യു.എസ്​ സുപ്രീം കോടതി ജഡ്ജിയാകുന്ന ആദ്യ കറുത്ത വർഗക്കാരിയാകാനൊരുങ്ങി കേതൻജി ബ്രൗൺ ജാക്സൺ

ന്യൂയോർക്ക്​: യു.എസ്​ സുപ്രീം കോടതി ജഡ്ജിയാകുന്ന ആദ്യ കറുത്ത വർഗക്കാരിയാകാനൊരുങ്ങി കേതൻജി ബ്രൗൺ ജാക്സൺ. 51കാരിയായ അപ്പീൽ കോടതി ജഡ്ജി കേതൻജിയെ പ്രസിഡന്‍റ്​ ജോ ബൈഡൻ നാമനിർദേശം ചെയ്തു. കറുത്ത വർഗക്കാരിയാകും അടുത്ത ജഡ്ജിയെന്ന്​ ബൈഡൻ നേര​ത്തെ പ്രഖ്യാപിച്ചിരുന്നു. സെനറ്റ്​ അംഗീകരിച്ചാൽ സുപ്രീം കോടതി ജഡ്ജിയാകുന്ന ആദ്യ കറുത്ത വർഗക്കാരിയെന്ന ചരിത്രനേട്ടം കേതൻജി സ്വന്തമാക്കും.

അടുത്ത്​ സ്ഥാനമൊഴിയുന്ന ലിബറൽ ജസ്റ്റിസായ സ്റ്റീഫൻ ബ്രയറിന്‍റെ പകരമാകും​ കേതൻജിയുടെ നിയമനം. കരിയറിന്‍റെ തുടക്കത്തിൽ ബ്രയറിന്‍റെ ക്ലർക്കായി കേതൻജി പ്രവർത്തിച്ചിരുന്നു.

നിലവിൽ ഡിസ്​ട്രിക്​ട്​ ഓഫ്​ കൊളംബിയ സർക്യൂട്ടിലെ യു.എസ്​ കോർട്ട്​ ഓഫ്​ അപ്പീൽസിൽ സർക്യൂട്ട്​ ജഡ്ജിയാണവർ. ​മുൻ പ്രസിഡന്‍റ്​ ബരാക്​ ഒബാമ ഫെഡറൽ ബെഞ്ചിലേക്ക്​ നാമനിർദേശം ചെയ്ത കേതൻജിക്ക്​ ബൈഡൻ സ്ഥാനക്കയറ്റം നൽകുകയായിരുന്നു.​

നിയമനം യാഥാർഥ്യമായാൽ നിലവിൽ സുപ്രീം കോടതിയിലെ രണ്ടാമത്തെ കറുത്ത വർഗ ജഡ്ജിയാകും കെറ്റാൻജി. ജസ്റ്റിസ്​ ക്ലിയറൻസ്​ തോമസാണ്​ മ​​റ്റൊരാൾ.