ഹിപ്പൊപൊട്ടാമസുകൾക്ക്​ മൂക്കൊലിപ്പ്​​; പരി​േശാധനയിൽ കോവിഡ്​

ബ്രസ്സൽസ്​: ബെൽജിയൻ മൃഗശാലയിലെ രണ്ട്​ ഹിപ്പൊപൊട്ടാമസുകൾക്ക്​ കോവിഡ്​ സ്​ഥിരീകരിച്ചതായി അധികൃതർ. ആദ്യമായാണ്​ ഹിപ്പൊപൊട്ടാമസുകൾക്ക്​ രോഗം സ്​ഥിരീകരിക്കുന്നത്​.

ആന്‍റ്​വെർപ്​ മൃഗശാലയിലെ 14 വയസുള്ള ഇമാനിക്കും 41വയസായ ഹെർമിയനുമാണ്​ കോവിഡ്​ സ്​ഥിരീകരിച്ചതെന്ന്​ ദേശീയ വെറ്ററിനറി ലാബ്​ സ്​ഥിരീകരിച്ചു. രണ്ടു ഹിപ്പോകൾക്കും കോവിഡ്​ ബാധിച്ചത്​ എങ്ങനെയെന്ന കാര്യം വ്യക്തമല്ല.

രണ്ട്​ ഹിപ്പോകൾക്കും ചെറിയ മൂക്കൊലിപ്പ്​ മാത്രമാണുള്ളതെന്നും മറ്റ്​ ആരോഗ്യപ്രശ്​നങ്ങളില്ലെന്നും അധികൃതർ അറിയിച്ചു. ഹിപ്പോകൾക്ക്​ രോഗം സ്​ഥിരീകരിച്ചതോടെ മൃഗശാലയിൽ നിയന്ത്രണങ്ങൾ ശക്തമാക്കി. ഹിപ്പോകൾക്ക് ആദ്യമായാണ്​ രോഗം സ്​ഥിരീകരിക്കുന്നതെന്നും സാധാരണയായി പൂച്ചകൾക്കും കുരങ്ങുകൾക്കുമാണ്​ രോഗം കൂടുതൽ സ്​ഥിരീകരിച്ചിരിക്കുന്നതെന്നും അവർ അറിയിച്ചു.

മൃഗശാലയിലെ എല്ലാ മൃഗങ്ങളെയും പരിശോധനക്ക്​ വി​േധയമാക്കിയിരുന്നു. എന്നാൽ, ആർക്കും രോഗം സ്​ഥിരീകരിച്ചിരുന്നില്ല. ഹിപ്പോകളുടെ മൂക്ക്​ സാധാരണയായി എപ്പോഴും നനവുള്ളതായിരിക്കും. എന്നാൽ, മൂക്കിൽനിന്ന്​ കട്ടിയുള്ള ദ്രാവകം പുറത്തുവന്നതോടെ മുൻകരുതൽ നടപടികളുടെ ഭാഗമായി പരിശോധനക്ക്​ വിധേയമാക്കുകയായിരുന്നുവെന്ന്​ മൃഗശാല ഡോക്​ടറായ ഫ്രാൻസിസ്​ വെർകാമ്മൻ പറഞ്ഞു.

രോഗം സ്​ഥിരീകരിച്ചതോടെ ഹിപ്പോകളെ കാണാൻ സന്ദർശകർക്ക്​ പ്രവേശനം അനുവദിക്കില്ല. നെഗറ്റീവ്​ ആയതിന്​ ശേഷമാകും സന്ദർശകർക്ക്​ പ്രവേശനം അനുവദിക്കുക. ഹിപ്പോകളെ പരിചരിച്ചിരുന്നവരുടെ പരിശോധന ഫലം നെഗറ്റീവാണ്​. മൃഗങ്ങളെ പരിചരിക്കുന്നവർക്ക്​ കർശന സുരക്ഷ മുൻകരുതലുകളും ഏർപ്പെടുത്തി.