നിർണായക പദവികളിൽ ആര്​ വേണം; ചർച്ചകൾക്ക്​ തുടക്കമിട്ട്​ ബൈഡൻ ക്യാമ്പ്​

വാഷിങ്​ടൺ: യു.എസ്​ പ്രസിഡൻറ്​ ഡോണൾഡ്​ ട്രംപിൽ നിന്ന്​ അധികാര കൈമാറ്റത്തിന്​ മുന്നോടിയായി സ്വീകരിക്കേണ്ട നടപടികളെ കുറിച്ച്​ ചർച്ചകൾ തുടങ്ങി ബൈഡൻ ക്യാമ്പ്​. നിർണായക സംസ്ഥാനങ്ങളിൽ ലീഡ്​ ലഭിച്ചതോടെയാണ്​ ബൈഡൻ ക്യാമ്പ്​ ഇതുസംബന്ധിച്ച ചർച്ചകൾക്ക്​ തുടക്കമിട്ടത്​. നിർണായക പദവികളിൽ ആരെയെല്ലാം നിയമിക്കണമെന്നത്​ സംബന്ധിച്ചാണ്​ ചർച്ചകൾ പുരോഗമിക്കുന്നത്​. തീർത്തും വ്യത്യസ്​തമായ ഒരു കാബിനറ്റിനെ യു.എസിൻെറ ഭരണത്തിനായി നിയോഗിക്കാനാണ്​ ബൈഡൻ ക്യാമ്പിൻെറ തീരുമാനം.

എല്ലാ വിഭാഗം ജനങ്ങളുടേയും പ്രാതിനിധ്യം കാബിനറ്റിലുണ്ടാവുമെന്നാണ്​ സൂചന. കോവിഡ്​ കേസുകൾ അമേരിക്കയിൽ വൻതോതിൽ ഉയരുകയാണ്​. അധികാരത്തിലെത്തിയാൽ കോവിഡി​നെ പിടിച്ചു നിർത്തുന്നതിനായിരിക്കും ഡെമോക്രാറ്റിക്​ പാർട്ടി സർക്കാർ ഊന്നൽ നൽകുക. ആരോഗ്യരംഗത്ത്​ കൂടുതൽ ശ്രദ്ധയൂന്നിയുള്ള പ്രവർത്തനങ്ങളാവും അവർ നടത്തുക. ഇതിനൊപ്പം സാമ്പത്തിക പ്രവർത്തനങ്ങൾ മെച്ചപ്പെടുത്താനുള്ള നടപടികളുമുണ്ടാവും.

യു.എസിൽ തെരഞ്ഞെടുപ്പിൻെറ വോ​ട്ടെണ്ണൽ പുരോഗമിക്കുന്നതിനിടെ പെൻസൽവാനിയ അടക്കമുള്ള നിർണായക സംസ്ഥാനങ്ങളിൽ ഡെമോക്രാറ്റിക്​ സ്ഥാനാർഥി ജോ ബൈഡനാണ്​ മുന്നേറുന്നത്​.