ബെലറൂസിൽ വിമാനം നിലംതൊടുംമുമ്പ്​ വഴിതിരിച്ചുവിട്ട്​ മാധ്യമ പ്രവർത്തകനെ പിടികൂടി

മിൻസ്​ക്​: വിമാനം നിലത്തിറങ്ങാൻ അറിയിപ്പ്​ കിട്ടി നിമിഷങ്ങൾക്കകം മറ്റൊരിടത്തേക്ക്​ പറത്തി പ്രതിപക്ഷ അനുകൂല മാധ്യമ പ്രവർത്തകനെ ​കസ്​റ്റഡിയിലെടുത്തു. ബെലറൂസിലാണ്​ രാജ്യത്തെ ഞെട്ടിച്ച സംഭവം. വിമാനം നിലംതൊട്ടയുടൻ വിമാനം വളഞ്ഞ അധികൃതർ മാധ്യമ പ്രവർത്തകൻ റോമൻ പ്രൊസ്​റ്റാസീവിച്ചിനെ കസ്​റ്റഡിയിലെടുത്തു. വിമാനം വഴിതിരിച്ചുവിടുന്നതായി അറിയിപ്പ്​ വന്നയുടൻ അകത്തിരുന്ന പ്രൊസ്​റ്റാസീവിച്ച്​ അപകടം മണത്തിരുന്നതായി യാത്രക്കാർ പറഞ്ഞു.

പോളണ്ട്​ ആസ്​ഥാനമായുള്ള ഓൺലൈൻ മാധ്യമമായ 'നെക്​സ്​റ്റ'ക്കു വേണ്ടി പ്രവർത്തിച്ചുവരികയായിരുന്നു 26കാരൻ. ബെലറൂസ്​ പ്രസിഡൻറിനെതിരായി തെരുവിലിറങ്ങിയവരുടെ വിശദ വാർത്തകൾ അദ്ദേഹം നൽകിയിരുന്നു. ഇതാണ്​ അധികൃതരെ ചൊടിപ്പിച്ചത്​. നിരവധി കേസുകൾ പ്രൊസ്​റ്റാസീവിച്ചിനെതിരെ ബെലറൂസ്​ പൊലീസ്​ എടുത്തിട്ടുണ്ട്​. ഇവയുടെ പേരിലാണ്​ അറസ്​റ്റ്​.

വിമാനം റാഞ്ചലാണ്​ സംഭവമെന്ന്​ ഇതേ കുറിച്ച്​ യൂറോപ്യൻ യൂനിയനും അമേരിക്കയും കുറ്റപ്പെടുത്തി.