പുതിയ വകഭേദങ്ങൾക്ക്​ സാധ്യതയെന്ന്​; ഇന്ത്യയിൽ നിന്നുള്ള സ്വന്തം പൗരൻമാർക്കും വിലക്കേർപ്പെടുത്തി ആസ്​ത്രേലിയ

കോവിഡ്​ വ്യാപനം രൂക്ഷമാകുന്നതിനിടെ ഇന്ത്യയില്‍ നിന്ന് തിരിച്ച് വരുന്ന പൗരന്മാര്‍ക്ക് വിലക്കേര്‍പ്പെടുത്തി ഓസ്‌ട്രേലിയന്‍ സര്‍ക്കാർ. ആസ്​ത്രേലിയയിലേക്കുള്ള യാത്രയുടെ മുമ്പുള്ള 14 ദിവസത്തിനിടെ ഇന്ത്യ സന്ദർശിച്ചവർക്കാണ്​ വിലക്ക്​. വിലക്ക്​ ശനിയാഴ്​ച നിലവിൽ വരും. ഇത്​ ലംഘിക്കുന്നവർക്ക്​ കടുത്ത ശിക്ഷകളാണ്​ നിർദേശിക്കുന്നത്​.

ജൈവ സുരക്ഷ നിയമത്തി​െൻറ ചുവടു പിടിച്ചാണ്​ സർക്കാർ കടുത്ത തീരുമാനം കൈകൊണ്ടിട്ടുള്ളത്​. ചരിത്രത്തില്‍ ആദ്യമായാണ് ഓസ്‌ട്രേലിയ സ്വന്തം പൗരനമാർക്ക്​ ഇങ്ങനെയൊരു വിലക്ക് ഏര്‍പ്പെടുത്തിയിരിക്കുന്നത്. വിലക്ക് ലംഘിച്ചാല്‍ അഞ്ച് വര്‍ഷം വരെ തടവോ 66,000 ഡോളർ പിഴയോ ശിക്ഷയുണ്ട്​.

ഇന്ത്യയില്‍ കോവിഡ് വ്യാപനം രൂക്ഷമായിക്കൊണ്ടിരിക്കുന്ന സാഹചര്യത്തിലായിരുന്നു തീരുമാനം. ഇന്ത്യയിൽ വ്യാപിക്കുന്ന കോവിഡി​െൻറ വകഭേദങ്ങൾ രാജ്യത്തെത്തുന്നത്​ തടയുകയാണ്​ പുതിയ നീക്കത്തി​െൻറ ലക്ഷ്യം. ദിവസവും മൂന്ന്​ ലക്ഷത്തിലധികം പേർക്കാണ്​ ഇന്ത്യയിൽ പുതിയതായി കോവിഡ്​ സ്​ഥിരീകരിക്കുന്നത്​. വൈറസ്​ അതിവേഗം വ്യാപിക്കുന്നതിനാൽ അപകടകരമായ പുതിയ വകഭേദങ്ങൾ ഇന്ത്യയിൽ ഉണ്ടാകാനുള്ള സാധ്യതയെയും മറ്റു രാജ്യങ്ങൾ ഭയക്കുന്നുണ്ട്​.

9000 ഒാളം ആസ്​ത്രേലിയക്കാർ ഇന്ത്യയിലുണ്ടെന്നാണ്​ കണക്ക്​. ഇന്ത്യയില്‍ നിന്നുള്ള യാത്രാ വിമാന സര്‍വ്വീസ് നേരത്തെ തന്നെ ഓസ്ട്രേലിയ റദ്ദാക്കിയിരുന്നു. ഇന്ത്യൻ പ്രീമിയർ ലീഗിലുള്ള താരങ്ങളും മറ്റും വിമാന സർവീസ്​ നിർത്തിയ ശേഷവും മറ്റു രാജ്യങ്ങളിലൂടെ ആസ്​ത്രേലിയയിലേക്ക്​ മടങ്ങിയിരുന്നു. ഇനി ഇന്ത്യയിൽ നിന്നുള്ള ആസ്​ത്രേലിയക്കാർക്ക്​ 14 ദിവസം മറ്റേതെങ്കിലും രാജ്യത്ത്​ തങ്ങാതെ നാട്ടിലെത്താനാകില്ല.