശ്​നങ്ങളിലേക്ക്​ നയിച്ചിരുന്നു. ഇന്തോ-പസഫിക്​ മേഖലയിൽ ചൈനയുടെ സ്വാധീനം തടയാൻ ലക്ഷ്യമിട്ട്​ ബ്രിട്ടനും യു.എസുമായുള്ള പുതിയ സുരക്ഷ കരാറിനു പിന്നാലെയാണ്​ ആസ്​ട്രേലിയ ​ഫ്രഞ്ച്​ അന്തർവാഹിനി കരാർ ഉപേക്ഷിച്ചത്​. ഈ കരാർ അനുസരിച്ച്​ സാ​ങ്കേതികവിദ്യകൾ ലഭിക്കുന്നതോടെ ആണവോർജത്തിൽ പ്രവർത്തിക്കുന്ന അന്തർവാഹിനികൾ നിർമിക്കാൻ ആസ്​ട്രേലിയക്ക്​ കഴിയും.

അതേസമയം, പുതിയ സുരക്ഷ കരാറിനെക്കുറിച്ച്​ യു.എസും ആസ്​ട്രേലിയയും കള്ളംപറയുകയാണെന്ന്​ ഫ്രഞ്ച്​ വിദേശകാര്യമന്ത്രി ജീൻ യീവ്​സ്​ ലെ ദ്രിയാൻ. ആരോപിച്ചു.ഇരുരാജ്യങ്ങളും വിശ്വാസവഞ്ചനയാണ്​ നടത്തിയതെന്നും അദ്ദേഹം കുറ്റപ്പെടുത്തി.